Read Quechua Cuzco Bible 1988 GÉNESIS 19 Bible Online

GÉNESIS 19 - Quechua Cuzco Bible 1988 bible

GÉNESIS 19

¹Chay iskay angelkunataq Sodomaman chayarqanku rasphiyaykuyta, Lot-taq Sodoma llaqta punkupi tiyasharqan. Paymi paykunata rikurqospa sayarirqan chaskinanpaq, hinaspan pampaman k'umuykukuspa,

²nirqan: —Kunanqa, wiraqochaykuna, valekuykichis kamachiykichispa wasinman haykuykunaykichispaq, hinaspa qorpachakunaykichispaq, chakiykichistapas mayllikunaykichispaq. Tutamantañataq hatarinkichis, hinaspa ripunkichis, nispa. Paykunataq ichaqa nirqanku: —Manan, plazallapin puñusaqku, nispa.

³Lot-taq ichaqa sinchita paykunata valekurqan, chaymi paywan wasinman haykurqanku. Paytaq paykunapaq sumaq mikhunata wayk'uchirqan, mana qonchuyoq t'antata masachirqan, hinan mikhurqanku.

⁴Manaraq puñuykushaqtinkutaq Sodoma llaqta qharikunaqa llaqtallantin wasita muyuykurqanku, waynakunapas yuyaqkunapas llapallanku,

⁵Lot-ta waqyaspataq nirqanku: —¿Maymi kunan tuta wasiykiman chayamuq qharikuna? Horqomuwayku map'achanaykupaq [13], nispa.

⁶Hinaqtinmi Lotqa paykunaman lloqsimurqan, qhepanta punkuta wisq'aspataq,

⁷nirqan: —Valekuykichismi, wawqeykuna, ama chay hina mana allinta ruwaychischu.

⁸Kashanmi iskay ususiykuna, doncellakuna, paykunata horqomusqaykichis, ima munasqaykichista ruwaychis, kay qharikunallata ama imanaychispaschu, paykunaqa qorpaykunan, nispa.

⁹Hinan paykunaqa nirqanku: —¡Anchhuriy! ¡Karu llaqtayoqmi qanqa kanki! ¿Juezñachu kayta munanki? Kunanqa qorpaykikunamantaqa aswan mana allintan ruwasqaykiku, nispa. Hinaspan Lotman phawaykurqanku, punkutapas p'akiyta munarqanku.

¹⁰Chay iskay qharikunan ichaqa hap'ispa Lot-ta wasiman aysaykurqanku, punkutataq wisq'arparirqanku.

¹¹Wasi punkupi kashaq runakunatataq huch'uymanta hatunkama ñawsayachirqanku, chaymi paykunaqa punkuta yanqa maskhakurqanku.

¹²Chaymantataq chay qharikunaqa Lot-ta nirqanku: —¿Piniykipas kaypi kanraqchu? Qatayniykikunata, churiykikunata, ususiykikunata llaqtapi hayk'an kaqniykitapas kaymanta horqollayña.

¹³Kay llaqtataqa thunisaqkun. Señor Diosmi anchataña kay llaqta contra uyarin, chaymi Señor Diosqa kachamuwanku thuninaykupaq, nispa.

¹⁴Hinaqtinmi Lotqa lloqsispa ususinkunawan casarakunankupaq kaqkunata rimapayarqan: —Hatariychis, kaymanta lloqsiychis, Señor Diosmi kay llaqtata thuninqa, nispa. Paykunataq ichaqa yuyarqanku yanqa rimasqanpaq.

¹⁵Pacha illarimuytataq angelkunaqa Lot-ta usqhachirqan: —Sayariy, warmiykitapas iskay ususiykitapas kaymanta pusay, paqtan kay llaqtaq muchuyninpi wañuwaq, nispa.

¹⁶Pay mana usqhaqtintaq Señor Diospa khuyapayasqanman hina chay qharikunaqa paytapas, warmintapas, iskaynin ususinkunatapas makinkumanta hap'iykuspa, paykunata llaqta hawaman saqemurqanku.

