Read Quechua Cuzco Bible 1988 GÉNESIS 35 Bible Online

GÉNESIS 35 - Quechua Cuzco Bible 1988 bible

GÉNESIS 35

¹Diosmi Jacobta nirqan: —Wichallayña Betelta, hinaspa chaypi tiyamuy. Chaypitaq altarta perqampuway wawqeyki Esaumanta ayqeshaqtiyki rikhurisuqniyki Diospaq, nispa.

²Hinaqtinmi Jacobqa ayllunta lliw paywan kaqkunatapas nirqan: —Hap'isqaykichis wak dioskunata wikch'uychis, hinaspa ch'uyanchakuychis, huk p'achawan ima churakuychis.

³Wichallasunña Betelta, chaypin altarta Diospaq perqasaq, payqa llakikusqay p'unchaymi rimapayawarqan, hinallataq maypiña kaqtiypas puriysiwarqan, nispa.

⁴Ahinapin Jacobman qorqanku hap'isqanku llapan wak dioskunata, ninrinkupi kaq aretekunatapas. Hinan Jacobqa chaykunata pakarqan Shehem qayllapi kaq terebinto sach'a sikipi.

⁵Lloqsiqtinkutaq, Diosqa manchachirqan muyuriqninkupi kaq llaqtakunata, chaymi Jacobpa churinkunata mana qatiykacharqankuchu.

⁶Jacobmi puriysimuqnin llapa runawan chayarqan Canaanpi kaq Luz llaqtaman, chaymi Betel nisqallataq.

⁷Hinaspanmi altarta chaypi perqarqan, chayneqtataq suticharqan “El-Betel”[44] nisqata, wawqenmanta ayqekushaqtin chaypi Diosqa payman rikhurisqanrayku.

⁸Rebecaq uywaqen Deborataq wañukapurqan, p'ampasqataq karqan Betel urapi encina sach'a sikipi. Chaymi chay sach'aqa “Waqay Encina” sutichasqa.

⁹Huktawan Dios rikhurirqan Jacobman Padan-arammanta kutimpuqtin, hinaspan payta samincharqan.

¹⁰Nirqantaq Diosqa: —Sutiykin Jacob, manan Jacobñachu sutiyki kanqa, aswanpas Israelmi sutiykiqa kapunqa, nispa. Chay hinatan Israelta sutichapurqan,

¹¹nillarqantaq: —Ñoqan kani Tukuy-atiyniyoq Dios, askhata miray, huk hatun suyun, askha llaqtakunan qanmanta sayarinqa, reykunataqmi qanmanta paqarinqa.

¹²Abrahamman Isaacman qosqay hallp'atan qanman qosqayki, hinallataq mirayniykimanpas qosaq chay hallp'ata, nispa.

¹³Hinaspan Diosqa paywan rimasqan cheqasmanta ripurqan.

¹⁴Chaymi Jacobqa huk rumi saywata chaypi sayarichirqan, chay patatataq vinowan aceitewan hich'aykurqan.

¹⁵Hinaspan Jacobqa paywan Diospa rimasqan cheqasta “Betel” nisqata suticharqan.

¹⁶Chaymantataq Betelmanta puririrqanku, Efrataman chayanapaq purinaraq kashaqtintaq Raquelqa wachakurqan, ichaqa ñak'ayta wachakurqan.

¹⁷Wachakushaspa sinchita ñak'ariqtintaq parteraqa payta nirqan: —Ama manchakuychu, kay qhari wawaykipas kallantaqmi, nispa.

¹⁸P'iti-p'itishaspataq Benoni[45] sutiwan suticharqan, taytantaq ichaqa Benjamín[46] sutiwan suticharqan.

¹⁹Chhaynatan Raquelqa wañukapurqan, Efrata ñanpitaq p'ampasqa karqan, chaymi Belén nisqallataq.

²⁰Sepulturan patapitaq Jacobqa rumita sayarichirqan, chaymi chay p'unchaymanta Raquelpa sepulturan saywa.

²¹Israelmi puririllarqantaq, hinaspan karpakurqan Edarpa torren aswan haqayneqninpi.

²²Chay hallp'api Israel tiyaqtintaq, Rubenqa rispa puñurqan taytanpa tiyaqmasin Bilhawan. Chayta Israel yachaspataq sinchita phiñakurqan. Israelpa churinkunataq chunka iskayniyoq karqan.

²³Leaq wawankuna: Jacobpa phiwin Rubén, Simeón, Leví, Judá, Isakar, Zabulonpiwan.

²⁴Raquelpa wawankuna: Josepiwan Benjaminpiwan.

²⁵Raquelpa warmi kamachin Bilhaq wawankuna: Danpiwan Neftalipiwan.

²⁶Leaq warmi kamachin Zilpaq wawankunataq: Gadpiwan Aserpiwan. Chaykunan Jacobpa churinkuna, Padan-arampi paypaq naceqkuna.

²⁷Chaymantataq, Jacobqa taytan Isaacpata rirqan Mamre llaqta Arbaman, chaymi Hebrón nisqallataq, chaypin Abrahampas Isaacpas tiyarqan.

²⁸Isaactaq kawsarqan pachak pusaq chunkayoq watakama,

²⁹hinaspanmi sinchi yuyaqña wañukapurqan, machulankunamanpas huñukapurqan, churin Esauwan Jacobwantaq p'ampapurqanku.