Read Quechua Cuzco Bible 1988 GÉNESIS 42 Bible Online

GÉNESIS 42 - Quechua Cuzco Bible 1988 bible

GÉNESIS 42

¹Jacobmi Egiptopi mikhuna kasqanta yachaspa, churinkunata nirqan: —¿Imanaqtintaq qhawanakushallankichis?

²Ñoqan uyarini Egiptopi trigo kasqanta, riychis haqayta, hinaspa rantimuychis kawsananchispaq, amataq wañusunchu, nispa.

³Chaymi Josepa chunka wawqenkunaqa Egiptota rirqanku trigo rantikuq,

⁴ichaqa manan Jacobqa kacharqanchu Josepa wawqen Benjaminta wawqenkunatawan, nirqanmi: Paqtan imapas payta sucedenman, nispa.

⁵Israelpa churinkunataq riqkunawan kuska rantikuq rirqanku, yarqaymi Canaán suyupipas karqan.

⁶Josetaq chay suyupi kamachikuq karqan, paymi chay suyu llapa runakunaman venderqan. Hinan Josepa wawqenkunaqa chayarqanku, hinaspanmi payman pampakama k'umuykukurqanku.

⁷Josetaq wawqenkunata rikuspa reqsirqorqan, ichaqa paykunata mana reqsiq tukuspanmi k'arak simiwan rimapayarqan: —¿Maymantataq hamunkichis? nispa. Paykunataq kutichirqanku: —Canaanmantan hamuyku mikhuyta rantikunaykupaq, nispa.

⁸Joseqa reqsirqanmi wawqenkunata, paykunataq ichaqa mana payta reqsirqankuchu.

⁹Chaymi Joseqa yuyarirqan paykunamanta mosqokusqankunata, hinaspan paykunata nirqan: —Qhamiyaqmi kankichis, suyupi mana hark'asqa cheqasta qhawaraqmi hamunkichis, nispa.

¹⁰Paykunataq payman kutichirqanku: —Manan, wiraqochayku, aswanpas kamachiykikunaqa mikhuyta rantikuqmi hamuyku.

¹¹Llapallaykun ch'ulla qhariq churinkuna kayku, honrado runakunan kayku, manan hayk'aqpas qhamiyarqaykuchu, nispa

¹²Josetaq ichaqa paykunata nirqan: —Manan, suyupi mana hark'asqa cheqasta qhawaqmi hamunkichis, nispa.

¹³Paykunataq kutichirqanku: —Kamachiykikunaqa chunka iskayniyoq wawqekunan kayku, Canaán suyupi tiyaq qhariq churinkuna, sullk'akaqqa kunan taytaykuwanmi kashan, hukkaqtaqmi mana kapunchu, nispa.

¹⁴Josetaq paykunata nirqan: —¡Chaypunin chaytaqa niykichis! Qhamiyaqkunapunin kankichis,

¹⁵kaypin reqsichikunkichis: Faraonpa sutinpin jurani, manan kaymanta lloqsinkichischu sullk'a wawqeykichis hamunankama.

¹⁶Hukniykichista kachaychis wawqeykichista pusamunanpaq, qankunataq preso qhepaychis. Hinan yachakunqa rimasqaykichisqa cheqaqpuni kasqan, mana chayqa, Faraonpa sutinpin jurani, qhamiyaqmi kankichis, nispa.

¹⁷Hinaspanmi huñullata carcelman churarqan kinsa p'unchaypaq.

¹⁸Kinsakaq p'unchaypitaq Joseqa paykunata nirqan: —Ñoqaqa Diostan manchakuni. Kayta ruwaychis, chaymi kawsankichis:

¹⁹—Honrado runakuna kankichis chayqa, huknin wawqeykichis carcelpi preso qhepachun, qankunataq riychis, trigota apaychis wasiykichispi kaqkuna mikhunanpaq.

