Read Quechua Cuzco Bible 1988 GÉNESIS 41 Bible Online

GÉNESIS 41 - Quechua Cuzco Bible 1988 bible

GÉNESIS 41

¹Iskay wataña pasaqtintaq Faraonqa mosqokurqan, payqa Nilo mayu patapi hina sayashasqa.

²Mayumanta lloqsishasqa qanchis wira wakakuna llusk'araq, hinaspa q'achu-q'achupi mikhushasqaku.

³Chaykuna qhepatataq mayumanta lloqsimusqa qanchis millay toqti wakakuna, hinaspan sumaq wakakunaq qayllanpi mayu patapi sayaykusqaku.

⁴Hinaspanmi millay toqti wakakunaqa oqoykusqaku chay qanchis llusk'a wira wakakunata. Faraontaq rikch'arirqan.

⁵Wakmanta puñuykurqan, hinaspa iskaykaq kutipi mosqokurqan: Qanchis trigo uma rurusapataq sumaqta wiñashasqa ch'ulla tullullapi.

⁶Chaykuna qhepatataq lloqsisqa wak qanchis trigo umakuna ch'usukama rupha wayraq naq'echisqan.

⁷Chay qanchis ch'usu trigo umataq oqoykusqa chay qanchis trigo uma sumaqkaq rurusapata. Hinaspan Faraonqa rikch'arirqan, chayqa mosqoyllataq kasqa.

⁸Tutamantataq hawan ukhun sonqoyoq karqan, hinaspan waqyachimurqan Egiptopi llapan watuqkunata, llapan yachayniyoqkunatawan. Hinaspanmi Faraonqa paykunaman willarqan mosqokusqankunata, ichaqa manan pipas karqanchu chaykunata Faraonpaq sut'inchaq.

⁹Hinaqtinmi copa haywaqkunata kamachiqqa Faraonta nirqan: —Kunanmi huchaykunata yuyarini.

¹⁰Maypachachus qanqa kamachiykikunapaq phiñakurqanki, guardia umalliq wasinmantaq presota apachiwarqankiku ñoqata hinallataq t'anta ruwaqkunata kamachiqtapas.

¹¹Chaypachan paywan ñoqawan kasqan tutalla mosqokurqayku, sapanka mosqoytaq sut'inchanayoqkama karqan.

¹²Chaypin ñoqaykuwan kasharqan huk hebreo wayna, guardia umalliq kamachin. Paymanmi chayta willarqayku, paytaq mosqokusqaykuta sut'inchapuwarqanku, hinaspan sapankaman imachus kasqanta willawarqanku.

¹³Chaymi paypa chaykunata sut'inchapuwasqankuman hina karqan: Ñoqa llank'anayman waqyasqa kapurqani, hukkaqtaq seq'osqa kapurqan, nispa.

¹⁴Chaymi Faraonqa Joseta waqyachimurqan. Hinan usqhaylla carcelmanta horqomurqanku, sunkhantapas k'isukuspataq wak p'achawan p'achakurqan, hinaspataq hamurqan.

¹⁵Chaymi Faraonqa Joseta nirqan: —Ñoqan mosqokuni, manataq pipas kanchu chayta sut'inchananpaq, chaypas qanmanta willakuqtan uyarini, mosqokusqakunatas uyarinki, hinas chaykunata sut'inchanki, nispa.

¹⁶Josetaq Faraonta nirqan: —Manan imapaschu kani, Diosmi qanmanqa willasunki sonqoyki tiyaykunanpaq, nispa.

¹⁷Chaymi Faraonqa Joseman willarqan: —Mosqoyniypin Nilo mayu patapi hina kashasqani,

¹⁸hinan mayumanta lloqsimushasqa qanchis llusk'a wira wakakuna, hinaspan q'achu-q'achupi mikhushasqaku.

¹⁹Chaykuna qhepatataq qanchis millay toqti wakakuna lloqsimushasqa, sinchi tullu, manan chaykuna hina millayta rikurqanichu Egiptontinpipas.

²⁰Chay toqti wakakunataq oqoykushasqaku ñawpaqkaq qanchis wira wakakunata.

²¹Chaykuna oqoykusqankutaq mana reparakusqachu, chay toqtikunaqa millayraqmi ñawpaq hina rikhuripusqaku. Hinaspan rikch'arirqani.

²²Mosqokuspay rikullarqanitaq, qanchis trigo uman wiñasqa ch'ulla tullullapi, rurusapataq sumaqtaq.

²³Hinallataq qanchis trigo uma, ch'usu, ch'akisqa, rupha wayraq naq'echisqantaq chaykuna qhepata wiñasqa.

²⁴Hinaspanmi ch'usu trigo umaqa oqoykusqa qanchis sumaq umakunata. Chaytan willaniña watuqkunaman, manataqmi pipas kanchu chayta sut'inchanawanpaq, nispa.

²⁵Hinaqtinmi Joseqa Faraonman kutichirqan: —Mosqokusqaykiqa kaqkamallan, Diosmi imatachus ruwananta rikuchirqasunki.

²⁶Qanchis sumaq wakakunaqa qanchis watan, qanchis sumaq trigo umakunapas qanchis watan, mosqoyqa kaqkamallan.

²⁷Qhepankuta lloqsimuq qanchis millay toqti wakakunapas qanchis watan, chay qanchis trigo uma ch'usukama, rupha wayraq naq'echisqanqa, qanchis wata yarqay kananmi.

²⁸Kaqllatan qanman willayki, Diosmi imatachus ruwananta rikuchirqasunki.

