Read Quechua Cuzco Bible 1988 GÉNESIS 21 Bible Online

GÉNESIS 21 - Quechua Cuzco Bible 1988 bible

GÉNESIS 21

¹Señor Diostaq nisqanman hina Saraman watukamurqan, Señor Diosmi Sarapaq hunt'arqan payman prometesqanman hina,

²chaymi Saraqa wiksallikuspa qhari wawata Abrahampaq wachakurqan yuyaq kashaqtinña, Diospa payman nisqan tiempopi.

³Abrahamtaq Saraq paypaq wachakusqan churinta suticharqan Isaacta,

⁴hinaspan paypa qhari-kayninta señalarqan pusaq p'unchayniyoq kashaqtin Diospa kamachisqanman hina.

⁵Abrahammi karqan pachak watayoq churin Isaac paypaq naceshaqtin.

⁶Sarataq nirqan: —Diosmi asichiwan, pipas chayta uyariqtaq ñoqawan asikunqa.

⁷¿Pitaq Abrahamman ninman karqan wawakunata ñoqaq ñuñunayta? Chaypas huk qhari wawatan paypaq wachakuni yuyaqña kashaqtin, nispa.

⁸Wawataq wiñarqan, hinaspan p'itisqa karqan. Abrahammi hatun mikhuyta wayk'uchirqan Isaac p'itisqa p'unchaypi.

⁹Saran rikurqan Isaac wawanta Egipto warmi Agarpa wawan asipayasqanta, paytan Agarqa Abrahampaq wachakurqan.

¹⁰Chayrayku Abrahamta nirqan: —Chay kamachita wawantinta qarqoy. Chay kamachiq wawanqa manan Isaac wawaywan herenciata chaskiysikunmanchu, nispa.

¹¹Chay nisqanwanmi Abrahamqa sonqonta nanachikurqan Ismael churinrayku.

¹²Chaymi Diosqa Abrahamta nirqan: —Ama kayta mana allinpaqchu hap'iy wayna hawa kamachiyki hawa ima. Imatachus Sara nisunki chayta uyariy, Isaacmantan mirayniykiqa paqarinqa.

¹³Wawayki kasqanraykun kamachiq wawantapas hatun suyuman tukuchisaq, nispa.

¹⁴Hinan Abrahamqa tutallamanta sayarispa t'antata hap'irqan huk qara p'uyñu unutawan, hinaspan Agarman qospa q'epiykachirqan, wawantapas qollarqantaq, chaymantataq payta kacharparipurqan. Hinaqtinmi payqa puririrqan, Beerseba ch'inneqpitaq payen-payen purirqan.

¹⁵Qara p'uyñupi unutaq tukukapurqan, hinan waynata huk ch'aphra sikipi saqerparirqan.

¹⁶Warak'asqa aypayman hina rispataq chimpanpi tiyaykuspa nirqan: —Manan rikusaqchu wawa wañuqtaqa, nispa. Chimpanpi tiyaykuspataq kunkayoqta waqarqan.

¹⁷Diostaq waynaq waqasqanta uyarirqan, chaymi Diospa angelninqa hanaq pachamanta Agarta waqyamuspa nirqan: —¿Imanantaq Agar? Ama manchakuychu. Diosmi waynaq waqasqanta uyarin maypichus kashasqanpi.

¹⁸Sayariy, waynata hoqariy, sonqochaykuy, hatun suyumanmi payta tukuchisaq, nispa.

¹⁹Chay hinapin Diosqa ñawinta kicharirqan, hinan unu pukyuta rikurqan. Rispataq qara p'uyñuman unuta hillp'urqan, hinaspataq waynaman ukyachirqan.

²⁰Diosmi waynata yanaparqan, wiñarqanmi, Parán ch'inneqpin tiyarqan, kusa wach'iqtaq karqan. Mamantaq Egipto suyu warmiwan casarachirqan.

²²Chay kikin tiempopitaq Abimelekqa ejército umalli Fikolpiwan Abrahamta rimapayarqan: —Tukuy ruwasqaykipin Diosqa yanapashasunki.

²³Kunanqa Diospa sutinpi jurapuway, ama ñoqatapas churiytapas, nietoytapas llullachanaykipaq, aswanpas imaynan qanta allinta rikurqayki, ahinallatataq ñoqatapas tiyasqayki llaqtatapas rikunki, nispa.

²⁴Abrahamtaq kutichirqan: —Arí, juranin, nispa.

²⁵Hinaspan Abrahamqa Abimelekta anyaykurqan unu p'uytu hawa. Abimelekpa kamachinkuna chay p'uytuta paymanta qechusqaku.

²⁶Abimelektaq kutichirqan: —Manan yachanichu pichus chayta ruwasqanta, manallataq qanpas willawarqankichu, manan kunankama chayta uyarillarqanipaschu, nispa.

²⁷Abrahamtaq ovejakunata wakakunata t'aqaspa Abimelekman qorqan, hinaspan iskayninku rimanakurqanku.

²⁸Abrahamtaq t'aqamanta qanchis malta ovejata t'aqarqan.

²⁹Hinaqtinmi Abimelekqa Abrahamta nirqan: —¿Ima ninkitaq chay qanchis malta oveja t'aqasqaykiwan? nispa.

³⁰Hinan payqa kutichirqan: —Kay qanchis malta ovejatan chaskiwanki, ñoqa kay p'uytuta t'oqorqani chayta yachanapaq, nispa.

³¹Chayraykun chayneqta Beersebata[15] suticharqan, iskayninku chaypi jurasqankurayku.

³²Ahinatan Beersebapi rimanakurqanku, hinaspan Abimelekqa, ejército umalli Fikolpiwan Filistea suyuman kutipurqan.

³³Abrahamtaq Beersebapi tamarisco sach'ata mallkirqan, chaypin Wiñay Señor Diospa sutinpi mañakurqan.

³⁴Abrahammi Filistea suyupi unayta tiyarqan.