²⁰Pusamuwankichismi sullk'a wawqeykichista, chaypin simiykichis cheqaqchasqa kanqa, chaymi mana wañunkichischu, nispa. Paykunataq hinata ruwarqanku,

²¹ninakurqankutaq: —Cheqaqtapunin wawqenchis contra huchallikurqanchis, rikurqanchismi riki sonqonpa sinchi llakikusqanta, pituchakushawaqtinchispas manan payta kasurparirqanchischu, chaymi kay sinchi llakikuyqa qatiwanchis, nispa.

²²Hinaqtinmi Rubenqa paykunata nirqan: —¿Manachu qankunata rimapayarqaykichis: Ama wayna contra huchallikuychischu, nispa? Manataq kasukurqankichischu. Kunanqa wañusqanmantan llakipi rikukushanchis, nispa.

²³Paykunaqa manan yacharqankuchu Josepa paykunata entiendesqanta, wawqenkunawan rimashaqtin simi t'ikraq kasqanrayku.

²⁴Josetaq paykunamanta anchhurirqan, hinaspan waqarqan. Chaymanta paykunaman kutimurqan, hinaspa rimapayarqan, chaymantataq paykuna ukhumanta Simeonta hap'ispa rikushaqtinku watachirqan.

²⁵Hinaspataq kamachirqan costalninkuman trigota hunt'achinankupaq, hinaspa sapankaman qolqenkuta kutichipunankupaq costalninkuman churaykuspa, ñanpaqpas mikhunata qonankupaq. Ahinataq paykunapaq ruwasqa karqan.

²⁶Hinan paykunaqa trigonkuta asnonkuman cargaykuspa chaymanta ripurqanku.

²⁷Hukninkutaq qorpachanapi asnonman qarananpaq costalninta kicharispa, costalnin simipi qolqenta tarirqan.

²⁸Hinaspan wawqenkunata nirqan: —¡Qolqeyta kutichipuwasqa! ¡Kayqa costalniypin kashan! nispa. Hinaqtinmi mancharikurqanku, khatatataspataq ninakurqanku: —¿Imatataq Diosri kayta ruwawanchis? nispa.

²⁹Canaán suyuman chayaspataq tukuy imaymana paykunata sucedesqanta taytanku Jacobman willarqanku:

³⁰—Chay suyu kamachikuqmi k'arak simiwan rimapayawarqanku, suyu qhamiyaqta hinataq hap'iwarqanku.

³¹Ñoqaykutaq payman nirqayku: Honrado runakunan kayku, manan hayk'aqpas qhamiyarqaykuchu.

³²Chunka iskayniyoq wawqen kayku, huk taytallayoq: Hukninmi mana kapunchu, sullk'akaqtaq kunan taytaykuwan Canaán suyupi kashan, nispa.

³³Hinan chay kamachikuqqa niwarqanku: Kaypin yachasaq honrado runakuna kasqaykichista: saqewaychis huknin wawqeykichista, wasiykichispi kaqkuna mikhunanpaqtaq trigota apaychis.

³⁴Sullk'a wawqeykichistataq pusamuwaychis mana qhamiyaqkunachu aswanpas honrado runakuna kasqaykichista yachanaypaq. Ahinapin wawqeykichista kacharipusqaykichis, kay suyupitaq purikullankichis, nispa, nispanku.

³⁵Costalninkuta paykuna tallishaqtinkutaq sapankaq costalninpi rikhurirqan qolqe khipunku, hinan paykunapas taytankupas qolqe khiputa rikuspa mancharikurqanku.

³⁶Hinan taytanku Jacobqa paykunata nirqan: —Wawaykunata qechupuwankichis: José mana rikhuripunchu, manallataq Simeonpas, Benjamintapas qechupushallawankichistaq, ¡lliw kaykunaqa contraypin! nispa.

³⁷Chaymi Rubenqa taytanta nirqan: —Mana Benjaminta kutichimpuqtiyqa iskaynin churiyta wañuchinki. Pusachillaway, ñoqan kutichimpusqayki, nispa.

³⁸Paytaq nirqan: —Manan churiyqa qankunawan rinqachu, wawqenpas wañupunña, pay sapallanña qhepan. Purisqaykichis ñanpi imaynapas pay kaqtinqa, sinchi llakikuymi kay machutaña wañuchiwanqa, nispa.