Read Quechua Cuzco Bible 1988 GÉNESIS 31 Bible Online

GÉNESIS 31 - Quechua Cuzco Bible 1988 bible

GÉNESIS 31

¹Jacobtaq uyarirqan Labanpa wawankunaq rimasqanta, paykunan nirqanku: Jacobmi hap'in taytanchispa lliw kaqninta, taytanchispa kaqninwantaq kay hinata qhapaqyaykun, nispa.

²Qhawallarqantaq Jacobqa Labanta, hinaspa rikurqan manaña paypaqqa ñawpa hinañachu kapusqanta.

³Señor Diospas Jacobta nillarqantaq: Kutipuy tayta-mamaykiq hallp'anta, aylluykiqta, ñoqataq qanwan kasaq, nispa.

⁴Hinan Jacobqa kachaspa Raquelta Leata waqyachimurqan ovejankunaq kasqan campoman,

⁵hinaspanmi paykunata nirqan: —Taytaykichistan manaña ñawpa hinachu ñoqapaq kapusqanta rikuni, taytaypa Diosninmi ichaqa ñoqawan kashallanqapuni.

⁶Qankunan yachankichis tukuy kallpaywan taytaykichista servisqayta,

⁷paytaq ichaqa q'otuwarqan, hinaspa sapa kutilla pagoywan pukllakurqan, Diosmi ichaqa payta hark'arqan mana allinta ruwawananmanta.

⁸Paymi kay hinata nirqan: Alqakunan pagoyki kanqa, nispa, chaymi llapa cabra alqata wacharqan. Nillarqantaq kay hinata: Wachu-wachu colorniyoqkunan pagoyki kanqa, nispa, chaymi llapa cabra wachu-wachu colorniyoqkunata wacharqan.

⁹Ahinatan Diosqa taytaykichispa uywankunata qechurqan, hinaspa ñoqaman qowarqan.

¹⁰Uywakuna urwakusqan tiempon mosqoypi rikurqani, chinakunata urwaq orqokunan kasqa wachu-wachu colorniyoq, alqakuna ch'eqchikuna ima.

¹¹Diospa angelnintaq mosqoypi niwarqan: Jacob, nispa. Ñoqataq nirqani: ¿Ima ninkin? nispa.

¹²Paytaq nirqan: Qhawariy, hinaspa rikunki chinakunata urwaq llapa orqokuna wachu-wachu colorniyoqkuna, alqakuna, ch'eqchikuna kasqanta, ñoqan rikuni Labanpa imaymanata ruwasqasuykita.

¹³Ñoqan Betelpi rikhuriqniyki Dios kani, chaypin rumita aceitewan hich'aykurqanki, chaypin prometekuwarqankipas. Kunanqa puririy, hinaspa kay hallp'amanta lloqsillayña, nacesqayki hallp'amantaq kutipuy, nispa, nispan.

¹⁴Raquelwan Leawantaq kutichispa payta nirqanku: —Taytaykuq wasinpiqa manan ima herenciaykupas kanñachu.

¹⁵Wak warmikunata hinañan rikuwanku. Qhatupuwarqanku, hinaspa precioykutapas llapantaraqtaq tukurqon.

¹⁶Taytaykumanta Diospa qechusqan lliw qhapaq-kayqa ñoqanchispan wawanchiskunaqpiwanmi. Kunantaq ruway imatachus Diospa nisqasuykita, nispa.

¹⁷Hinaqtinmi Jacobqa wakichikurqan Canaán suyupi tiyaq taytan Isaacpata kutipunanpaq, hinaspan churinkunata warminkunata camellokunaman sillachirqan. Ñantan puririrqan llapan uywantin Padan-arampi tukuy tarisqankunantin.

¹⁸

¹⁹Labantaq ichaqa rirqan ovejankunata rutumuq, Raqueltaq chaykama taytanpa idolonkunata suwakamurqan.

²⁰Chay hinatan Jacobqa q'oturqan Aram runa Labanta, ripunanta mana willakuspa.

²¹Lliw imaymanakunantinmi ayqerqan. Puririspataq Eufrates mayuta chimparqan, hinaspan Galaad orqo-orqoneqman rirqan.

²²Kinsakaq p'unchaypitaq Labanqa yacharqan Jacobpa ayqekusqanta.

²³Hinaqtinmi Labanqa ayllunkunata pusarikuspa Jacobpa qhepanta rirqan qanchis p'unchay puriyta, hinaspan Galaad orqo-orqoman ayparqan.

²⁴Diostaq ichaqa mosqoypi chay tuta Aram runa Labanman rikhurispa nirqan: —Paqtataq Jacobta k'arak simiwan rimapayawaq, nispa.

²⁵Labanqa Galaad orqo-orqomanmi Jacobman ayparqan, chaypin Jacobqa karpakusqa, chayllapitaqmi Labanpas ayllunkunawan karpakurqan.

²⁶Labantaq Jacobta nirqan: —¿Imanarqankitaq? ¿Imaraykutaq q'otuwarqanki? ¡Ususiykunatapas hatun maqanakuypi hap'isqata hina apamusqanki!

²⁷¿Imaraykutaq ayqekunaykipaq pakakurqanki, hinaspa q'otuwarqanki, manataq willawarqankichu? Ñoqaqa qanta kusisqa, takiwan, tinyawan, arpawan kacharpariykiman karqan.

²⁸Manan nietoykunallatapas ususiykunallatapas much'aykachiwarqankichu. Chaytaqa mana yuyayniyoq hinan ruwanki.

