Read Quechua Cuzco Bible 1988 GÉNESIS 34 Bible Online

GÉNESIS 34 - Quechua Cuzco Bible 1988 bible

GÉNESIS 34

¹Leaq ususin Dinan lloqsirqan chay llaqta sipaskunawan tupaq, paytan Leaqa wachakurqan Jacobpaq.

²Hinan chay suyupi kamachikuq Hiv runa Hamorpa churin Shehemqa Dinata rikurqan, hinaspan payta hap'ispa violarqan.

³Dinawanmi sonqollirukurqan, hinaspan sipasta munakurqan, sumaqtataq rimapayarqanpas.

⁴Hinamanta Shehemqa taytan Hamorta nirqan: —Chay sipasta casarakunaypaq horqompuway, nispa.

⁵Jacobtaq yacharqan ususin Dinata Shehempa violasqanta, churinkuna uywawan campopi kaqtintaq Jacobqa ch'inlla karqan paykunaq hamunankama.

⁶Shehempa taytan Hamortaq Jacobpata rirqan payta rimaykuq.

⁷Jacobpa churinkunataq chayta yachaspa campomanta hamurqanku, hinaspan paykunaqa llakikuspa mayta phiñakurqanku, Jacobpa ususinwan puñuykuspa Shehem p'enqata Israelpaq ruwasqanrayku. Manan chaytaqa ruwanachu karqan.

⁸Hinan Hamorqa paykunata nirqan: —Shehem churiymi ususiykichiswan sonqollikun, valekuykichis, paywan casarachipusunchis.

⁹Hinaspa ñoqaykuwan aylluchakuychis, ususiykichiswan casarachiwayku, ñoqaykuqwanpas casarakullaychistaq.

¹⁰Ñoqaykuwan tiyaychis, may munasqaykichista purikuychis, chaypi tiyaychis qhatuychis, hallp'atapas hap'ikuychis, nispa.

¹¹Shehempas nillarqantaq Dinaq taytanta turankunatawan: —Ñoqata allinta rikuwaychis, qosqaykichismi imatachus niwasqaykichista.

¹²Ima qonatapas askha sumaq sonqotawan mañawaychis, ñoqataq qosqaykichis hayk'an niwasqaykichista, sipasllata qowaychis casarakunaypaq, nispa.

¹³Jacobpa churinkunataq ichaqa llullallawan kutichirqanku Shehemman taytan Hamormanwan, pananku Dinata violasqanrayku.

¹⁴Hinaspan paykunata nirqanku: —Manan kaytaqa ruwaykumanchu, manan panaykutaqa qoykikumanchu qhari-kaynin mana señalasqa runamanqa, ñoqayku ukhupiqa p'enqaymi chayqa.

¹⁵Chaypas kayllawan sonqochasqaykiku: —Ñoqayku hina kankichis, llapa qhari señalakunkichis chayqa.

¹⁶Hinaqa ususiykuta qosqaykiku, ñoqaykupas ususiykichiswan casarakusaqku, hinaspa qankunawan tiyasaqku, huk llaqtallataq kasunchis.

¹⁷Manataq uyakuwankikuchu señalachikunaykichispaq chayqa, ususiykuta pusakapusaqku hinaspa ripusaqku, nispa.

¹⁸Nisqankutataq allinpaq hap'irqan Hamorpas churin Shehempas.

¹⁹Hinaspanmi waynaqa usqhaylla señalakurqan, Jacobpa ususinta munakusqanrayku. Payqa aswan reqsisqan karqan taytanpa lliw wasi ayllunpi.

²⁰Hinaspan Hamorpas churin Shehempas llaqtanku punkuman rispa llaqtamasinku qharikunata rimapayarqanku:

²¹—Ñoqanchispaq chay qharikunaqa sumaqmi, kay suyupi tiyakuchunku qhatukuchunku, kayqa hallp'aqa paykunapaqpas hatunraqmi. Ñoqanchis casarakusunchis ususinkuwan, paykunapas ususinchiswan.

²²Ichaqa, paykunaqa ñoqanchiswan ch'ulla llaqtalla tiyanankupaq uyakunqaku kayraykulla: llapa qhari señalakuqtinchis imaynan paykunapas señalasqa kanku hina.

²³Llapa kaqninkupas llapa uywankupas, ¿manachu kaqnillanchistaq kanqa? Ñoqanchisqa uyakullasunchis paykunaman, hinan ñoqanchiswan tiyanqaku, nispa.

²⁴Hinaqtinmi Hamorta churin Shehemtawan kasurqanku llaqta punkuman llapa lloqsiqkuna, hinaspan señalarqanku llapa qharita.

²⁵Kinsakaq p'unchaypitaq ichaqa paykuna sinchi nanaywan kashaqtinku, Jacobpa iskay churinkuna Dinaq turan Simeonwan Leviwan sapanka espadata hap'irqanku, mana reparashaqtinku llaqta contra rirqanku, hinaspataq llapa qharita wañuchirqanku.

²⁶Hamortapas churin Shehemtapas espadawan wañuchirqanku, hinaspan Shehempa wasinmanta Dinata pusarikuspa ripurqanku.

²⁷Hinaspataq Jacobpa hukkaq churinkunaqa wañusqakunaqta rispanku llaqtata llat'anarqanku panankuta violasqankumanta.

²⁸Qatirikurqanku ovejankuta, wakankuta, asnonkuta, llaqtapi kaqtapas campopi kaqtapas,

²⁹lliw kaqninkutawan. Presota aparqanku llapa wawankuta hinallataq warmikunatapas, wasipi ima hayk'akaqtapas suwakurqanku.

³⁰Chaymi Jacobqa Simeontawan Levitawan nirqan: —Hawan ukhun sonqoyoqtan ruwawankichis, kay suyu Canaán runawan Fares runawan cheqnichiwaspaykichis. Pisi runallayoq kashaqtiyqa, contraypichá huñukunqaku hinaspa maqawanqaku, hinan ñoqaqa aylluypiwan wañuchisqa kasaq, nispa.

³¹Paykunataq ichaqa kutichirqanku: —¿Payri panaykuta huk qhellipi puriq warmita hinachu rikunman karqan? nispa.