Read Quechua Cuzco Bible 1988 GÉNESIS 44 Bible Online

GÉNESIS 44 - Quechua Cuzco Bible 1988 bible

GÉNESIS 44

¹Josemi wasi mayordomonta kamachirqan: —Kay qharikunaq costalninman mikhunata hunt'achiy hayk'an apay atinankuta, sapankaq qolqentapas churaykuy costalninpa siminman.

²Qolqe copaytataq trigomanta pagasqa qolqetawan sullk'akaqpa costalnin simiman churanki, nispa. Chaymi payqa ruwarqan Josepa nisqanta hina.

³Pacha illarimuqtintaq paykunaqa asnontin kacharparisqa kapurqanku.

⁴Llaqtamanta paykuna lloqsispanku manaraq karunchakushaqtinkutaq, Joseqa mayordomonta nirqan: —Chay runakunaq qhepanta phaway, paykunata taripaspaykitaq ninki: —¿Imanaqtintaq allinman mana allinwan kutichinkichis? ¿Imanaqtintaq qolqe copayta suwakamuwankichis?

⁵¿Manachu chayqa patronniypa ukyanan, chaywantaq watunan? Mana chanintapunin chaytaqa ruwarqankichis, nispayki, nispa.

⁶Mayordomotaq paykunaman taripaspa chay hinata nirqan.

⁷Paykunataq kutichirqanku: —¿Imanaqtintaq wiraqochaykuri chaykunata nin? Manan hayk'aqpas ñoqaykuqa chay hinataqa ruwaykumanchu.

⁸Costalniykuq siminpi qolqeta tarispaykupas Canaán suyumantapachan kutichimpurqayku, ¿chaychu patronniykiq wasinmanta suwakamuykuman qolqetapas qoritapas?

⁹Mayqen kamachiykipichus copa rikhurinqa chayqa, wañuchun, ñoqaykupas wiraqochaykuq kamachinkuna kapusaqku, nispa.

¹⁰Mayordomotaq nirqan: —Nisqaykichis hina kachun, mayqenpapichus rikhurinqa, chaymi kamachiy kanqa, wakinniykichistaq mana huchachasqa kankichis, nispa.

¹¹Hinaqtinmi sapankanku costalninkuta usqhaylla uraykachispa kicharqanku.

¹²Hinan maskhayta qallarirqan kurakpamanta sullk'aqkama, copataq Benjaminpa costalninpi rikhurirqan.

¹³Hinaqtinmi paykunaqa p'achankuta llakisqa llik'ikurqanku, hinaspan sapanka asnonman carqaykuspa llaqtaman kutiykurqanku.

¹⁴Judataq wawqenkunapiwan Josepa wasinman rirqan, chaypiraqmi Joseqa kasharqan, hinaspanmi paypa ñawpaqenpi pampaman k'umuykurqanku.

¹⁵Josetaq paykunata nirqan: —¿Imatataq kaytari ruwankichis? ¿Manachu yachankichis ñoqa hina runaqa watuy yachasqanta? nispa.

¹⁶Chaymi Judaqa nirqan: —¿Ima nisaqkutaq wiraqochayta? ¿Ima nispataq rimarisaqku? Chayri, ¿imawantaq mananchakusaqku? Diosmi huchallikusqaykumanta taripawanku. Kunan ñoqaykuqa kamachiykin kapuyku, ñoqayku, hinallataq copata hap'iqpas, nispa.

¹⁷Josetaq kutichirqan: —Manan hayk'aqpas chaytaqa ruwasaqchu. Copata hap'iqllan kamachiyqa kanqa, qankunaqa taytaykichispata sumaqlla ripuychis, nispa.

¹⁸Chaymi Judaqa payman asuykuspa nirqan: —¡Ay wiraqocháy! Valekuyki simiyta uyariykuwanaykipaq, amayari ñoqapaq phiñakunkichu, qanqa Faraón hinan kanki.

¹⁹Qanmi tapuwarqankiku: ¿Kanchu taytaykichispas wawqeykichispas? nispa.

²⁰Ñoqaykutaq kutichirqaykiku: Kanmi yuyaqña taytayku, waynallaraq wawqeykupas, yuyaq-kayninpiña nacepusqan. Wachay-masintaqmi wañukapunña, pay sapallanñan qhepan mamanpa wawan, taytaykutaqmi mayta munakun, nispa.

²¹Qanmi niwarqankiku: Pusamuychis, payta rikunaypaq, nispa.

²²Chaymi ñoqaykuqa nirqaykiku: Waynaqa manan taytanta saqemunmanchu, saqemunqa chayqa taytanqa wañukapunqan, nispa.

²³Hinan niwarqankiku: Sullk'a wawqeykichista mana pusamuwankichischu chayqa, manañan asuykamuwankichischu, nispa.

²⁴Chay hinan karqan, taytaykuman chayaspayku nisqaykikunata payman willarqayku.

²⁵Maypachachus taytaykuqa: Kutiychis as chhikan mikhuyta ñoqanchispaq rantimuq, nispa, niwaqtinkun,

²⁶ñoqaykuqa nirqayku: Manan riykumanchu, wawqeykuchus riysiwanqaku chayqa, risaqkun. Manan chay wiraqochaman asuykuykumanchu, manachus sullk'a wawqeyku riysiwanqaku chayqa, nispa.

²⁷Hinaqtinmi taytaykuqa niwarqanku: Qankunan yachankichis Raquel warmiypa iskay qhari wawata ñoqapaq wachakusqanta.

²⁸Hukninmi qayllaymanta lloqsirqan, yuyanitaqmi phiña animalpa llik'irqarisqanpuni kapusqanta, kunankaman mana rikupunichu.

²⁹Benjamintapas qayllaymanta pusankichis chayqa, hinaspataq imaynapas kapunqa chayqa, sinchi llakikuymi kay machutaña wañuchiwanqa, nispa.

³⁰Kunan, taytayman ñoqa kutipuqtiyqa, waynaqa manataq ñoqawan rinqachu chayqa, waynata mana rikuspanmi wañukapunqa, payman sinchi sonqollisqa kasqanrayku. Ñoqaykutaq yuyaq taytaykuta sinchi llakikuywan wañuchisaqku.

³²Ñoqan taytaymanta waynapaq fiakamurqani: Ñoqan wiñaypaq huchallikuqniyki kasaq, nispa.

³³Chaymi valekuyki, kunan waynaq rantinpi kamachiyki kapunaypaq qhepachipuway, waynataq wawqenkunawan ripuchun.

³⁴¿Imaynataq ñoqari taytayman kutipuyman mana waynantinri? Manan taytaypa mana allin kapusqanta rikuyta munanichu, nispa.