Read Quechua Cuzco Bible 1988 GÉNESIS 32 Bible Online

GÉNESIS 32 - Quechua Cuzco Bible 1988 bible

GÉNESIS 32

¹Jacobtaq yapamanta puririrqan, hinan Diospa angelninkuna payta tarirqanku.

²Chaykunata rikuspataq Jacobqa nirqan: —¡Diospa ejercitonmi kayqa! nispa. Chayneqtataq suticharqan Mahanaimta[40].

³Hinaspanmi Jacobqa willaqkunata ñawpachirqan wawqen Esauman, Edom suyu Seir hallp'aman:

⁴Kay hinatan kamachiyki Jacobqa nin: Labanwanmi tiyamurqani, kunankamataq qhepakamuni.

⁵Kapuwanmi wakaykuna, asnoykuna, ovejaykuna, qhari kamachiykunapas, warmi kamachiykunapas. Wiraqochayman willaykachimunaypaqtaq kachamuni sumaqta qhawariwanaykipaq, nispa nimunankupaq.

⁶Kachasqakunataq Jacobman kutirqanku: Chayaykun wawqeyki Esauman, paypas hamushanmi chaskinasuykipaq, tawa pachak runa pusantin, nispa.

⁷Hinan Jacobqa sinchita mancharikurqan llakikurqantaq, hinaspan runankunata iskayman t'aqarqan, hinallataq ovejakunatapas, wakakunatapas, camellokunatapas t'aqarqan.

⁸Nirqanmi: Huk t'aqa contra Esaú hamunqa hinaspa phawaykunqa chayqa, huknin t'aqa ayqenqa, nispa.

⁹Hinaspanmi Jacobqa mañakurqan: Abraham machulaypa Diosnin, Isaac taytaypa Diosnin, Señor Diosníy, qanmi niwarqanki: Kutipuy hallp'aykiman, aylluykiman, ñoqataq qhawarisqayki, nispa.

¹⁰Qanmi kamachiykita lliwpi khuyapayawarqanki, lliwpitaq ñoqapaq hunt'arqankipas, mana chaypaq hinachu kashaqtiypas. Tawnallayoqmi kay Jordán mayuta chimparqani, kunantaq iskay t'aqayoq kapuni.

¹¹Kunan qespichiway wawqey Esaumanta, paytan manchakuni, paqtan hamuwanman hinaspa wañuchiwanman wawaykunatawan warmiykunatawan.

¹²Qanmi niwarqanki: Ñoqan qhawarisqayki, mirayniykitaq mama qocha pata aqo hina kanqa, mana yupay atiy askha kasqanrayku, nispayki, nispa.

¹³Chay tutataq chaypi samakurqan, hinaspan kaqninmanta t'aqarqan wawqen Esaupaq sumaq sonqota:

¹⁴iskay pachak china cabrata, iskay chunka orqo cabratawan, iskay pachak ovejata, iskay chunka borregotawan,

¹⁵kinsa chunka china camellokunata qholla uñankunantinta, tawa chunka wakata chunka torillotawan, iskay chunka china asnota chunka malta orqo asnotawan.

¹⁶Hinaspan kamachinkunawan qatichirqan sapanka tropata t'aqa-t'aqata. Nirqantaq: —Ñawpaychis, hinaspa sapa t'aqata qatiychis karu-karu qhepata, nispa.

¹⁷Ñawpaqkaqtataq kamachirqan: —Wawqey Esauwanchus tupanki, hinaspa tapusunki: —¿Piqpan kanki? ¿Maytan rishanki? ¿Pipaqmi kayta qatishanki? nispa, chayqa,

¹⁸ninki: —Kamachiyki Jacobpa sumaq sonqonmi, wiraqochay Esaumanmi apachishan, paypas qhepaykutan hamushan, nispayki, nispa.

¹⁹Kachallarqantaq iskaykaqtapas, kinsakaqtapas, chay t'aqakuna qhepata hayk'an riqtapas: —Kaqtakama Esauman ninkichis, paywan tupaspaykichisqa, nispa.

²⁰Nillankichistaq: —Kamachiyki Jacobmi qhepaykuta hamushan, nispaykichis, nispa. Jacobqa sonqonpin nirqan: Sumaq sonqota ñawpachispaymi sonqonta llamp'uyachisaq, hinaspañan paywan tupasaq, yaqapaschari payqa chaskiwanqa, nispa.

²¹Chaymi sumaq sonqota ñawpachirqan. Paytaq chay tuta puñurqan kaqninkunantin.

²²Chay tutataq sayarispa pusarikurqan iskaynin warmintapas, iskaynin kamachin warmitapas, chunka hukniyoq wawantapas, hinaspanmi Jabok mayu chimpanata paykunata lliw kaqnintinta chimpachirqan.

²⁴Ahinapi Jacobqa sapallan qhepakurqan. Paywantaq pacha paqariqta huk qhari hap'inakurqan.

²⁵Qhariqa mana payta atipayta atispataq tupaykurqan teqni muyuna tullu cheqaspi, hinan Jacobpa teqni tullunqa phawarqorqan paywan hap'inakushaqtin.

²⁶Hinan chay qhariqa nirqan: —Kachariway, pachan paqarinña, nispa. Jacobtaq payman kutichirqan: —Manan kacharisqaykichu manachus saminchawanki chayqa, nispa.

²⁷Chay qharitaq payta nirqan: —¿Iman sutiyki? nispa. Paytaq kutichirqan: —Jacobmi, nispa.

²⁸Chay qharitaq payta nirqan: Manan Jacobñachu sutiyki kanqa, aswanpas Israelmi[41] kapunqa, Dioswanmi hap'inakunki riki, hinallataq runakunawanpas, atiparqankitaq, nispa.

²⁹Hinaqtinmi Jacobqa payta tapurqan: —Willaway sutiykita, nispa. Chay qharitaq kutichirqan: —¿Imapaqtaq sutiyta tapuwanki? nispa. Hinaspanmi chaypi samincharqan.

³⁰Chaymi Jacobqa chayneqta suticharqan Penielta[42], nirqanmi: Uya puran Dioswan tupani, kawsashaniraqtaq kanpas, nispa.

³¹Penielta pasaqtinñataq inti lloqsimurqan, wist'uspa-wist'uspataq purirqan.

³²Chaymi Israel runakunaqa chay p'unchaymanta mana mikhunkuchu chay q'estisqa hank'uta, Jacobta chay q'estisqa hank'unpi tupaykusqanrayku. Chay hank'un teqni tulluq muyunanpi kashan.