Read Quechua Cuzco Bible 1988 GÉNESIS 39 Bible Online

GÉNESIS 39 - Quechua Cuzco Bible 1988 bible

GÉNESIS 39

¹Egiptoman José apasqa kaqtintaq, chayman apaq Ismael runakunamanta Egipto qhari Potifar rantikurqan, payqa Faronpa oficialnin guardia umallin karqan.

²Señor Diostaq Josewan karqan, chaymi Joseqa patronnin Egipto runaq wasinpi allillanpuni kasharqan.

³Hinaqtinmi patronninqa repararqan paywan Señor Diosqa kasqanta, paypa ima ruwasqantapas Señor Diosqa allinyachisqantawan.

⁴Ahinatan Joseqa munachikurqan, Potifarpa yanapaqnintaq karqan, paytaq wasin mayordomota churarqan, hinaspan lliw kaqninkunata qhawaqta churarqan.

⁵Wasintapas lliw kaqnintapas payman hap'ichisqanmantapachataq, Señor Diosqa Joserayku Egipto runaq wasinta samincharqan, wasinpi kaqtapas campopi kaqtapas.

⁶Chaymi Joseman hap'ichirqan tukuy kaqninta, pay kaqtinqa manan imatapas yuyarqanñachu aswanpas mikhunallanpiña. Josemi karqan munay uyayoq munay siklla.

⁷Chaymantataq patronanqa qhawapayarqan Joseta, hinaspanmi nirqan: —Ñoqawan puñuy, nispa.

⁸Josetaq mana munarqanchu, hinaspan patronanta nirqan: —Qhawariy, patronniyqa manan ñoqamanta cuidakunchu wasinpi kaqmanta, lliw imaymanantataq hap'ichiwanpas.

⁹Manan kay wasipi ñoqamanta aswan atiyniyoq kanchu, manataq imatapas hark'awanchu ichaqa qanllata, warmin kasqaykirayku. ¿Imaynan kay sinchi mana allintaqa ruwayman, hinaspa Dios contraqa huchallikuyman? nispa.

¹⁰Sapa p'unchayña payqa ladonpi siriykunanpaq Joseta rimapayashaqtinpas, manan Joseqa paywan puñunanpaq uyarirqanchu.

¹¹Huk p'unchay Joseqa wasiman llank'aq haykurqan, manataq wasipi kaqkuna pipas chaypi karqanchu.

¹²Hinan warmiqa p'achanmanta hap'irqan: —Ñoqawan puñuy, nispa. Hinaqtinmi payqa warmiq makinpi p'achanta saqerparispa phawaylla ayqerikurqan.

¹³Warmitaq makinpi p'achanta saqerparisqanta hinallataq hawaman ayqesqanta rikuspa

¹⁴waqyakurqan wasipi kaqkunata, hinaspa paykunata nirqan: —Qhawariychis, hebreo runata pusamuwanchis burlakuwananchispaq. Paymi hamuwan ñoqawan puñunanpaq, ñoqataq kunkayoqta qaparini,

¹⁵chaymi waqyakusqaywan qaparisqaywan p'achanta qayllaypi saqerparispa phawaylla ayqerikun, nispa.

¹⁶Hinaspanmi payqa qayllanpi churaykurqan Josepa p'achanta qosan wasiman hamunankama.

¹⁷Hinaspataqmi payqa willarqan chay kikin simikunallatataq: Pusamuwasqaykiku kamachi hebreo hamuwan burlakuwaqniy.

¹⁸Ñoqa waqyakuqtiy qapariqtiy payqa qayllaypi p'achanta saqerparispa hawaman ayqerikun.

¹⁹Chay hinata kamachiyki ruwawan, nispa. Hinan payqa willasqan simita uyarispa mayta phiñakurqan.

²⁰Hinaspan patronninqa Joseta hap'ispa carcelman churarqan, reypa presonkunaq kasqanman.

²¹Señor Diosmi ichaqa Josewan karqan, hinaspan payta khuyapayarqan, munachillarqantaq cárcel alcaidewanpas.

²²Cárcel alcaidetaq Joseta churarqan chay carcelpi llapa presokunata qhawananpaq, chaypi ima ruwanatapas pay ruwaq.

²³Cárcel alcaideqa manaña imatapas qhawarqanchu Josepa makinpi kaqkunata, Señor Diospa Josewan kasqanrayku. Paypa imapas ruwasqantaqa Señor Diosmi allinyachiq.