Read Quechua Cuzco Bible 1988 GÉNESIS 4 Bible Online

GÉNESIS 4 - Quechua Cuzco Bible 1988 bible

GÉNESIS 4

¹Qharitaq warmin Evawan puñurqan, hinan warmiqa wiksallikuspa Cainta wachakurqan, hinaspan nirqan: —Señor Dios qowaqtinmi qhari wawayoq kani, nispa.

²Chaymantataq wawqen Abelta wachakurqan. Abeltaq oveja michiq karqan, Caintaq chakra llank'aq karqan.

³Watakuna pasaqtintaq, Cainqa chakra ruru ofrendata Señor Diosman haywarqan.

⁴Abelpas haywallarqantaq ñawpaq wachay ovejankunamanta wirallantinta. Señor Diostaq chaskirqan Abelta ofrendantapas,

⁵ichaqa Cainta ofrendantapas manan chaskirqanchu. Chaymi Cainqa sinchita phiñakurqan, uyanpas millayman tukurqan.

⁶Hinaqtinmi Señor Diosqa Cainta nirqan: —¿Imanaqtintaq phiñakunki? ¿Imanaqtintaq uyaykipas millayman tukun?

⁷Allinkaqta ruwaqtiykiqa, chaskisqan kanki, manachus allinkaqta ruwanki chayqa, huchan suyapashasunki hap'irqonasuykipaq, chaypas qanmi huchata atipanayki, nispa.

⁸Caintaq wawqen Abelta nirqan: —Haku campota, nispa. [5] Chaypi paykuna kasharqanku, hinan Cainqa wawqen Abel contra sayarispa, payta wañuchirqan.

⁹Hinan Señor Diosqa Cainta nirqan: —¿Maypin wawqeyki Abel? nispa. Paytaq kutichirqan: —Manan yachanichu, ¿ñoqari wawqeyta qhawaqchu kani? nispa.

¹⁰Paytaq Cainta nirqan: —¿Imanamunkitaq? Wawqeykiq yawarninmi pampamantapacha qaparispa mañakamuwan chaninchapunaypaq.

¹¹Kunanqa ñakasqan kanki, wañuchisqayki wawqeykiq yawarninta ch'onqaq hallp'amantapas wikch'usqan kanki.

¹²Chakrata llank'aqtiykipas manañan rurupusunkichu, puriylla-puriqtaq tumaqayataq kay pachapi kanki, nispa.

¹³Hinan Cainqa Señor Diosta nirqan: —¡Ay! Sinchi hatunmi muchunayqa, manan muchuyta atiymanchu.

¹⁴Kunanqa kay hallp'amantan wikch'uwanki, qayllaykimantataq karunchakapusaq, puriylla-puriqtaq tumaqayataq kay pachapi kasaq, pipas tariwaqniytaq wañuchiwanqa, nispa.

¹⁵Hinaqtinmi Señor Diosqa payta nirqan: —¡Manan! Pipas wañuchisunki chayqa, qanchis kutitan qanmanta ayni-kutichisqa kanqa, nispa. Hinaspan Señor Diosqa Cainta ch'ikurqan, pipas payta tariqqa mana wañuchinanpaq.

¹⁶Caintaq Señor Diospa qayllanmanta lloqsirqan, hinaspan Nod hallp'api tiyarqan, Edenpa inti lloqsimuy kinrayninpi.

¹⁷Cainmi warminwan puñurqan, paymi wiksallikuspa Enokta wachakurqan. Huk llaqtatataq sayarichirqan, hinaspan chay llaqtata suticharqan Enok churinpa sutinwan.

¹⁸Enoktaq churiyarqan Iradta, Iradtaq churiyarqan Mehujaelta, Mehujaeltaq churiyarqan Metusaelta, Metusaeltaq churiyarqan Lamekta.

¹⁹Lamektaq iskay warmiwan casarakurqan, hukninpa sutinmi karqan Ada, hukkaqpa sutintaq Zila.

²⁰Adataq wachakurqan Jabalta, paymi karqan karpapi tiyaqkunaq uywa michiqkunaq taytan.

²¹Wawqenpa sutintaq karqan Jubal, paymi karqan llapa arpata pinkuylluta tocaqkunaq taytan.

²²Zilapas Tubal-Cainta wachakullarqantaq, paymi karqan llapa broncemanta fierromanta kaqkunata takaq. Tubal-Cainpa panantaq Naama karqan.

²³Lamektaq warminkunata nirqan: —Ada, Zila, kunkayta uyariychis, Lamekpa warminkuna, simiyta uyariychis, huk qharitan wañuchini k'iriwasqanmanta, huk waynatataq maqawasqanmanta.

²⁴Cainmanta qanchis kutita ayni-kutichina kanan chayqa, Lamekmantaqa qanchis chunka qanchis kutitan kanqa, nispa.

²⁵Wakmantataq Adanqa warminwan puñurqan, paymi huk qhari wawata wachakurqan, hinaspan suticharqan Set-ta [6], nirqanmi: —Diosmi huk wawata qowan Cainpa wañuchisqan Abelpa rantinpi, nispa.

²⁶Setpaqpas huk qhari wawa nacellarqantaq, suticharqantaq Enosta. Chaymantapachan runakunaqa Señor Diospa sutinpi mañakuyta qallarirqanku.