Read Quechua Cuzco Bible 1988 GÉNESIS 2 Bible Online

GÉNESIS 2 - Quechua Cuzco Bible 1988 bible

GÉNESIS 2

¹Hanaq pachapas kay pachapas tukusqataq karqan, lliw ima hayk'a kaqkunapas.

²Diosmi qanchiskaq p'unchaypi tukurqan ruwasqanta, hinaspan qanchiskaq p'unchaypi samakurqan lliw ruwasqanmanta.

³Chaymi Diosqa qanchiskaq p'unchayta samincharqan sapaqcharqantaq, chay p'unchaypin Diosqa lliw kamasqanmanta samakurqan.

⁴Kay hina kamasqan karqan hanaq pachapas kay pachapas. Apu Señor Dios kay pachata hanaq pachata ruwaqtinqa,

⁵manan kay pachapi ima ch'aphrapas karqanraqchu, manallataq ima q'omer qorapas phutumurqanraqchu. Apu Señor Diosqa manan kay pachaman parachimurqanraqchu, manan runapas hallp'a llank'ananpaq karqanraqchu.

⁶Aswanpas pukyun pampamanta phullpumuspa kay pachantinman llimp'arqan.

⁷Hinamantataq ñut'u hallp'amanta Apu Señor Diosqa runata[2] ruwarqan, hinaspa kawsay samayta senqanman samaykurqan, chaymi runaqa kawsashaq kapurqan.

⁸Apu Señor Diosmi Edenpi huertata plantarqan, inti lloqsimuy kinraypi, hinaspan ruwasqan runata chayman churarqan.

⁹Apu Señor Diostaq hallp'amanta phutuchimurqan lliw munayllaña sach'akunata, mikhunapaqpas sumaqta. Churallarqantaq huerta chawpipi kawsachiq sach'atapas, allinkaqta mana allinkaqta reqsichiq sach'atapas.

¹⁰Edenmantataq huk mayu lloqsimurqan huertata qarpananpaq, chaymantataq tawaman p'alqarqan.

¹¹Ñawpaqkaqpa sutinmi Pisón karqan, chaymi Havila nisqa lliw hallp'anta purin, chaypin kan qori.

¹²Chay hallp'a qoriqa ch'uyan, chaypin kallantaq q'apaq gomapas yanayoq yuraq umiñapas.

¹³Iskaykaq mayuq sutintaq Gihón karqan, Kus nisqa lliw hallp'anta purin.

¹⁴Kinsakaq mayuq sutintaq Tigris karqan, chaymi Asiriaq inti lloqsimuy kinrayninta purin. Tawakaq mayutaq Eufrates karqan.

¹⁵Apu Señor Diosmi runata Edén huertaman churarqan llank'ananpaq waqaychananpaqwan,

¹⁶hinaspan runata kamachirqan: —Atinkin huertapi llapa sach'a ruru mikhuyta,

¹⁷ichaqa allinkaqta mana allinkaqta reqsichiq sach'a rurutan ama mikhunkichu, chayta mikhunki chayqa, wañunkipunin, nispa.

¹⁸Hinaspan Apu Señor Diosqa nirqan: —Manan allinchu qhariq sapallan kanan, paypaq hinapuni yanapaqninta ruwapusaq, nispa.

¹⁹Hinan Apu Señor Diosqa hallp'amanta ruwarqan lliw salqa uywakunata, llapa phalaq animalkunatapas, hinaspan runaman chaykunata asuykachirqan sutichananpaq. Hinaqtinmi runaqa suticharqan llapa uywata, phalaq animaltapas, llapa salqa uywakunatapas, hinan sapanka animalqa runaq sutichasqan kapurqan, runapaqmi ichaqa paypaq hinapuni yanapaqnin mana karqanchu.

²¹Chaymi Apu Señor Diosqa runata misk'ita puñurqochirqan, puñushaqtintaq huknin waqtanta horqorqan, hinaspataq aychanta wisq'aykapurqan.

²²Hinaspan Apu Señor Diosqa qharimanta horqosqan waqtamanta warmita ruwarqan, hinaspataq qhariman pusamurqan.

²³Hinan qhariqa kusikurqan: —¡Kaymá! Tulluy tulluyoqqa, aychay aychayoqqa, kaymi “Warmi” sutiyoq kanqa qharimanta horqosqa kasqanrayku [3], nispa.

²⁴Chayrayku, qhariqa taytantapas mamantapas saqepunqa, hinaspan warminman hukllachaykakapunqa, huk aychallataq kapunqaku.

²⁵Iskayninkutaq q'alalla karqanku, qharipas warmipas, manataq p'enqanakurqankuchu.