Read Quechua Cuzco Bible 1988 GÉNESIS 27 Bible Online

GÉNESIS 27 - Quechua Cuzco Bible 1988 bible

GÉNESIS 27

¹Isaacmi sinchi yuyaq kaspa, ñawinpas ñawsayaykapuqtin, kurakkaq churin Esauta waqyarqan, hinaspan nirqan: —Wawáy, nispa. Paytaq kutichirqan: —¿Ima ninkin? nispa.

²Hinan nirqan: —Yuyaqñan kapuni, qonqaychá wañukapushasaq.

³Kunanqa hap'iy wach'ina apanaykita p'eqtaykitawan,[22] campota rispa hap'isqayki animalta apamuway.

⁴Hinaspan imaynan gustawan hina q'apashaq aycha t'imputa apamuway, mikhusaq, hinaspa manaraq wañurqoshaspay qanta saminchasqayki, nispa.

⁵Rebecataq uyarisharqan Isaacqa churin Esauta rimapayashaqtin. Esautaq apamunanpaq animalta maskhamuq campota pasarqan,

⁶hinaqtinmi Rebecaqa churin Jacobta nirqan: —Ñoqan uyarini taytaykiq Esaú wawqeykiwan rimashasqanta:

⁷Animalta hap'impuway hinaspa t'impuchimpuway mikhunaypaq, hinamantataq Señor Diospa qayllanpi qanta saminchasqayki manaraq wañurqoshaspay, nispa nishaqta.

⁸Chhaynaqa, wawáy, simiyta hap'iy imatachus qanta kamachisqayta.

⁹Phaway uywaman, hinaspa chaymanta apamuway iskay allinkaq cabrachakunata. Chaykunata taytaykipaq t'impurqochisaq paypa gustasqanman hina,

¹⁰qantaq taytaykiman apanki. Hinan mikhunqa, manaraq wañurqoshaspan pay saminchanasuykipaq, nispa.

¹¹Chaymi Jacobqa maman Rebecata nirqan: —Wawqey Esauqa suphu runan riki, ñoqataq mana hinachu.

¹²Llamiykuwanqapaschá taytayqa, hinaspapaschá burlakuqpaq hap'iwanqa, chaypaschá ñakasqa kasaq manataq saminchasqachu, nispa.

¹³Hinan mamanqa kutichirqan: —Wawáy, ñoqaman chayawachun ñakasqa-kayniykiqa, simillayta kasuway hinaspa rispa apamuway, nispa.

¹⁴Chaymi payqa rispa cabrachakunata hap'ispa mamanman apamurqan, mamantaq t'impuchirqan taytanpa gustasqanman hina.

¹⁵Rebecan hoqarirqan kurak wawan Esaupa sumaq p'achankunata, wasipi waqaychasqanta, hinaspanmi sullk'a churin Jacobta p'achachirqan.

¹⁶Chaymantataq makintapas mana suphuyoq kunkantapas p'istuykurqan cabrachakunaq qaranwan,

¹⁷t'impuchisqan aychatapas t'antatapas payman haywarqan.

¹⁸Hinaqtinmi payqa taytanman rispa nirqan: —Taytáy, nispa. Isaactaq kutichirqan: —Hay, ¿pitaq kanki, wawáy? nispa.

¹⁹Jacobtaq taytanta nirqan: —Ñoqan kani Esaú phiwiyki, niwasqaykita hinan ruwaniña. Kunanqa tiyarimuy, hinaspa hap'imusqayta mikhuy, saminchaykuwaytaq, nispa.

²⁰Hinaqtinmi Isaacqa churinta: —¿Imaynataq usqhayllari tarirqamunki, wawáy? nirqan. Paytaq kutichirqan: —Apu Señor Diosniykin yanapawan, nispa.

²¹Chaymi Isaacqa Jacobta nirqan: —Asuykamuy, llamiykusqayki wawáy, Esaú wawaychus kanki icha manachus chayta yachanaypaq, nispa.

²²Hinan Jacobqa taytanman asuykurqan, Isaactaq payta llamiykuspa, nirqan: —Rimasqan kunkaqa Jacobpa kunkanmi, makinkunataq ichaqa Esaupa makin, nispa.

²³Manataq payta reqsirqanchu, makinkuna Esaupa makin hina suphu kasqanrayku.

²⁴Saminchaykunanpaq kashaspataq, huktawan tapuykurqan: —¿Esaú churiypunichu qanqa kanki? nispa. Jacobtaq kutichirqan: —Paymi kani, nispa.

²⁵Nillarqantaq: —Asuykachimuway, mikhusaq hap'imusqaykita, hinaspa saminchaykusqayki, nispa. Chaymi Jacobqa chayta qayllaykachirqan, hinan Isaacqa mikhurqan, apamusqan vinotapas ukyallarqantaq.

