Read Quechua Cuzco Bible 1988 GÉNESIS 28 Bible Online

GÉNESIS 28 - Quechua Cuzco Bible 1988 bible

GÉNESIS 28

¹Chaymi Isaacqa Jacobta waqyaspa samincharqan, hinaspan kacharqan: —Aman Canaán warmiwanqa casarakunkichu.

²Padan-aramta riy, mamaykiq taytan Betuelpa wasinta, hinaspa chaypi casarakamuy mamaykiq turan Labanpa huknin ususinwan.

³Tukuy-atiyniyoq Diostaq qanta saminchachun, anchata askhayachichun ancha askha kanaykikama.

⁴Abrahampa saminchantaq qanman qosqa kachun, hinallataq mirayniykimanpas, tiyasqayki hallp'ata herenciapi chaskinaykipas, chaytan Diosqa Abrahamman prometerqan, nispa.

⁵Ahinatan Isaacqa Jacobta kacharqan, chaymi payqa Padam-aramta rirqan, Aram runa Betuelpa churin Labanpata, Jacobpa Esaupa maman Rebecaq turanpata.

⁶Esautaq rikurqan taytan imaynatachus Jacobta saminchasqanta, hinaspa Padan-aramta kachasqanta chay llaqta warmiwan casarakamunanpaq, hinallataq payta saminchashaspa khaynata kamachisqantapas: Canaán warmiwanqa aman casarakunkichu, nispa.

⁷Esauqa rikullarqantaqmi Jacobqa taytanta mamanta kasusqanta, hinaspa Padan-aramta ripusqanta.

⁸Kaqllataq Esauqa repararqan Canaán warmikunaqa taytan Isaacpaq mana allin kasqanta.

⁹Hinaspan Esauqa Ismaelpata rispa casarakamurqan Abrahampa churin Ismaelpa ususin Mahalatwan, Nebaiotpa pananwan, huk warminkunapas kashaqtin.

¹⁰Jacobmi Beersebamanta lloqsispa Haranman rirqan.

¹¹Huk cheqasman chayaspataq chaypi puñurqan, inti haykupuqtin. Chayneqpi kashaq rumita hoqarispataq sawnaykukurqan, hinaspan chaypi siriykurqan.

¹²Hinan mosqokuspa huk seqanata rikurqan pampapi sayashaqta, umanpas hanaq pachaman aypashaqta, Diospa angelninkunatapas chayninta wichashaqta uraykamushaqta.

¹³Hinallataq rikurqan Señor Diosqa qayllanpi sayashasqanta, paymi nirqan: Ñoqan Señor Diosqa kani, machulayki Abrahampa Diosnin. Kay puñusqayki hallp'atan qanman qosqayki, hinallataq mirayniykimanpas.

¹⁴Mirayniykin kanqa ñut'u hallp'a hina, hinan teqsimuyuntinman ch'eqeykunqaku, kay pacha lliw ayllukunan “paykunata hina saminchawayku”, ninqaku.

¹⁵Ñoqaqa qanwanmi kashani, mayta riqtiykipas waqaychasqaykin, hinaspan kay hallp'aman pusampusqayki, manan saqerparisqaykichu qanman nisqayta hunt'anaykama, nispa.

¹⁶Jacobtaq puñusqanmanta rikch'arirqan, hinaspan nirqan: Kaypipunin Señor Diosqa kashan ñoqataq chayta mana yacharqanichu, nispa.

¹⁷Chaymi manchakuspa nirqan: ¡Sinchi manchanan kay cheqas! Diospa wasinpunin, hanaq pacha punkupunin, nispa.

¹⁸Hinaspan Jacobqa tutamanta hatarispa sawnakusqan rumita hoqarispa saywata sayachirqan, chay patamantaq aceitewan hich'aykurqan.

¹⁹Hinaspanmi chay cheqasta suticharqan Betelta, [24] ñawpaqqa chay llaqtaq sutinqa Luz nisqan karqanpas.

²⁰Hinaspan Jacobqa prometekurqan: Ñoqawanchus Dios kanqa, kay risqaypipas waqaychawanqa, t'antatapas mikhunaypaq qowanqa, p'achatapas p'achakunaypaq,

²¹taytaypa wasintapas allillan kutipusaq chayqa, Señor Diosmi Diosniy kanqa.

²²Kay saywa rumi churasqaypitaq Diosta yupaychanqaku, lliw imapas qowasqaykimantataq diezmota qosqayki, nispa.