²⁹Makiypin kashan qankunata mana allinta ruwarqonaypaq, ichaqa taytaykiq Diosninmi tuta niwan: Paqtataq Jacobta k'arak simiwan rimapayawaq, nispa.

³⁰Taytaykiq wasinman sonqoyki aysakuqtin ripunki chayqa, ¿imapaqtaq diosniykunata suwakamuwarqanki? nispa.

³¹Jacobtaq Labanman kutichirqan: —Manchakurqanin, ususiykikunata qechuwanaykipaqmi yuyarqani.

³²Mayqenpichus diosniykikunata tarinki chayqa, ama kawsachunchu. Wawqenchiskuna rikushaqtin reqsikapuy kaqniyki hap'isqayta, hinaspa apakapuy, nispa. Jacobqa manan yacharqanchu Raquelpa chaykunata suwakamusqanta.

³³Labanmi haykurqan Jacobpa karpanman, Leaq karpanman, iskaynin warmi kamachiq karpanmanwan, manataq chaykunata tarirqanchu. Leaq karpanmanta lloqsispataq Raquelpa karpanman haykurqan.

³⁴Raqueltaq ichaqa idolokunata hap'ispa churaykurqan camello alforjaman, hinaspan chaykuna patapi tiyaykurqan. Labantaq karpata lliwta maskharqan, manataq chaykunata tarirqanchu.

³⁵Paytaq taytanta nirqan: —Ama taytay phiñakuychu mana qayllaykipi sayarisqayrayku, killaywanmi kashani, nispa. Paytaq maskharqan, manataq idolokunata tarirqanchu.

³⁶Hinan Jacobqa phiñasqa Labanta phiñarirqan: —¿Iman huchallikusqay? ¿Iman huchay, sinchi phiñasqa qatiqniy hamuwanaykipaq?

³⁷Tukuy imaymanaytan maskhanki riki, ¿imatataq tarinki lliw kaqniykikunata? Wawqeykunaq wawqeykikunaq ñawpaqenpi churaykuy, hinaspa mayqenninchistapas huchachawasun.

³⁸Kay iskay chunka watan qanwan karqani, ovejaykikunapas cabraykikunapas manan hayk'aqpas sullurqanchu, manan ñoqapas huk borregollaykitapas mikhurqanichu.

³⁹Phiña animalkunaq hap'isqanta manan hayk'aqpas apamurqaykichu, ñoqan sayachipurqayki, p'unchayña tutaña suwasqatapas pagachikuwarqankin.

⁴⁰P'unchaymi ruphay kankawarqan, tutataq chiri atiwarqan, manan puñuypas chayawarqanchu.

⁴¹Chay hinan iskay chunka watantin wasiykipi karqani. Chunka tawayoq watata servirqayki iskaynin ususiykirayku, soqta watatataq uywaykirayku, sapa kutillataq pagoywan pukllakurqanki.

⁴²Taytaypa Diosninchus, Abrahampa Diosnin, Isaacpa Manchakunan mana ñoqawanchu kanman karqan chayqa, kunan mana imayoqtan kachapuwankiman karqan, chaypas Diosmi rikurqan muchusqayta llank'asqaytapas, chaymi ch'isi tuta k'amirqasunki, nispa.

⁴³Labantaq Jacobman kutichirqan: —Ususiykikunaqa ususiykunan, churiykikunapas churiykunan, ovejaykikunapas ovejaykunan, lliw ima hayk'a rikusqaykipas ñoqaqmi. Manan imanaymanpaschu kay ususiykunata, wawakunatapas.

⁴⁴Chay hinaqa kunan qanwan ñoqawan rimanakusun, chaytaq iskayninchismanta willakuq kachun, nispa.

⁴⁵Hinaqtinmi Jacobqa rumita hoqarispa saywata sayachirqan.

⁴⁶Hinaspan wawqenkunata nirqan: —Rumita pallaychis, nispa. Hinan rumita pallaspa soqyata tawqarqanku, hinaspan chaypi mikhurqanku chay soqya tawqa qayllapi.

⁴⁷Labán suticharqan Jegar Sahadutata[37], Jacobtaq suticharqan Galaadta[38].

⁴⁸Labanmi nirqan: —Kay soqya tawqaqa kunan iskayninchismanta willakuqmi, nispa. Chaymi Galaad sutichasqa karqan.

⁴⁹Hinallataq Mizpa[39] sutichasqa karqan, nirqanmi: —Qantawan ñoqatawan Señor Diosqa qhawachun, t'aqarinakuqtinchis.

⁵⁰Ususiykunata ñak'arichinki, otaq ususiykuna patamanta huk warmikunayoq kanki chayqa, manaña pipas qhawaqninchis kanchu chaypas, Diosmi iskayninchismanta willakuqqa, nispa.

⁵¹Labanqa nillarqantaq Jacobta: —Kayqa kay soqya tawqa, kayqa kay saywa rumi qanwan ñoqawan churasqay.

⁵²Willakuq kaykuna kachun, manan mana allinninchispaq pasanakusunchu.

⁵³Mana chayqa machulayki Abrahampa Diosnin machulay Nakorpa Diosnin mayqenninchistapas huchachawasun, nispa. Jacobtaq jurarqan Isaac taytanpa Manchakunan sutipi.

⁵⁴Hinaspanmi Jacobqa sacrificiokunata Diosman orqopi haywarqan, hinaspataq wawqenkunata waqyarqan chayta mikhunankupaq. Chaymi mikhurqanku, chay tutataq orqopi puñurqanku.

⁵⁵Tutamantataq Labanqa sayarirqan, hinaspanmi nietonkunata ususinkunata much'aykuspa samincharqan. Hinamantataq puririspa tiyananman kutipurqan.