Read Quechua Cuzco Bible 1988 GÉNESIS 26 Bible Online

GÉNESIS 26 - Quechua Cuzco Bible 1988 bible

GÉNESIS 26

¹Chay hallp'apitaq yarqay karqan, Abrahampa tiemponpi kasqanmantaña, hinaqtinmi Isaacqa rirqan Filistea runakunaq reynin Gerarpi kaq Abimelekman.

²Señor Diostaq Isaacman rikhurispa nirqan: —Ama Egiptoman uraykuychu, qanta nisqayki chay hallp'api tiyakuy.

³Kay hallp'api tiyarillay, qanwanmi kasaq, saminchasqaykin, qanman mirayniykimanwan kay llapan hallp'ata qonayrayku. Abraham taytaykiman prometesqaytataq hunt'asaq.

⁴Hanaq pacha ch'askakunata hinan mirayniykita askhayachisaq, hinaspan kay llapan hallp'ata paykunaman qosaq. Kay pacha lliw hatun suyukunataq: Paykunata hina saminchawayku, ninqaku,

⁵simiyta Abraham kasusqanrayku simiyta llapa kamachikusqaykunatawan hunt'asqanrayku, nispa.

⁶Gerarpin Isaacqa tiyarqan.

⁷Chaypi tiyaq runakunataq payta warminmanta tapurqanku, hinan payqa kutichirqan: —Panaymi, nispa. Manchakurqanmi “Warmiymi” niyta, sonqonpi yuyaykurqan: Paqtan chayneq runakuna Rebecarayku wañuchiwankuman, nispa. Rebecaqa sumaq rikch'ayniyoqmi karqan.

⁸Unayña pay chaypi kaqtintaq, Filistea runakunaq reynin Abimelekqa ventanamanta qhawaspa Isaacta rikurqan warmin Rebecata munakushaqta.

⁹Hinaspanmi Abimelekqa Isaacta waqyaspa, nirqan: —¡Yaw, payqa warmiykimá kasqa! ¿Imaynataq nirqanki: Panaymi, nispa? Hinan Isaacqa payman kutichirqan: —Nirqaniqa: Paqtan payrayku wañuchiwankuman, nispaymi, nispa.

¹⁰Abimelektaq nirqan: —¿Imaraykutaq chayta ruwawankiku? Faciltan mayqen runapas warmiykiwan puñunman karqan, hinaspan huchallichiwankikuman karqan, nispa.

¹¹Hinaspanmi Abimelekqa llapa runakunata kamachirqan: —Pipas chay qharita otaq warmintapas tupaykunqa chayqa, wañunqapunin, nispa.

¹²Chay hallp'apin Isaacqa tarpurqan, hinaspan chay wata hoqarirqan askhallataña, Señor Dios payta saminchasqanrayku.

¹³Qhapaqyasharqanmi allinyasharqanmi ancha atiyniyoq kapunankama.

¹⁴Karqanmi oveja t'aqanpas, waka t'aqanpas, hinallataq askha llank'aqninkunapas, chaymi Filistea runakunaqa payta envidiakurqanku.

¹⁵Taytan Abrahampa tiemponpin Abrahampa kamachinkuna p'uytukunata t'oqosqaku, chaykunatan Filistea runakuna wisq'arapusqaku, hallp'awanpas hunt'arachipusqaku.

¹⁶Hinan Abimelekqa Isaacta nirqan: —Qayllaykumanta ripuy, ñoqaykumanta aswan atiyniyoqmi kapunki, nispa.

¹⁷Chaymi Isaacqa chaymanta ripurqan, hinaspan Gerar wayq'opi karpakuspa chaypi tiyarqan.

¹⁸Hinaspanmi Isaacqa wakmanta hasp'irqan taytan Abrahampa tiemponpi hasp'isqaku chay unu p'uytukunata, chaykunatan Abrahampa wañukapusqan qhepata Filistea runakuna wisq'apusqaku. Hinaspan p'uytukunata suticharqan taytanpa sutichasqan sutiwan.

¹⁹Isaacpa kamachinkuna wayq'opi t'oqoqtinku, hinaspa chaypi phullpuq unuta tariqtinkutaq,

²⁰Gerarpi michiqkunaqa ch'aqwarqanku Isaacpa michiqninkunawan: Ñoqaykuqmi unuqa, nispa. Chaymi Isaacqa p'uytuta suticharqan “Ch'aqway” sutiwan, paywan seqachinakusqankurayku.

²¹Hinan huk p'uytuta t'oqorqanku, chay hawapas ch'aqwallarqankutaq, chaymi suticharqan “Cheqninakuy” sutiwan.

²²Chaymi chaymanta t'aqakurqanku, hinaspan wak p'uytuta t'oqorqan, manataq chay p'uytu hawa ch'aqwarqankuchu, suticharqantaq “Kachariy” sutiwan. Hinaspan nirqan: Kunanqa Señor Diosmi kacharichiwanchis, kaypi allinyananchispaq, nispa.

²³Chaymantataq Beersebaman wicharqan.

²⁴Chay tutapin Señor Diosqa payman rikhurispa, nirqan: —Ñoqan kani Abraham taytaykiq Diosnin, ama manchakuychu, ñoqan qanwan kashani, saminchasqaykin, mirayniykitan askhayachisaq kamachiy Abrahamta munakusqayrayku, nispa.

²⁵Hinan chaypi huk altarta perqaspa Señor Diosmanta mañakurqan, karpantapas chaypi sayarichirqan. Isaacpa kamachinkunataq chaypi huk p'uytuta t'oqorqanku.

²⁶Huk p'unchaymi Abimelekqa Gerarmanta payman hamurqan, reqsinakuqmasin Ahuzatpiwan, ejército umalli Fikolpiwan.

²⁷Hinan Isaacqa paykunata nirqan: —¿Imaqtaq hamuwankichis? Cheqnikuwarqankichismi, qankuna ukhumantapas wikch'umuwarqankichismi riki, nispa.

²⁸Paykunataq kutichirqanku: —Rikuykun qanwan Señor Diosqa kashasqanta, hinaspan yuyaykuyku qanwan rimanakuyta. Rimanakusunqa ama ima mana allintapas ruwawanaykikupaq, ñoqaykupas manan imanaykikupaschu, aswanpas allillantapunin ruwapurqaykiku, hinaspan allinpi kachapurqaykiku, kunanqa Señor Diosmi saminchashasunki, nispa.

³⁰Hinan payqa paykunapaq hatun mikhunata wayk'uchirqan, hinaspan mikhurqanku ukyarqanku.

³¹Pacha illarimuytataq hatarispanku jurachinakurqanku, hinaspanmi Isaacqa paykunata kacharparipurqan, paykunapas allinpi ripurqanku.

³²Chay p'unchaypin Isaacpa kamachinkuna hamurqanku, hinaspan t'oqosqanku p'uytumanta payman willarqanku: —Unutan tarimuyku, nispa.

³³Chaymi chay p'uytuta “Juramentota” suticharqan, chayraykun chay llaqtaq sutinqa chaymantapacha Beerseba [21] nisqa kapurqan.

³⁴Esauqa tawa chunka watayoqña kaspa casarakurqan Het runa Beeriq ususin Juditwan, Het runa Elonpa ususin Basematwan ima.

³⁵Hinan Isaacpaqpas Rebecapaqpas sonqo nanay karqanku.