²⁹Egiptontinpin qanchis wata askhallaña mikhuy kanqa,

³⁰chaykuna qhepatataq qanchis wata yarqay kanqa. Chaymi askhallaña mikhuypa kasqanqa Egipto suyupi qonqasqa kanqa, suyuntintataq yarqayqa hasut'inqa.

³¹Chay askhallaña mikhuypa kasqanqa manan reparakunqachu qhepanta yarqay kasqanrayku, chay yarqayqa sinchipunin kanqa.

³²Iskay kutita mosqokusqaykiqa willakun Diospa cheqaqtapuni yuyaykusqantan, hinallataq Diosqa usqhayllata chayta hunt'anantawan.

³³Chayrayku kunan yuyaychayki huk yuyayniyoq yachayniyoq qharita maskhanaykipaq, hinaspa Egipto suyupi churanaykipaq.

³⁴Kaytapas ruwallaytaq, suyuntinpi kamachikuqkunata churay, qanchis wata askha cosechamantataq Egipto suyupi phisqakaq parteta t'aqachiy.

³⁵Hinaspa kay hamuq allin watakunapi llapa mikhuyta huñuchunku, kamachisqaykitaq trigota churachunku llaqtakunapi mikhuna kananpaq, hinaspataq waqaychachunku.

³⁶Chay mikhuytaq waqaychakuchun hatun suyupaq, Egipto suyupi qanchis wata yarqay kanqa chaypaq, chaymi hatun suyuqa mana yarqaypi wañunqachu, nispa.

³⁷Chay yuyaychaytataq allinpaq hap'irqan Faraonqa hinallataq oficialninkunapas,

³⁸hinaspan Faraonqa paykunata nirqan: —¿Kay runata hina huktari tarisunmanchu? Dioskunaq espiritunmi paypiqa kashan, nispa.

³⁹Hinaspanmi Faraonqa Joseta nirqan: —Diosmi lliw chaykunata yachachisunki, manan kanchu qan hina yuyayniyoqpas yachayniyoqpas.

⁴⁰Qanmi wasiypi kamachikunki, kamachikusqaykitataqmi llapa runay kasusunki, qhapaq tiyanallapin ñoqaqa qanmanta kurak kasaq.

⁴¹Qhawariy, ñoqan churayki Egipto suyuntinpi kamachikunaykipaq, nispa.

⁴²Hinaspanmi Faraonqa makinmanta selloyoq anillonta horqokuspa chayta Josepa makinman churaykurqan, hinaspataq p'achachirqan sinchi fino lino p'achawan, kunkanmantaq walqaykurqan huk qori walqata.

⁴³Chaymantataq wichachirqan iskaykaq carretanman, hinaspa ñawpaqenpi waqyakurqanku: ¡Qonqorikuychis! nispa. Chhaynatan Egipto suyuntinpi churarqan.

⁴⁴Hinaspataq Faraonqa Joseta nirqan: —Ñoqan Faraón kani, mana qanwanqa Egipto suyuntinpi manan pipas kuyurinqachu, nispa.

⁴⁵Faraontaq Joseta suticharqan Zafnat-paneata, hinaspanmi payta casarachirqan On llaqta sacerdote Potiferaq ususin Asenatwan. Hinamantataq Joseqa Egipto suyuntinta purirqan.

⁴⁶Joseqa kinsa chunka watayoqmi karqan Egipto rey Faraonpa qayllanman pusasqa kashaspa. Josemi Faraonpa qayllanmanta lloqsirqan, hinaspanmi Egipto suyuntinta purirqan.

⁴⁷Chay qanchis allin watapitaq mikhuyqa askhallataña rururqan.

⁴⁸Chaymi payqa huñurqan qanchis watantin mikhuyta, Egipto suyupi ruruqta, hinaspan mikhuyta llaqtakunapi waqaycharqan, muyuriqnin campo mikhuyta sapanka llaqtapi churachispa.

⁴⁹Josemi trigota huñurqan mama qocha aqota hina, sinchi askhata mana yupay atinakama, manañan yuparqankuñachu.

⁵⁰Josepaqtaq nacerqan iskay wawa manaraq ñawpaqkaq wata yarqay chayamushaqtin, chaykunatan On llaqta sacerdote Potiferaq ususin Asenat paypaq wachakurqan.

⁵¹Josemi phiwi churinta suticharqan Manasesta[48], nirqanmi: Diosmi qonqachipuwan lliw muchuyniyta, taytaypa lliw aylluntapas, nispa.

⁵²Hukkaqtataq suticharqan Efrainta[49], nirqanmi: Diosmi mirachiwan llakikusqay hallp'api, nispa.

⁵³Chay hinatan Egipto suyupi kaq askhallaña ruruy qanchis wata hunt'akurqan,

⁵⁴hinaspan qanchis wata yarqay rikhurimurqan, Josepa ñawpaqmanta willakusqanman hina. Llapa suyukunapin yarqay karqan, Egipto suyuntinpin ichaqa mikhuy karqan.

⁵⁵Egipto runakunaqa mikhunanku tukukapuqtintaq, Faraonman mikhunata mañakuspa qaparirqanku. Faraontaq llapa Egipto runakunata nirqan: —Joseman riychis, hinaspa ruwaychis imatachus pay nisunkichis chayta, nispa.

⁵⁶Yarqaytaq karqan tukuy suyuntinpi, chaymi Joseqa kicharirqan llapa taqe wasikunata, hinaspan trigota Egipto runakunaman venderqan, Egipto suyupiqa sinchipunin yarqayqa karqan.

⁵⁷Hinantinmantan Egiptoman hamurqanku Josemanta rantikuq, hinantin pachapi sinchi yarqay kaqtin.