Read Quechua Cuzco Bible 1988 GÉNESIS 43 Bible Online

GÉNESIS 43 - Quechua Cuzco Bible 1988 bible

GÉNESIS 43

¹Sinchipunin chay suyupi yarqay karqan,

²chaymi Egiptomanta trigo apamusqanku mikhuyta tukuspanku, taytankuqa paykunata nirqan: —Kutiychis, hinaspa ñoqanchispaq rantimuychis as chhikan mikhuyta, nispa.

³Judataq kutichirqan: —Chunkay-chunkaytan chay qhariqa rimapayawarqanku: Manan uyayta rikunkichischu manachus wawqeykichista qankunawan pusamunkichis chayqa, nispan.

⁴Wawqeykuta ñoqaykuwan kachaqtiykiqa risaqkun, hinaspan mikhuyta rantimpusqaykiku.

⁵Mana payta kachaqtiykiqa manan risaqkuchu, chay qharin niwarqanku: Manan uyayta rikunkichischu manachus wawqeykichista qankunawan pusamunkichis chayqa, nispan, nispa.

⁶Chaymi Israelqa nirqan: —¿Imanaqtintaq kay mana allinta ruwaykuwankichis chay qhariman huk wawqeykichis kasqanta willaspa? nispa.

⁷Paykunataq kutichirqanku: —Chay qhariqa allin-allintan tapuwarqanku ñoqaykumanta, hinallataq ayllunchismantapas: ¿Kawsashanraqchu taytaykichis? ¿Kanraqchu huk wawqeykichis? nispa. Chaymi chay simiman hina willarqayku. Manan yuyaykurqaykuchu: Wawqeykichista pusamuwaychis, nispa niwanankutaqa, nispa.

⁸Hinaqtinmi Judaqa taytan Israelta nirqan: —Waynata pusachiway, rillasaqkuña, chay hinapi kawsananchispaq, qanpas wawaykupas.

⁹Ñoqan paymanta kutichipusqayki, ñoqatan manuchawanki, manataq kayman kutichimpusqaykichu chayqa, wiñaypaqmi huchallikuqniyki kasaq.

¹⁰Manachus tardaykuman karqan chayqa, iskay kutitapuniñan kutiykuman karqan, nispa.

¹¹Hinan taytan Israelqa paykunaman kutichirqan: —Chay hinataq chayqa, kay hinata ruwaychis: Kaymanta allinkaqta costalniykichispi chay runapaq aparikuychis, as chhikan balsamota, as chhikan miel misk'ita, q'apaqkunata, mirratawan, nuezkunata, almendrastawan.

¹²Apaychistaq wak qolqetawan, aparikullaychistaq costalniykichispa siminpi kutimuq qolqetapas, pantasqapaschá karqan.

¹³Pusarikullaychistaq wawqeykichistapas, hinaspa chay runaqta kutillaychisña.

¹⁴Tukuy-atiyniyoq Diostaq chay qhariwan khuyapayachisunkichis, Simeontapas kacharichimpuchun, hinallataq kay Benjamintapas. Mana churiyoq kanaychus kashan chayqa, chay hina kachun, nispa.

¹⁵Chaymi paykunaqa hoqarirqanku sumaq sonqotapas, kutimuq qolqetapas, rantinanku qolqetapas, hinallataq Benjamintapas pusarikuspa Egiptoman puririrqanku, chayaspataq Joseman asuykurqanku.

¹⁶Joseqa Benjaminta paykunatawan rikuspataq wasi mayordomonta nirqan: —Chay runakunata wasiman pusay, paykunaqa ñoqawanmi chawpi p'unchayta mikhunqaku, chaypaq wakata nak'aspayki wayk'uy, nispa.

¹⁷Chaymi mayordomoqa ruwarqan Josepa nisqanta hina, paykunatan Josepa wasinman pusarqan.

