Read Quechua Cuzco Bible 1988 GÉNESIS 46 Bible Online

GÉNESIS 46 - Quechua Cuzco Bible 1988 bible

GÉNESIS 46

¹Israelmi puririrqan lliw imaymanantin, hinaspan Beersebaman chayarqan, Isaac taytanpa Diosninmantaq sacrificiokunata haywarqan.

²Diostaq payta tuta rikhuriypi rimapayaspa nirqan: —Jacob, Jacob, nispa. Paytaq kutichirqan: —Uyarishaykin, nispa.

³Hinan nirqan: —Ñoqan Dios kani, taytaykiq Diosnin. Ama Egiptoman riyta manchakuychu, chaypin ñoqa anchata askhayachisqayki.

⁴Qanwanmi ñoqa Egiptoman risaq, ñoqallataqmi mirayniykitapas kutichimpusaq. Josepa qayllanpitaq wañukapunki, nispa.

⁵Chaymi Jacobqa Beersebamanta hatarirqan, churinkunataq apanapaq Faraonpa apachimusqan carretakunaman wichachirqanku paytapas wawankunatapas warminkunatapas.

⁶Jacobmi llapa ayllunpiwan Egiptoman rirqan, Canaán suyupi imaymana tarisqankunatawan uywankunatawan aparikuspa.

⁷Paywanmi rirqanku churinkunapas, nietonkunapas, ususinkunapas, nietankunapas.

⁸Kaykunan Jacobpa ayllun, paywan Egiptoman haykuq churinkunaq sutin: Phiwin Rubén.

⁹Rubenpa churinkuna: Hanoc, Falú, Hezrón, Karmipiwan.

¹⁰Simeonpa churinkuna: Jemuel, Jamín, Ohad, Jakín, Zohar, Canaán warmiq wawan Saulpiwan.

¹¹Levipa churinkuna: Gersón, Kohat, Meraripiwan.

¹²Judapa churinkuna: Er, Onán, Sela, Fares, Zarapiwan. Erwan Onanwantaq Canaán suyupi wañukapurqanku. Farespa churinkunataq karqan Hezrón, Hamulpiwan.

¹³Isakarpa churinkuna: Tola, Púa, Jashub, Simronpiwan.

¹⁴Zabulonpa churinkuna: Sered, Elón, Jahleelpiwan.

¹⁵Chaykunan karqan Leaq wawankuna Jacobpaq Padan-arampi wachakusqankuna, kallarqantaq ususin Dinapas. Llapanmi kinsa chunka kinsayoq runa karqan, qhari wawankunapas ususinkunapas.

¹⁶Gadpa churinkuna: Zefón, Hagui, Ezbón, Suni, Eri, Arodi, Arelipiwan.

¹⁷Aserpa churinkuna: Imna, Isúa, Isúi, Bería, pananku Serapiwan. Beriaq churinkunataq: Heber, Malkielpiwan.

¹⁸Chaykunan karqan Zilpaq wawankuna, paytan Labán qorqan ususin Leaman, paymi chaykunata Jacobpaq wachakurqan. Llapankutaq karqan chunka soqtayoq runa.

¹⁹Jacobpa warmin Raquelpa wawankuna: Josewan Benjaminwan.

²⁰Josepataq Egipto suyupi nacerqan Manaseswan Efrainwan. Paykunatan wachakurqan Asenat, On llaqtapi kaq sacerdote Potiferaq ususin.

²¹Benjaminpa churinkunan karqan Bela, Beker, Asbel, Gera, Naamán, Ehi, Ros, Mupim, Hupim, Ardpiwan.

²²Chaykunan karqan Raquelpa wawankuna, Jacobpaq wachakusqankuna. Llapanku karqan chunka tawayoq runa.

²³Danpa churin: Husim.

²⁴Neftalipa churinkuna: Jahzeel, Guni, Jezer, Silempiwan.

²⁵Chaykunan karqan Bilhaq wawankuna, paytan Labán qorqan ususin Raquelman, paymi chaykunata Jacobpaq wachakurqan. Llapankutaq karqan qanchis runa.

²⁶Jacobwan Egiptoman riq llapa churiyasqan runakunan soqta chunka soqtayoq karqan, churinkunaq warminqa manañan yupasqachu karqan.

²⁷Josepaq Egiptopi naceq churinkunataq karqan iskay. Chhaynaqa, Jacobpa ayllun Egiptoman haykuqkunan qanchis chunka runa karqan.

²⁸Jacobtaq Judata Joseman ñawpachirqan Gosenman pusamunanpaq. Chaykamataq paykunaqa Gosén hallp'aman chayarqanku.

²⁹Josetaq carretata alistarqan, hinaspa Gosenpi taytan Israelta chaskiq rirqan. Hinaspanmi payman qayllaykurqan, kunkanmanta oqllaykukuspantaq rikran patapi unayta waqarqan.

³⁰Chaymi Israelqa Joseta nirqan: —Kunanqa wañukapusaq, ñan uyaykita rikuniña, yachanitaqmi kawsashasqaykitapas, nispa.

³¹Josetaq wawqenkunata taytanpa aylluntawan nirqan: —Risaq, Faraonman willamusaq: Canaán suyupi kaq wawqeykuna taytaypa ayllunpiwan chayamunku.

³²Paykunaqa oveja michiqkunan, uywayoqkunan kanku, apamunkun ovejankutapas wakankutapas, lliw imaymanankutawan, nispay.

³³Faraontaq waqyaspa tapusunkichis: ¿Ima llank'aqtaq kankichis? nispa, chayqa,

³⁴ninkichis: Maypachamantapas ñoqaykuqa uywayoq runakunan kayku, ñoqaykupas machulaykupas, nispaykichis. Chhaynapi Gosén hallp'api tiyanaykichispaq qhepakunkichis, Egipto runakunapaqqa millakuymi uywa michiqqa, nispa.