Read Quechua Cuzco Bible 1988 GÉNESIS 30 Bible Online

GÉNESIS 30 - Quechua Cuzco Bible 1988 bible

GÉNESIS 30

¹Raquelmi Jacobpaq wawakunata mana wachakuspa ñañanta envidiakurqan, hinaspanmi Jacobta nirqan: —Wawata qoway, mana chayqa wañukapusaq, nispa.

²Chaymi Jacobqa Raquelta phiñarikuspan nirqan: —Diospa munayninmi mana wawayoq kanaykiqa, ¿ñoqari pitaq kani? nispa.

³Raqueltaq nirqan: —Kayqa kamachiy Bilha, paywan puñuy. Paytaq wachapuwanqa, chaymi ñoqaqpas paypi wawaykuna kallanqataq, nispa.

⁴Ahinatan payman qorqan kamachin Bilhata warmin kananpaq, chaymi Jacobqa paywan tiyarqan.

⁵Bilhan wiksallikurqan, hinaspanmi Jacobpaq huk churita wachakurqan.

⁶Hinan Raquelqa nirqan: Diosmi chaninchaykapuwan, kunkaytapas uyarillantaq, hinaspanmi huk wawata qowan, nispa. Chaymi suticharqan Danta.[29]

⁷Huk kutitawantaq Bilhaqa wiksallikurqan, hinaspan Jacobpaq iskaykaq wawata wachakurqan.

⁸Raqueltaq nirqan: Sinchitan ñañaywan qhawaykunakuni, hinaspan atipani, nispa. Suticharqantaq Neftalita.[30]

⁹Leataq mana wachakapuspa, kamachin Zilpata Jacobman pusarqan warmin kananpaq.

¹⁰Zilpataq huk wawata Jacobpaq wachakurqan.

¹¹Hinan Leaqa nirqan: ¡Ima samin! nispa. Suticharqantaq Gadta.[31]

¹²Hinallataq Zilpaqa huk wawatawan Jacobpaq wachakurqan.

¹³Hinan Leaqa nirqan: ¡Kusikuymi ñoqapaq! Warmikunan: Kusisamiyoqmi, niwanqaku, nispa. Suticharqantaq Aserta.[32]

¹⁴Rubenmi trigo ichhuy tiempopi campota rirqan, mandragorata[33] tarimuspataq maman Leaman apamurqan. Hinan Raquelqa Leata nirqan: —Ama hinachu kay, wawaykiq mandragoranta qoriway, nispa.

¹⁵Paytaq kutichirqan: —¿Hina-hinallachu qosayta hap'ikusqaykiri, wawaypa mandragoranta apanaykipaq? nispa. Hinaqtinmi Raquelqa nirqan: —Kay tutan Jacobqa qanwan puñunqa wawaykiq mandragoranmanta, nispa.

¹⁶Tardenta campomanta Jacob kutimpushaqtintaq Leaqa payman lloqsirqan, hinaspan nirqan: —Ñoqawanmi puñunki, wawaypa mandragoranwanmi mink'akuyki, nispa. Hinan chay tuta paywan puñurqan.

¹⁷Diostaq Leata uyarirqan, chaymi wiksallikuspa phisqakaq wawata Jacobpaq wachakurqan.

¹⁸Hinaspan Leaqa nirqan: Diosmi qoykapuwan, warmi kamachiyta qosayman qosqayrayku, nispa. Chaymi suticharqan Isakarta. [34]

¹⁹Chay qhepatataq Leaqa huktawan wiksallikuspa Jacobpaq soqtakaq wawata wachakurqan.

²⁰Hinaspanmi Leaqa nirqan: Diosmi allin regalota qowan, kunanqa qosaymi sumaqta rikuwanqa, paypaq soqta wawataña wachakusqayrayku, nispa. Suticharqantaq Zabulonta.[35]

²¹Chay qhepatataq huk warmi wawata wachakurqan, suticharqantaq Dinata.

²²Chaymantataq Diosqa Raquelta yuyarispa uyarirqan, hinaspan payman wawakunata qorqan.

²³Wiksallikuspan huk wawata wachakurqan, nirqantaq: Diosmi p'enqakuyniyta chinkachin.

²⁴Huk wawatawan Señor Diosqa yapaykuwachun, nispa. Chaymi Joseta[36] suticharqan.