¹⁸Hinan paykunaqa Josepa wasinman pusasqawan mancharikuspa nirqanku: —Ñawpaq kuti costalninchispi qolqenchista kutichipuwasqanchisraykun kayman pusamuwanchis. Trampata churawaspanchismi kamachipaq hap'iwasun, ñoqanchistapas asnonchiskunatapas, nispa.

¹⁹Hinaspanmi asuykurqanku Josepa wasi mayordomonman, wasi punkupin payta rimapayarqanku:

²⁰—Ay, wiraqochayku, ñoqaykuqa ñawpaq kutita mikhuna rantikuqpunin hamurqayku,

²¹qorpachakunaman chayaspayku costalniykuta paskariqtiykutaqmi, sapankaq qolqeyku kapushasqa costalniykuq siminpi iman kaqlla, chaytan kutichimpushayku.

²²Apamullaykutaqmi wak qolqetapas mikhuyta rantikunaykupaq, ñoqaykuqa manan yachaykuchu pichus qolqeykuta costalniykuman churaykusqanta, nispa.

²³Paytaq paykunaman kutichirqan: —Sonqoykichis tiyaykuchun, ama mancharikuychischu. Diosniykichis taytaykichispa Diosninchá qhapaq-kayta costalniykichispi qorqasunkichis, ñoqaqa chaskirqanin qolqeykichista, nispa. Hinaspanmi Simeonta paykunaman horqomuspa,

²⁴paykunata Josepa wasinman pusarqan. Unutataq paykunaman qorqan, hinan chakinkuta maqchikurqanku, asnonkumanpas qarallarqantaq.

²⁵Paykunataq chawpi p'unchayta Josepa hamunankama sumaq sonqota wakichirqanku, uyarirqankun chaypi mikhunankuta.

²⁶Wasiman José hamuqtintaq, paykunaqa payman apamurqanku chay sumaq sonqota, hinaspanmi payman pampakama k'umuykurqanku.

²⁷Hinaqtinmi Joseqa paykunata tapurqan imaynachus kashasqankuta, hinaspa nirqan: —Willawasqaykichis yuyaq taytaykichisri, ¿allillanchu kashan? ¿Kawsashanraqchu? nispa.

²⁸Paykunataq kutichirqanku: —Allillanmi kashan kamachiyki taytaykuqa, kawsashanraqmi, nispa. Hinaspanmi k'umuykukurqanku, qonqorikurqanku.

²⁹Josetaq qhawarispa wachaymasin wawqen Benjaminta rikurqan, hinaspa nirqan: —¿Kaychu sullk'a wawqeykichis, pimantachus willawasqaykichis? nispa. Hinaspataq payta nirqan: —Dios saminchasunki, churilláy, nispa.

³⁰Hinan Joseqa waqanayarqan wawqenmanta sonqon “phoq” nisqanrayku, chaymi maskharqan maypichus waqananpaq, puñunan wasita haykuspataq chaypi waqaykurqan.

³¹Uyanta maqchikuspataq lloqsimurqan, hinaspan sonqonpi mukikurqan, nirqantaq: —Mikhuyta qaramuychis, nispa.

³²Paypaqtaq wakpi churarqanku, wawqenkunapaqtaq sapaqpi, paywan mikhuq Egipto runakunapaqpas wakllapitaq. Egipto runakunaqa manan Hebreo runakunawan mikhuyta munaqkuchu, chayqa Egipto runakunapaqqa millakuymi kaq.

³³Josetaq wawqenkunata ñawpaqenpi tiyaykachirqan kuraktaqa kurak kasqanman hina, sullk'atapas sullk'a kasqanman hina, chaymi paykunaqa qhawanakuspanku, utirayarqanku.

³⁴Josetaq ñawpaqenmanta mikhunata haywachirqan, Benjaminpa mikhunantaq askhallaña karqan, manataq mayqenninkuqpas chay hinachu karqan. Hinaspan paywan ukyarqanku machanankukama.