Read Quechua Cuzco Bible 1988 GÉNESIS 18 Bible Online

GÉNESIS 18 - Quechua Cuzco Bible 1988 bible

GÉNESIS 18

¹Señor Diostaq Mamrepi terebinto sach'akuna qayllapi Abrahamman rikhurirqan, chawpi p'unchay hinata karpan punkupi tiyashaqtin.

²Hinan qhawarispa rikurqan qayllanpi kinsa qhari kashaqta, rikuspan hinataq karpan punkumanta phawarirqan paykunata chaskiq. Hinaspan pampaman k'umuykuspa,

³nirqan: —Wiraqocháy, khuyapayawankichus chayqa, rogakuyki kamachiykiq qayllanta ama wayralla pasanaykipaq.

⁴Unuchata aparimusqaykichis chakiykichista mayllikunaykichispaq, hinaspataq sach'a sikipi samarikunkichis,

⁵ñoqataq t'antachata aparimusqaykichis kallpachakunaykichispaq, chaymantataq ripunkichis, ñataq kamachiykiman chayamuwankiña chayqa, nispa. Paykunataq nirqanku: —Nisqaykita hina ruway, nispa.

⁶Hinaqtinmi Abrahamqa phawaylla rirqan Saraq kasqan karpata, hinaspan payta nirqan: —Usqhaylla hap'iy kinsa tupu ñut'u hak'uta, q'apirqospa t'antata ruwarqoy, nispa.

⁷Abrahamtaq waka t'aqaman phawarirqan, hinaspan allinnin uña torillota hap'irqamuspa waynaman qorqan, chay waynataq usqhaylla wayk'urqan.

⁸Abrahamqa hap'illarqantaq llukllutapas, lechetapas, wayk'usqan torillotapas, hinaspan paykunaman haywarqan, paytaq paykunawan sach'a sikipi sayasharqan mikhushanankukama.

⁹Chaymantataq nirqanku: —¿Maypitaq warmiyki Sarari? nispa. Paytaq kutichirqan: —Karpapin kashan, nispa.

¹⁰Chaymi nirqan: —Kutimusqaykipunin q'aya wata kunan hina, warmiyki Saran qhari wawayoq kanqa, nispa. Sarataq uyarisharqan paypa qhepanpi kaq karpa punkumanta.

¹¹Abrahampas Sarapas yuyaqñan karqanku, machu-payaña, Saraqpas ñan killanpas chinkapusqaña.

¹²Chaymi Saraqa sonqonpi asikurqan: —¿Machu-paya kayniykupiñachu kusikusaqku? nispa.

¹³Hinan Señor Diosqa Abrahamta nirqan: —¿Imanaqtintaq Sarari asikun: ¿Wachakuymanñachu payaña kaspay? nispa.

¹⁴¿Diospaqri imapas sinchi sasa kanchu? Nirqaykiña chay watatan kutimusqayki, Sarataq qhari wawayoq kanqa, nispa.

¹⁵Hinaqtinmi Saraqa mananchakurqan: —Manan asikunichu, nispa, manchakusqanrayku. Señor Diostaq nirqan: —Manan hinachu, asikushankitáq, nispa.

¹⁶Chay qharikunataq chaymanta sayarispa Sodomaneqman rirqanku, Abrahamtaq riysirqan paykunata kacharpariq.

¹⁷Señor Diostaq nirqan: —¿Imatachus ruwanayta Abrahammanta pakaymanchu,

¹⁸Abraham ancha hatun suyu kallpayoq kanan kashaqtin, hinaspa kay pachapi runakuna: Payta hina saminchawayku, ninanku kashaqtin?

¹⁹Ñoqa payta akllakurqani, wawankunata qhepa miraynintapas kamachinanpaq chaninkaqtapas allinkaqtapas ruwaspa kasuwanankupaq, ñoqa Abrahamman prometesqayta hunt'anaypaq, nispa.

²⁰Hinaspanmi Señor Diosqa payta nirqan: —Sodoma Gomorra contran aswan-aswanta uyarikamun, hinallataq huchankupas sinchiyaykun.

²¹Kunanqa uraykusaq, hinaspa ruwasqankuta rikumusaq uyarikamusqanman hinapunichus kasqa icha manachus chayta, ahinapitaq yachasaq, nispa.

²²Hinaspanmi iskay qharikunaqa chaymanta puririspanku, Sodomaman rirqanku, Abrahamtaq ichaqa Señor Diospa qayllallanpiraq kasharqan.

²³Hinaspan asuykuspa nirqan: —¿Chanin runatapas wañuchinkichu mana chanintawan kuska?

²⁴Icha chay llaqtapi kanpaschá phisqa chunka chanin runakuna, ¿thunillawaqtaqchu llaqtata? ¿Manapunichu chay cheqasta pampachawaq, chaypi phisqa chunka chanin runakuna kashaqtin?

²⁵Ama chay hinata ruwaychu, ama chanin runataqa mana chanintawan wañuchiychu, ama chanin runaqa mana chanin hina rikusqaqa kachunchu. ¡Amapuni chaytaqa ruwaychu! Kay pachantin Juezqa, ¿manachu ruwawaq chaninkaqta? nispa.

²⁶Señor Diostaq kutichirqan: —Sodomapi phisqa chunka chanin runata tarisaq chayqa, lliw chay cheqastan paykunarayku pampachasaq, nispa.

²⁷Abrahamtaq kutichispa nirqan: —Uyariykuway, Señor Diosníy rimapayashasqayta, runallan kanipas.

²⁸Icha phisqa chunka chanin runamanta faltanpaschá phisqa, ¿chay phisqaraykuchu llaqtantinta wañuchinki? nispa. Paytaq kutichirqan: —Chaypi tawa chunka phisqayoqta tarisaq chayqa, manan wañuchisaqchu, nispa.

²⁹Hinan huktawan payta rimapayarqan: —Icha chaypi tawa chunkallapaschá kanqa, nispa. Paytaq kutichirqan: —Manan wañuchisaqchu tawa chunka kaqtinqa, nispa.

³⁰Hinan nirqan: —Kunanqa, Señor Diosníy, ama phiñakuychu rimapayallasqaykitaq chayqa, icha chaypi kinsa chunkallapaschá kanqa, nispa. Paytaq kutichirqan: —Manan wañuchisaqchu kinsa chunka kaqtinqa, nispa.

³¹Nillarqantaq: —Uyariykullawaytaq, Señor Diosníy, rimapayashasqayta, icha chaypi iskay chunkallapaschá kanqa, nispa. Paytaq kutichirqan: —Manan wañuchisaqchu iskay chunka kaqtinqa, nispa.

³²Nillarqantaq: —Kunanqa, Señor Diosníy, ama phiñakuychu, kay kutillatawan rimapayaqtiy. Icha chaypi chunkallapaschá kanqa, nispa. Paytaq kutichirqan: —Manan wañuchisaqchu chunka kaqtinqa, nispa.

³³Abrahamwan rimayta tukuspa hinataq Señor Diosqa ripurqan, Abrahamtaq karpanman kutipurqan.