Read Quechua Cuzco Bible 1988 GÉNESIS 29 Bible Online

GÉNESIS 29 - Quechua Cuzco Bible 1988 bible

GÉNESIS 29

¹Hinaspanmi Jacobqa puririspa rirqan inti lloqsimuy cheqaspi tiyaqkunaman.

²Hinan pampapi huk p'uytuta rikurqan, chay qayllapitaq kinsa t'aqa oveja sayarayasharqan, chay p'uytumantan uywakuna ukyaqku. P'uytu punkupin kaq huk hatun rumi,

³chaypi llapa uywa huñukuqtintaq, rumita p'uktiqaqku, hinaspan ovejata unuchiqku, chaymantataq maypichus kasqanman rumita p'uktiykapuqku.

⁴Jacobmi paykunata nirqan: —Wawqeykuna, ¿maymantan kankichis? nispa. Paykunataq kutichirqanku: —Haranmantan kayku, nispa.

⁵Hinan Jacobqa paykunata nirqan: —¿Reqsinkichischu Nakorpa churin Labanta? nispa. Paykunataq nirqanku: —Arí, reqsiykun, nispa.

⁶Chaymi Jacobqa paykunata nirqan: —¿Allillanchu kashan? nispa. Paykunataq nirqanku: —Allillanmi, haqayqa ususin Raquel hamushan ovejakunantin, nispa.

⁷Jacobtaq nirqan: —P'unchayraqmi kashan, manaraqmi uywa huñuna horasraqchu, ovejakunataqa unuchispachá michimuwaqchisraq, nispa.

⁸Chaymi paykunaqa kutichirqanku: —Manan unuchiykumanchu llapa uywa huñukunankama, p'uytu punkumantapas rumita p'uktiqanankukama, nispa.

⁹Jacobqa paykunawan rimashanankamataq, Raquelqa chayamurqan taytanpa ovejan t'aqawan, Raquelqa michiqmi karqan.

¹⁰Jacobtaq priman Raquelta tion Labanpa ovejankunatawan rikuspa qayllaykurqan, hinaspan rumita p'uktiqarqan p'uytu punkumanta, hinaspataq unuchirqan tion Labanpa uywa t'aqanta.

¹¹Jacobmi Raquelta much'aykurqan, hinaspanmi waqarqan.

¹²Raquelmanmi willarqan: —Ñoqaqa taytaykiq ayllunmi kani, Rebecaq churin, nispa. Hinan payqa phawarispa taytanman willamurqan.

¹³Ahinaqa Labanmi pananpa churin Jacobmanta uyarispa chaskiykuq phawarirqan, hinaspan oqllaykuspa much'aykurqan, hinaspa wasinman pusamurqan. Paytaq Labanman willarqan imaymanata.

¹⁴Labantaq payta nirqan: —Tulluypunin aychaypunin kanki, nispa. Labanwantaq tiyarqan killantinña.

¹⁵Chaymi Labanqa Jacobta nirqan: —¿Wawqey kaspaykichu yanqalla serviwanki? Niway, ¿hayk'atan pagasqayki? nispa.

¹⁶Labanmi iskay ususiyoq karqan, kurakkaqpa sutinmi Lea, sullk'akaqpa sutintaq Raquel.

¹⁷Lean karqan ch'aska ñawi, Raqueltaq munay siklla karqan.

¹⁸Jacobmi Raquelta munakurqan, chaymi nirqan: —Ñoqan qanchis watata servisqayki sullk'akaq ususiyki Raquelrayku, nispa.

¹⁹Hinan Labanqa kutichirqan: —Allinmi qanman qopusqayki, ama wak qharimanqa qosaqchu, ñoqawan qhepakuy, nispa.

²⁰Chhaynatan Jacobqa Raquelrayku qanchis watata servirqan, pisi p'unchaykuna hinallataq paypaqqa karqan, Raquelta munakusqanrayku.

²¹Hinaspanmi Jacobqa Labanta nirqan: —Warmiyta qopuway paywan tiyakapunaypaq, ñan tiempoy hunt'akunña, nispa.

²²Hinaqtinmi Labanqa huñuykurqan chay llaqtamasin llapa qharikunata, hinaspan casarakuy mikhunata haywakurqan.

²³Tutataq ichaqa ususin Leata pusamurqan, chaymi Jacobqa Leawan puñurqan.

²⁴Labantaq Zilpa kamachinta qorqan ususin Leaman kamachinpaq.

²⁵Tutamantataq yacharqan Lea kasqanta, hinan Jacobqa Labanta nirqan: —¿Imatataq kaytari ruwawanki? ¿Manachu Raquelrayku servirqayki? ¿Imanaqtintaq q'otuwanki? nispa.

²⁶Labantaq kutichirqan: —Manan kay llaqtaykupiqa chay hinatachu ruwayku, manan sullk'akaqtaqa ñawpaqta qoykuchu kurakkaqtataq qhepataqa.

²⁷Kay semanata hunt'ay, chaymi hukkaqtawan qosqayki, qanchis watatawan serviwanki chayqa, nispa.

²⁸Ahinatan Jacobqa ruwarqan, chay semanatawan hunt'arqan, hinan Labanqa payman qorqan ususin Raquelta warmin kananpaq.

²⁹Labantaq Bilha kamachinta qorqan ususin Raquelman kamachinpaq.

³⁰Jacobqa Raquelwanpas puñullarqantaq, hinaspan Leamantapas astawan payta munakurqan, Labantataq servirqan qanchis watatawanraq.

³¹Señor Diostaq rikurqan Leaq pisichasqa kasqanta, chaymi payman wawakunata qorqan, Raqueltaq ichaqa mana wachakuq karqan.

³²Lean wiksallikurqan, hinaspan huk wawata wachakurqan, suticharqantaq Rubenta[25], nirqanmi: Señor Diosmi llakikusqayta qhawariwan, chaymi kunanqa qosay munakuwanqa, nispa.

³³Huktawan wiksallikullarqantaq, hinaspan huk wawata wachakurqan, nirqantaq: Señor Diosqa pisichasqa kasqayta uyariwaspanmi kaytapas qollawantaq, nispa. Suticharqantaq Simeonta.[26]

³⁴Huktawan wiksallikullarqantaq, hinaspan huk wawata wachakurqan, nirqantaq: Kay kutiqa qosayqa ñoqawan hukllachakunqa, kinsa wawata paypaq wachakusqayrayku, nispa, chaymi suticharqan Levita.[27]

³⁵Huktawan wiksallikullarqantaq, hinaspan huk wawata wachakurqan, nirqantaq: Kay kutiqa Señor Diosta hatunchasaq, nispa, chaymi suticharqan Judata[28]. Hinaspataq mana wachakapurqanchu.