Read Quechua Cuzco Bible 1988 GÉNESIS 23 Bible Online

GÉNESIS 23 - Quechua Cuzco Bible 1988 bible

GÉNESIS 23

¹Saran kawsarqan pachak iskay chunka qanchisniyoq watata,

²hinaspan Saraqa Kiriat-arbapi wañukapurqan, chaymi Hebrón, Canaán suyupi. Abrahammi Saramanta llakikuq waqaq.

³Hinaspanmi Abrahamqa wañuqnin qayllamanta hatarispa Het runakunata nirqan:

⁴—Karu llaqtayoqmi purikuqmi qankuna ukhupi kani, aya p'ampana hallp'ata qowaychis, ayaytan p'ampakapullasaqña, nispa.

⁵Hinan Het runakunaqa nirqanku:

⁶—Uyariwayku, wiraqochayku, ancha atiyniyoqmi ñoqayku ukhupi kashanki, allinkaq aya p'ampanaykupi ayaykitaqa p'ampakuy, manan mayqenniykupas aya p'ampanataqa hark'akusqaykikuchu ama ayaykita p'ampanaykipaq, nispa.

⁷Chaymi Abrahamqa sayarispa chay Het runakunaman k'umuykukurqan,

⁸hinaspan paykunawan rimarqan: —Ayayta p'ampaykapunayta munankichis chayqa, uyariykuwaychis, Zoharpa churin Efronta valekapuwaychis,

⁹chakranpa k'uchunpi Makpela qaqa wasita qowananpaq. Chanin preciopi chayta qowachun qankuna ukhupi aya p'ampanay kananpaq, nispa.

¹⁰Chay Efronqa Het runakunawanmi kasharqan, paymi Abrahamman kutichirqan, Het runakunaq uyarinanpaq, llaqta punkuta llapa haykuqkunaqpas uyarinanpaq:

¹¹—Manan, wiraqocháy, uyariway, qosqaykin chakrata, qollasqaykitaqmi chaypi kaq qaqa wasitapas, llaqta masiykunaq qayllanpi chayta qosqayki, ayaykita p'ampakuy, nispa.

¹²Hinaqtinmi Abrahamqa Het runakunaq ñawpaqenpi k'umuykukurqan,

¹³hinaspanmi llapanku uyarinanpaq Efronman kutichirqan: —Uyariykullaway, qosqaykin chakraq precionta, chaskillaway, chaymi ayayta chaypi p'ampasaq, nispa.

¹⁴Efrontaq Abrahamman kutichirqan:

¹⁵—Wiraqocháy uyariway. Hallp'aqa valen tawa pachak qolqen. ¿Imataq kayri ñoqapaqpas qanpaqpas? P'ampakullay ayaykita, nispa.

¹⁶Hinaqtinmi Abrahamqa Efronwan rimanakurqan, hinaspan Abrahamqa nisqan qolqeta Efronman pesarqan, Het runakuna chayta uyarishaqtin vendenakuy precio tawa pachak qolqeta.

¹⁷Hinan Efronpa Mamre chimpa Makpelapi kaq chakranqa qaqa wasipas, lliw sach'akunapas, lliw qorpa muyuriqpi kaqkunapiwan,

¹⁸Abrahampa kaqnin kapurqan, Het runakunaq rikusqan, llaqta punkuta llapa haykuqkunaqpas rikusqan.

¹⁹Chay qhepatataq Abrahamqa warmin Sarata p'amparqan Mamre chimpa Makpelapi kaq qaqa wasipi, Canaán suyupi.

²⁰Chakrapas chaypi kaq qaqa wasipas Abrahampan kapurqan, aya p'ampana hallp'apaq Het runakunamanta rantisqa.