²⁶Chaymantataq taytan Isaacqa payta nirqan: —Kunanqa asuykamuway, hinaspa much'aykuway, wawáy, nispa.

²⁷Chaymi Jacobqa asuykuspa much'aykurqan, Isaactaq p'achankunaq q'apayninta muskhiykurqan. Hinaspan payta samincharqan: —Kayqa churiypa q'apayninmi, Señor Diospa saminchasqan campo q'apay hinan.

²⁸Diosña hanaq pachamanta parachimpusunki, chakratapas allinta ruruchipusunki, askhata trigotapas vinotapas qosunki.

²⁹Llaqtakuna kamachiykita ruwachunku, hatun suyukuna qanman k'umuykuchunku. Wawqeykikunaq patronnin kay, mamaykiq wawankunataq qanman k'umuykuchunku. Ñakasqa kachun ñakaqniykikuna, saminchasqataq saminchaqniykikuna, nispa.

³⁰Jacobta Isaac saminchayta tukuqtintaq, taytan Isaacpa qayllanmanta Jacob lloqsiqtin hina, wawqen Esauqa kutimurqan animal hap'imusqanmanta.

³¹Paypas q'apashaqta t'impuchillarqantaq, hinaspa taytanman apamuspa nirqan: —Taytáy, tiyarimuy, hinaspa hap'imusqayta mikhuy, saminchaykuwaytaq, nispa.

³²Hinaqtinmi taytan Isaacqa payta nirqan: —¿Pitaq qanri kanki? nispa. Paytaq nirqan: —Phiwi churiyki Esaumi kani, nispa.

³³Chaymi Isaacqa mayta khatatataspa nirqan: —Chayri, ¿pitaq kayman hamurqan, hap'isqa animalta apamurqan, hinaspa qowarqan? Manaraq qan hamushaqtiykitaq lliwta mikhuni. Ñoqan payta saminchani, saminchasqapunin kanqa, nispa.

³⁴Esautaq taytanpa siminta uyarispa, sinchita qaparispa waqaykurqan: —¡Ñoqatapas saminchallawaytaq, taytáy! nispa.

³⁵Hinan payta nirqan: —Wawqeykin llullakuspa hamun, hinaspanmi saminchaykita hap'ikapun, nispa.

³⁶Chaymi Esauqa kutichirqan: —¡Kusatan Jacobta[23] suticharqanku! Iskay kutitañan rantiypi churakun: phiwi-kayniyta hap'ikapun, kunantaq saminchayta chaskin. ¿Manachu saminchata waqaychapuwarqanki? nispa.

³⁷Isaactaq kutichispa nirqan: —Qhawariy, ñoqan Jacobta patronniykita churani, hinallataq llapa wawqenkunatapas kamachinkuna kananpaq payman qoni, trigotapas vinotapas qollanitaqmi. ¡Wawáy, manañan imatapas qoyta atiykiñachu! nispa.

³⁸Esaumi taytanta niykullarqantaq: —Taytáy, ¿manachu huk saminchayki kallantaq? ¡Ñoqatapas saminchallawaytaq, taytáy! nispa. Hinaspan Esauqa kunkayoqta qaparispa waqarqan.

³⁹Hinaqtinmi taytan Isaacqa payta nirqan: —Manan allinkaq hallp'apichu tiyanki, manan parampusunkipaschu.

⁴⁰Espadaykiwantaq kawsanki, wawqeykitataq servinki. Kallpachakuspaykitaqmi kamachisqasuykimanta kacharichikunki, nispa.

⁴¹Esaumi Jacobta cheqnikurqan taytan payta saminchasqan hawa, hinaspan sonqonpi nirqan: Chayamushanñan taytaypa wañupunan p'unchay, chaymantañan ñoqa Jacob wawqeyta wañurqachisaq, nispa.

⁴²Hinan Rebecaman willasqa karqan kurakkaq wawan Esaupa nisqankuna. Chaymi payqa waqyachimurqan sullk'akaq churin Jacobta, hinaspan payta nirqan: —Yaw, Esaú wawqeykin yuyaykushan wañuchinasuykipaq.

⁴³Kunanqa, wawáy, simiyta hap'iy, puririspa ayqekuy Haranpi tiyaq Labán turaypa wasinman.

⁴⁴Hinaspa chaypi paywan tiyamuy as pisi unayllata, wawqeykiq sonqon tiyay kunankama,

⁴⁵qan contra k'arak phiñakuynin thaninankama, pay contra ruwasqaykitapas qonqapunankama. Hinamantañan ñoqa willachimusqayki kutimpunaykipaq. ¿Imanaqtintaq huk p'unchayllapi iskayniykichista chinkaykachisqaykichis? nispa.

⁴⁶Chaymantataq Rebecaqa Isaacta nirqan: —Umaytan wasapawan Het warmikuna. Jacobchus casarakunqa kay suyu mayqen Het warmikunawanpas chayqa, ¿imapaqñataq kawsasaq? nispa.