Read Quechua Cuzco Bible 1988 GÉNESIS 22 Bible Online

GÉNESIS 22 - Quechua Cuzco Bible 1988 bible

GÉNESIS 22

¹Chaykuna qhepatataq Diosqa Abrahamta probarqan, niykurqantaq: —Abraham, nispa. Paytaq kutichirqan: —Uyarishaykin, nispa.

²Hinan nirqan: —Kunanqa munasqayki sapallan churiyki Isaacta pusay, hinaspa Moriah kinrayman riy, chaypi payta ruphachina sacrificiota haywamuway ñoqa nisqayki chay huknin orqo patapi, nispa.

³Hinaqtinmi Abrahamqa tutallamanta sayarispa asnonta caronarqan, iskay kamachinta churin Isaactawan waqyarqan. Llant'atapas ruphachina sacrificiopaq llant'arqan, hinaspanmi puririrqan Diospa nisqan cheqasman.

⁴Kinsakaq p'unchaypitaq Abrahamqa qhawarirqan, hinaspan karumanta chayneqta rikurqan.

⁵Hinaspanmi Abrahamqa kamachikunata nirqan: —Kaypi asnontin suyashawayku, ñoqawan waynawantaq haqaykama risaqku, yupaychamusaqku, hinaspataq qankunaman kutimusaqku, nispa.

⁶Hinaspan Abrahamqa ruphachina sacrificiopaq llant'ata hoqarispa churin Isaacman q'epichirqan, paytaq ninata cuchillotawan makinpi aparikurqan, iskayninkutaq kuska rirqanku.

⁷Isaactaq taytan Abrahamta nirqan: —Taytáy, nispa. Paytaq kutichirqan: —¿Ima ninkin, churíy? nispa. Isaactaq nirqan: —Kayqa ninapas llant'apas, ¿maytaq borregori ruphachina sacrificiopaq? nispa.

⁸Chaymi Abrahamqa kutichirqan: —Churíy, kikin Diosmi ruphachina sacrificiopaq borregota churamunqa, nispa. Iskayninkutaq risharqanku.

⁹Diospa nisqan cheqasman chayaspankutaq, Abrahamqa altarta perqarqan, hinaspan llant'ata chayman tawqaykurqan. Churin Isaacta mayt'uykuspataq altar pata llant'aman churaykurqan.

¹⁰Hinaspan Abrahamqa cuchillota hoqarirqan churinta nak'ananpaq,

¹¹chayllamanmi Señor Diospa angelninqa hanaq pachamanta waqyamuspa nirqan: —¡Abraham, Abraham! nispa. Paytaq kutichirqan: —Uyarishaykin, nispa.

¹²Hinan nimurqan: —Ama waynaman makiykita haywariychu, amataq imanaypaschu, yachaniñan Diosta manchakushasqaykita, manan sapan churiyki qoyta hark'akuwarqankichu, nispa.

¹³Hinan Abrahamqa qhepanta qhawarikuspa rikurqan huk anejota waqranmanta huk ch'aphra-ch'aphrapi chakaykusqata. Hinaspan payqa asuykuspa anejota hap'irqan, churinpa rantinpitaq ruphachispa sacrificiota haywarqan.

¹⁴Hinaspanmi Abrahamqa chayneqta suticharqan “Señor Diosmi churamunqa”, nispa. Chaymi kunankama “Señor Diospa orqonpin churamusqa kanqa”, nispa nisqa.

¹⁵Señor Diospa angelnintaq hanaq pachamanta iskaykaq kutita Abrahamta waqyarqan,

¹⁶hinaspan nirqan: —Señor Diosmi nin: Kayta ruwasqaykirayku, manataq sapan churiykita qoyta hark'akuwasqaykiraykupiwanmi ñoqaqa sutiypi jurani anchatapuni qanta saminchanaypaq. Anchatapunin mirayniykita askhayachisaq hanaq pacha ch'askakunata hina, mama qocha pata aqota hina. Mirayniykin awqaykikunata atipanqa, kay llapan ayllukunan mirayninta hina saminchawayku ninqaku, simiyta kasukusqaykirayku, nispa, nispan.

¹⁹Abrahamtaq kamachinkunaman kutimpurqan, hinaspan Beersebaman kuska ripurqanku. Beersebapin Abrahamqa tiyarqan.

²⁰Chaykuna qhepatataq Abrahamman willarqanku: Milkapas wawqeyki Nakorpaqmi wachakun

²¹phiwi Uzta, wawqen Buzta, Aranpa taytan Kemuelta,

²²Kisedta, Hazota, Pildasta, Jidlafta, Betueltawan, nispa.

²³Betueltaq Rebecaq taytan karqan. Chay pusaq wawakunatan Milka wachakurqan Abrahampa wawqen Nakorpaq.

²⁴Nakorpa tiyaqmasin Reumpas wachakullarqantaq Tebata, Gahamta, Tahasta, Maakatawan.