Read Quechua Cuzco Bible 1988 GÉNESIS 17 Bible Online

GÉNESIS 17 - Quechua Cuzco Bible 1988 bible

GÉNESIS 17

¹Abram isqon chunka isqonniyoq watayoq kashaqtintaq, Señor Diosqa payman rikhurirqan, hinaspan payta nirqan: —Ñoqan Tukuy-atiyniyoq Dios kani, munayniyman hina allinta kawsay.

²Ñoqan qanwan rimanakusaq, sinchitan askhayachisqayki, nispa.

³Hinaqtinmi Abramqa pampakama k'umuykukurqan, Diostaq payta nirqan:

⁴—Ñoqan qanwan kayta rimanakushani: Askha runaq taytanmi kanki.

⁵Manañan sutiykiqa Abramchu kanqa, aswanpas sutiykiqa Abrahammi [10] kapunqa, askha runaq taytanpaq qanta churasqayrayku.

⁶Sinchitan askhayachisqayki, runakunan qanmanta miranqa, hinallataq reykunapas qanmanta paqarinqa.

⁷Ñoqan qanwanpas mirayniykikunawanpas rimanakusqayta wiñaypaq hunt'asaq, ahinapin qanpapas mirayniykikunaqpas Diosniykichis kasaq.

⁸Qanmanwan paykunamanwanmi karu llaqtayoq kashasqayki hallp'ata qosqaykichis. Lliw Canaán hallp'an wiñay herenciaykichis kanqa, paykunaq Diosnintaq kasaq, nispa.

⁹Nillarqantaq Diosqa Abrahamta: —Qantaq ichaqa rimanakuyniyta waqaychanki, qanpas sapanka mirayniykipas.

¹⁰Kaymi ñoqawan qankunawan mirayniykiwanpas rimanakuyniy kanqa hunt'anaykichispaq: Llapa qhari qankunapi qhari-kaynin señalasqa kachun.

¹¹Nispaqa kuchuqakunkichis qhari-kayniykichis qarachata, ñoqawan qankunawan rimanakusqay señal kananpaq.

¹²Qankunawan kashaq pusaq p'unchayniyoq llapa qhari wawan señalasqa kanqa, wasiykipi naceqpas, mana mirayniyki mayqen karu llaqtayoqmanta rantikusqaykipas, iskayninkun señalasqa kanan. Ahinapin wiñaypaq rimanakuyniy señalqa aychaykichispi kanqa.

¹⁴Mana señalasqa runaqa ayllun ukhumantan qarqosqa kanqa, rimanakuyniyta p'akisqanrayku, nispa.

¹⁵Nillarqantaq Diosqa Abrahamta: —Sarai warmiykitaqa amañan “Sarai” ninkiñachu, aswanpas “Sara”[11] sutinqa kapunqa.

¹⁶Ñoqataq payta saminchasaq, paypin churitapas qollasqaykitaq. Arí, paytan saminchasaq, hinan hatun suyukunaq maman kanqa, paymantan runakunaq reynin paqarinqa, nispa.

¹⁷Hinaqtinmi Abrahamqa pampakama k'umuykukuspa asikurqan, sonqonpitaq nirqan: —¿Pachak watayoq runapaqchu qhari wawa nacenman? ¿Sarapas isqon chunka watayoqñachu wachakunman? nispa.

¹⁸Hinaspanmi Abrahamqa Diosta nirqan: —¡Ismael-lla saminchayniykiwan kawsanman! nispa.

¹⁹Hinan Diosqa kutichirqan: —Cheqaqtapunin warmiyki Sara wawata qanpaq wachakunqa, sutichankitaq Isaacta [12]. Rimanakuyniytataq paywan wiñaypaq sayachisaq mirayninkunawanpas.

²⁰Ismaelpaqpas uyarillarqaykitaqmi. Paytaqa saminchasaqmi, mirachisaqmi, sinchitataq askhayachisaqpas. Chunka iskayniyoq kamachikuqkunatan churiyanqa, hatun suyumantaq tukuchisaq.

²¹Rimanakuyniytataq ichaqa Isaacwan sayachisaq, paytan Sara qanpaq wachakunqa kunan hina tiempo q'aya watapi, nispa.

²²Hinaspan paywan rimayta tukuspa, Diosqa Abrahampa qayllanmanta ripurqan.

²³Abrahamtaq churin Ismaelta hap'irqan, wasinpi llapa naceq kamachikunatapas, llapa rantisqankunatapas, wasinpi kaq llapa qharitapas, hinaspan chay kikin p'unchaypi paykunata señalarqan, Diospa payta kamachisqanman hina.

²⁴Abrahamtaq señalakushaspa karqan isqon chunka isqonniyoq watayoq, churin Ismaeltaq karqan chunka kinsayoq watayoq señalakushaqtin.

²⁶Chay kikin p'unchaypin señalasqa karqan Abrahampas churin Ismaelpas, hinallataq wasinpi llapa qharikunapas, wasinpi naceq kamachikunapas, karu llaqtayoqkunamanta rantisqakunapas, paywan kuskan señalasqa karqanku.