Read Quechua Cuzco Bible 1988 GÉNESIS 25 Bible Online

GÉNESIS 25 - Quechua Cuzco Bible 1988 bible

GÉNESIS 25

¹Abrahammi wak warmiwan casarakurqan, paypa sutinmi karqan Kitura,

²paymi Abrahampaq wachakurqan Zimramta, Joksanta, Medanta, Madianta, Isbakta, Shuatawan.

³Joksanmi churiyarqan Sebata Dedantawan. Dedanpa churinkunataq karqan Asur runakuna, Letush runakuna, Leum runakunapiwan.

⁴Madianpa churinkunataq: Efra, Efer, Hanok, Abida, Eldapiwan. Llapan chaykunan karqan Kituraq wawankuna.

⁵Abrahammi Isaacman qorqan lliw kapuqninta.

⁶Ichaqa tiyaq-masinkunaq wawanmantaq qorqan regalokunata, hinaspan pay kawsashasparaq Isaac churinpa qayllanmanta karuman paykunata kachapurqan inti lloqsimuy hallp'aman.

⁷Abrahammi kawsarqan pachak qanchis chunka phisqayoq watata,

⁸hinaspan sinchi yuyaqña wañukapurqan, machulankunamanpas huñukapurqan.

⁹Hinan churin Isaacwan Ismaelwan p'amparqanku Makpela qaqa wasipi, Het runa Zoharpa churin Efronpa chakranpi, Mamre chimpapi kashan chaypi,

¹⁰chay chakratan Abraham rantisqa Het runakunamanta. Chaypin Abraham p'ampasqa karqan, hinallataq warmin Sarapas.

¹¹Abrahampa wañukapusqan qhepatataq Diosqa churin Isaacta samincharqan, Isaacmi Rikuwaqniy-Kawsaq P'uytu nisqa qayllapi tiyarqan.

¹²Kaykunan Abrahampa churin Ismaelpa mirayninkuna, paytan wachakurqan Egipto warmi Agar, Saraq kamachin.

¹³Kaykunan Ismaelpa churinkunaq sutin, nacesqanmanta hina sutichasqa: Nebaiot, Kidar, Adbeel, Mibsam.

¹⁴Misma, Duma, Massa,

¹⁵Hadad, Tema, Jetur, Nafis, Kidemapiwan.

¹⁶Chaykunan Ismaelpa chunka iskayniyoq churinkunaq sutin, chay sutikunallawantaqmi reqsikurqan tiyanankupas karpa-karpankupas. Sapankan ayllunkupi kamachikuq karqanku.

¹⁷Ismaelmi pachak kinsa chunka qanchisniyoq watayoq kashaspa wañukapurqan, machulankunamanpas huñukapurqan.

¹⁸Ismaelpa mirayninkunan Havilamanta Shurkama tiyarqan, chayqa kashan Asiriaman rina Egiptoq inti lloqsimuyninpin. Paykunaqa llapa wawqenku hark'akushaqtinmi tiyarqanku.

¹⁹Kaykunan Abrahampa churin Isaacmanta willakuykuna.

²⁰Isaacqa tawa chunka watayoqmi karqan Rebecawan casarakushaspan, Rebecan karqan Padam-arammanta Aram runa Betuelpa ususin, Aram runa Labanpa panan.

²¹Isaacmi Señor Diosmanta warminpaq mañapurqan mana wachakuq kaqtin. Señor Diostaq payta uyarirqan, hinan warmin Rebecaqa wiksallikurqan.

²²Wawakunataq wiksan ukhupi maqanakurqan, hinan nirqan: ¿Imapitaq kashani? nispa. Hinaspan Señor Diosta tapurqan.

²³Señor Diostaq payman kutichirqan: —Iskay hatun suyun wiksaykipi kashan, iskay llaqtataqmi paqarisqankumantapacha t'aqasqa kanqa. Huknin llaqtan aswan kallpayoq kanqa hukkaq llaqtamantaqa, kurakkaqmi sullk'akaqta servinqa, nispa.

²⁴Wachakunan killa hunt'akuqtintaq wiksanpi mellizo kapushasqa.

²⁵Ñawpaqkaqmi lloqsimurqan puka niray p'aqo, suphu p'acha hina suphu karqan, chaymi suticharqanku Esauta.[18]

²⁶Chaymantataq wawqen lloqsimurqan Esaupa talonnin hap'iykusqa, sutintaq karqan Jacob[19]. Isaacqa soqta chunka watayoqmi karqan Rebeca paykunata wachakushaqtin.

²⁷Wawakunataq wiñarqan, Esaumi allin chakuq kapurqan, campollapi puriq runa, Jacobtaq samp'a runa karqan, karpallapi tiyakuq.

²⁸Isaacmi Esauta munakurqan chakumusqanta mikhusqanrayku, Rebecataq Jacobta munakurqan.

²⁹Huk kutinmi Jacobqa mikhunata wayk'urqan. Esautaq campomanta sayk'usqallaña kutimuspa

³⁰Jacobta nirqan: —Chay puka mikhunata qaraykullawayña, sinchi sayk'usqan kashani, nispa. Chayraykun sutinqa Edom[20] nisqa.

³¹Chaymi Jacobqa kutichirqan: —Kunanpacha phiwi-kayniykitaraq pasarapuway, nispa.

³²Hinaqtinmi Esauqa nirqan: —Kayqa wañukapushaniña, ¿ima allinniypaqtaq phiwi-kayqa kanqa? nispa.

³³Chaymi Jacobqa nirqan: —Jurapuway kunanpacha, nispa. Hinan payqa jurapurqan, hinaspan phiwi-kayninta Jacobman vendepurqan.

³⁴Hinaqtinmi Jacobqa Esauman qorqan t'antata lentejas wayk'usqantapas. Hinan payqa mikhurqan ukyarqan, sayarispataq ripurqan. Chay hinatan Esauqa phiwi-kayninta pisicharqan.