Read Quechua Cuzco Bible 1988 GÉNESIS 37 Bible Online

GÉNESIS 37 - Quechua Cuzco Bible 1988 bible

GÉNESIS 37

¹Jacobmi tiyarqan taytanpa tiyasqan hallp'api, Canaán suyupi.

²Kaymi Jacobpa ayllunmanta willakuy. Joseqa chunka qanchisniyoq watayoq kashaspa, taytanpa warmin Bilhaq churinkunawan Zilpaq churinkunapiwan uywata michiq. Josetaq taytanman willaq wawqenkunaq millay kawsasqanta.

³Israeltaq Joseta munakurqan llapa churinkunamantapas aswantaraq, yuyaq kaqtinña naceqtin, hinaspan ancha munay qoysu p'achata ruwapurqan.

⁴Hinan wawqenkunaqa paykunamantapas astawan taytanpa munakusqanta rikuspa payta cheqnikurqanku, manataq sumaqta payta rimaykuqkuchu.

⁵Huk kutinmi Joseqa mosqokusqanta wawqenkunaman willarqan, hinan paykunaqa astawanraq payta cheqnikurqanku.

⁶Paykunamanmi nirqan: —Kunan uyariychis kay mosqokusqayta:

⁷Chakra chawpipi watashasqanchis marq'ay-marq'ay trigota, ñoqaq marq'ayniytaq sayarispa sayashasqa, marq'ayniykichistaq muyuriykuspa ñoqaqman k'umuykamusqaku, nispa.

⁸Wawqenkunataq payman kutichirqanku: —¿Qanqa kamachiwankikuchu? Icha, ¿munaychakuwankikuchu? nispa. Hinaspan paytaqa astawanraq cheqnikurqanku mosqokusqanrayku willakusqanrayku ima.

⁹Mosqokullarqantaq huktawan, hinaspa wawqenkunaman chayta willarqan: —Kunan mosqokullanitaq huktawan: inti, killa, chunka hukniyoq ch'askakuna ñoqaman k'umuykamuwasqaku, nispa.

¹⁰Taytanmanpas chayta willallarqantaq, taytantaq payta phiñarispan nirqan: —¿Imataq kay mosqokusqaykiri? ¿Ñoqapas mamaykipas, wawqeykikunapas qanman pampakama k'umuykukuqpunichu hamusqaykiku? nispa.

¹¹Wawqenkunataq payta envidiakurqanku, taytantaq ichaqa chayta yuyashallarqanpuni.

¹²Hinamantataq wawqenkunaqa ripurqanku taytankuq uywanta Shehempi michimuq.

¹³Israeltaq Joseta nirqan: —Wawqeykikuna Shehempi uywata michishanku. Hamuy, paykunaman kachasqayki, nispa. Paytaq nirqan: —Risaqmi, nispa.

¹⁴Israeltaq payta nirqan: —Kunanqa phaway, qhawarqamuy imaynachus wawqeykikunaq kashasqanta, imaynataqchus uywakunaq kashasqantawan, hinaspa willawanki, nispa. Hinaspan Hebrón wayq'omanta kacharqan, hinan Shehemman chayarqan.

¹⁵Huk runataq paywan tuparqan campopi payechikushaqtin, hinan chay runaqa payta tapuykurqan: —¿Imata maskhashanki? nispa.

¹⁶Josetaq kutichirqan: —Wawqeykunatan maskhashani, ama hinachu kay, willaykuway maypichus michishasqankuta, nispa.

¹⁷Chay runataq kutichirqan: —Ñan kaymanta ripunkuña, ñoqan paykunata uyarirqani: Haku Dotanta, niqta, nispa. Chaymi Joseqa wawqenkuna maskhaq rirqan, hinaspan Dotanpi paykunata tarimurqan.

¹⁸Paykunataq karumanta Joseta rikuspa, manaraq qayllankuman chayashaqtin, payta wañuchinankupaq rimanakurqanku:

¹⁹—Kayqa mosqokuq hamushan.

²⁰Kunanqa wañurqachisun, hinaspa ch'aki p'uytuman winaykusun. Nisunchistaq: Ima phiña animalchá mikhurqon, nispa. Hinaspa yachasun imachus mosqokusqankuna kasqanta, nispa.

²¹Rubentaq chayta uyarispa paykunamanta kacharichiyta munaspa nirqan: —Ama wañuchisunchu.

²²Ama yawarta hich'aychischu, aswanpas kay ch'inneqpi kaq p'uytuman winaykuychis, amataq payta imanaychispaschu, nispa. Chaytan nirqan paykunamanta kacharichispa taytanman kutichipunanpaq.

²³Wawqenkunaman José chayaqtintaq, paykunaqa Josepa p'achanta ch'utirqorqanku, chay ancha munay qoysu p'achawan p'achakusqanta.

²⁴Hinaspa payta hap'ispa ch'usaq ch'aki p'uytuman winaykurqanku.

²⁵Hinaspataq mikhuq tiyaykurqanku, qhawarispataq rikurqanku huk t'aqa Ismael runakuna hamushaqta. Chaykunan camellonkupi Egiptoman cargasharqanku q'apaq hampikunata, balsamota, mirratawan.

²⁶Hinan Judaqa wawqenkunata nirqan: —¿Ima allintaq kanqa wawqenchista wañuchisqanchis, hinaspa wañusqanta pakaykusqanchispas?

²⁷Ismael runakunaman vendesun, ama payta wañuchisunchu, payqa wawqenchismi aychanchismi, nispa. Chaymi wawqenkunaqa: —Allinmi, nirqanku.

²⁸Negociaq Madián runakuna pasashaqtinkutaq, paykunaqa Joseta p'uytumanta horqospanku, Ismael runakunaman iskay chunka qolqeman venderqanku. Chaykunataq Joseta Egiptoman aparqanku.

²⁹Chaymantaña Rubenqa p'uytuman kutirqan, manataq chay ukhupi Joseta tarirqanchu, hinaspanmi p'achanta llakisqa llik'ikurqan.

³⁰Wawqenkunaman kutimuspataq nirqan: —¡Manan wayna kapunchu! ¿Imanaykusaqtaq? nispa.

³¹Chaymi paykunaqa Josepa p'achanta hap'irqanku, hinaspa huk cabrachata nak'aspa p'achata yawarcharqanku.

³²Hinaspataq chay qoysu p'achata taytankuman apaspa nirqanku: —Kaytan tarimuyku, qhawaykuy churiykiq p'achanchus icha manachus chayta, nispa.

³³Chaymi payqa chayta qhawaykuspa nirqan: —Wawaypa p'achanmi, ima phiña animalchá mikhurqon, Joseta llik'irqarin, nispa.

³⁴Hinaspanmi Jacobqa p'achanta llakisqa llik'ikurqan, luto p'achawan churaykukuspataq unayta churinmanta lutokurqan.

³⁵Hinaqtinmi llapa churinkuna llapa ususinkuna sonqochayta munarqanku, paytaq ichaqa mana sonqochasqa kayta munarqanchu, nirqantaq: —Wawaypa kasqan Wañuy-pachakaman llakisqa uraykusaq, nispa. Hinaspanmi taytanqa paymanta waqaykurqan.

³⁶Madián runakunataq Egiptopi Josetaqa Potifarman venderqanku, Potifarqa rey Faraonpa oficialnin guardia umallin karqan.