²⁵Raquelqa Joseta wachakuqtintaq Jacobqa Labanta nirqan: —Kachapuway, hinaspa ripusaq tiyanay hallp'ata.

²⁶Qopuway warmiykunata wawaykunatawan, paykunaraykun servirqayki, hinaspa kachapuway. Qanqa yachankiñan riki imaynatachus servirqayki chayta, nispa.

²⁷Labantaq payman kutichirqan: —Kayllata uyariykuway, watuqwanmi yachani Señor Diosqa qan kaqtiyki saminchawashasqanta.

²⁸Willaway hayk'atachus gananaykita, hinan ñoqa qopusqayki, nispa.

²⁹Paytaq kutichirqan: —Yachankin imaynatachus qan servisqayta, imaynatachus uywaykitapas rikusqayta.

³⁰Manaraq hamushaqtiyqa pisillan kasqa, askhatataq miraykapun, Señor Diosmi saminchasunki chayamusqaywan. Kunanri, ¿hayk'aqtaq familiaypaqpas llank'ayman? nispa.

³¹Labantaq nirqan: —¿Imatataq qosqayki? nispa. Jacobtaq kutichirqan: —Ama imatapas qowaychu. Huktawanmi ovejaykikunata michisaq ñoqawan kayta rimanakuqtiykiqa:

³²Ñoqan kunan p'unchay uywayki ukhunta pasasaq, llapa yana malta ovejakunata t'aqaspa, hinallataq malta cabrakunamantapas alqakunata ch'eqchikunata t'aqaspa. Chaytaq pagoy kanqa.

³³Qhepaman pagoyta qhawaq hamuspaykin chanin kasqayta yachanki: mana mayqen cabrapas ch'eqchichu otaq alqachu kanqa, manallataq mayqen ovejapas yanachu kanqa chayqa, suwakusqay kanqa, nispa.

³⁴Hinaqtinmi Labanqa nirqan: —Allinmi, nisqayki hina kachun, nispa.

³⁵Ichaqa chay p'unchaypachan Labanqa t'aqarqan alqa orqo cabrakunata wachu-wachu colorniyoqkunatawan, hinallataq llapa alqa ch'eqchi cabrakunatapas, llapa huk chhikan yuraq alqakunata, hinallataq ovejakunamantapas llapa yanakunata, hinaspanmi wawankunawan qatichirqan.

³⁶Hinaspataq chay t'aqantin Labanqa kinsa p'unchay puriyman Jacobmanta karunchakapurqan. Jacobtaq michishallarqan Labanpa wakin ovejanta.

³⁷Paymi hap'irqan q'omer kiswar, almendro, castaño k'aspikunata, hinaspan chaykunata qaranarqan yuraq wachu-wachuta, chay hinapi k'aspikunaq yuraqninta rikhurichirqan.

³⁸Chay qaranasqa k'aspikunatataq churarqan uywakunaq ñawpaqenman, unu ukyana yarqhakunapi, chaypin orqowan urwakuqku.

³⁹Chay hinapin cabrakunaqa k'aspiq ñawpaqenpi chichuyakuqku, hinaspanmi wachaqku wachu-wachu colorniyoq orqo cabrakunata, ch'eqchikunata, alqakunata ima.

⁴⁰Jacobtaq cabrakunamanta borregokunata t'aqarqan, hinaspan Labanpa t'aqan chimpapi huñurqan, wachu-wachu colorniyoqkunaman yanakunaman qhawashaqta. Chay hinatan t'aqantaqa askhayachikusharqan, manataq Labanpa ovejankunaman huñurqanchu.

⁴¹Sapa kuti wirakaq uywakuna urwakuqtintaq, Jacobqa uywakunaq ñawpaqenman k'aspikunata churarqan uywa ukyanakunapi, k'aspiq ñawpaqenpi chichuyanankupaq.

⁴²Tullu uywakuna hamuqtintaq ichaqa mana chay k'aspikunata churarqanchu. Ahinapin Labanpaq karqan tullukuna, Jacobpaqtaq wirakuna.

⁴³Chay hinapin Jacobqa anchata qhapaqyarqan, karqantaq askha ovejankuna, camellonkuna, asnonkuna ima, hinallataq warmi kamachinkuna qhari kamachinkunapas.