¹⁷Hinaspataq huknin angelqa nirqan: —¡Ayqekuy! Ama qhepaykita qhawarikamuychu, amataq mayneqpipas kay pampapi sayaykuychu. Orqo-orqoman ayqey, paqtan wañuwaq, nispa.

¹⁸Hinan Lotqa paykunata nirqan: —Manan, valekuykichismi wiraqochakuna,

¹⁹anchata khuyapayawaspaykin kamachiykita kawsachiwarqanki, manan orqoman ayqeymanchu, paqtan muchuchiy ñanpi taripawaqtin wañuyman.

²⁰Qhawariy, haqay llaqtaqa qayllallaypin kashan, chayman ayqesaq, chayqa huch'uyllan. Haqayman ayqechiwaychis kawsanaypaq. ¿Manachu chayqa huch'uylla? nispa.

²¹Hinan payman kutichirqan: —Kay mañakusqaykitapas uyarinin, chay nisqayki llaqtataqa manan thunisaqchu.

²²¡Usqhay! ¡Haqayman ayqey! Manan imatapas ruwasaqchu haqayman chayanaykikama, nispa. Chaymi chay llaqtaqa Zoar [14] nisqa sutiyoq.

²³Zoarman Lot chayaqtinña inti lloqsimurqan.

²⁴Hinaqtinmi Señor Diosqa Sodomaman Gomorramanwan hanaq pachamanta parachimurqan azufreta ninatawan.

²⁵Hinaspan thunirqan chay llaqtakunata llapa tiyaqkunantinta, lliw chay wayq'otapas chakrakunantinta.

²⁶Lotpa warmintaq ichaqa qhepanta qhawarirqan, hinaspan kachi qaqaman tukurqapurqan.

²⁷Abrahamtaq tutallamanta rirqan Señor Diospa qayllanpi kasqanman,

²⁸hinaspanmi qhawaykurqan Sodomata Gomorrata lliw chay wayq'otapas, hinan rikurqan horno q'osñi hina wayq'omanta wicharishaq q'osñita.

²⁹Ahinan karqan Lotpa tiyasqan wayq'o llaqtakunata Dios thunishaqtin. Abrahammanta Dios yuyarikurqan, chaymi Lot-ta ñak'ariymanta qespichimurqan.

³⁰Zoarpi qhepakuyta manchakuspanmi, Lotqa iskay ususinkunantin Zoarmanta lloqsispa orqo-orqopi tiyarqan, kinsantinkun qaqa wasipi tiyarqanku.

³¹Hinan kurakkaqqa sullk'akaqta nirqan: —Taytanchisqa yuyaqñan, manan kay pachapi qhari kapunchu ñoqanchiswan casarakunanpaq kay pachantinpi yachasqaman hina.

³²Haku, vinota taytanchisman ukyachisunchis, hinaspa paywan puñusunchis, chay hinapi taytanchispaq wachakusunchis, nispa.

³³Chay tutan taytankuman vinota ukyachirqanku, hinaspan kurakkaqqa suchuykuspa taytanwan puñurqan. Paytaq ichaqa mana reparakurqanchu ususinpa puñuykusqantapas hatarisqantapas.

³⁴Paqarisnintintaq kurakkaqqa sullk'akaqta nirqan: —Ch'isi tutan taytaywan puñukurqani, kunan tutapas vinota ukyachillasuntaq, suchuykuspataq paywan puñunki, chay hinapi iskayninchis taytanchispaq wachakusunchis, nispa.

³⁵Hinallataq chay tutapas taytankuman vinota ukyachirqanku, hinaspataq sullk'akaqqa hatarispa paywan puñukurqan. Paytaq ichaqa manallataq reparakurqanchu ususinpa puñuykusqantapas hatarisqantapas.

³⁶Chay hinatan Lotpa iskay ususinkunaqa taytankupaq wiksallikurqanku.

³⁷Hinaspan kurakkaqqa huk qhari wawata wachakurqan, suticharqantaq Moabta, paymi kunan Moab runakunaq taytan.

³⁸Sullk'akaqpas wachakullarqantaq huk qhari wawata, suticharqantaq Ben-ammita, paymi kunan Amón runakunaq taytan.