Read Quechua Cuzco Bible 1988 GÉNESIS 47 Bible Online

GÉNESIS 47 - Quechua Cuzco Bible 1988 bible

GÉNESIS 47

¹Josemi rirqan, hinaspan Faraonman willamurqan: —Taytaymi wawqeykunapiwan ovejakunantin, wakakunantin, lliw imaymanantin Canaán suyumanta chayamunku, Gosén hallp'apin kunan kashanku, nispa.

²Wawqenkunamantataq phisqata akllarqan, hinaspan Faraonpa ñawpaqenman pusarqan.

³Faraontaq wawqenkunata nirqan: —¿Ima llank'aqtaq kankichis? nispa. Paykunataq Faraonman kutichirqanku: —Kamachiykikunaqa oveja michiqkunan kayku machulaykumantapacha,

⁴kay hallp'api tiyaqmi hamuyku, manan q'achu kanchu ovejaykupaq, sinchipunin Canaán suyupi yarqayqa. Chaymi, kunan valekuykiku Gosén hallp'api tiyachiwanaykikupaq, nispa.

⁵Hinan Faraonqa Joseta nirqan: —Taytaykiwan wawqeykikunawanmi chayamusqasunkiku.

⁶Egipto hallp'aqa munayniykipin kashan, allinnin hallp'api tiyachiy taytaykita wawqeykikunata, Gosén hallp'api tiyachunku. Paykunapi kantaq allin yuyayniyoq runakuna chayqa, chaykunata churay uyway michiqkunata kamachinankupaq, nispa.

⁷Joseqa taytan Jacobtapas Faraonman reqsichinanpaq pusaykullarqantaqmi. Jacobtaq Faraonta samincharqan.

⁸Faraontaq Jacobta nirqan: —¿Hayk'a watayoqmi kanki? nispa.

⁹Jacobtaq Faraonman kutichirqan: —Purikuqlla kasqayqa pachak kinsa chunka watan, pisillan mana allintaqmi wataykunaqa, manan chayanraqchu machulaykunaq kawsasqanman, purikuqlla kasqanku watamanpas, nispa.

¹⁰Hinaspanmi Jacobqa Faraonta samincharqan, chaymantataq Faraonpa qayllanmanta lloqsirqan.

¹¹Ahinatan Joseqa tiyachirqan taytanta wawqenkunatapas, paykunamanmi qorqan Egipto allinnin hallp'ata, Ramsés hallp'api, Faraonpa kamachikusqanman hina.

¹²Josemi mikhuywan uywarqan taytanta wawqenkunata, taytanpa llapa ayllunta, wawakunaq kasqanman hina.

¹³Manataq mikhuy karqanchu chay suyuntinpi sinchi yarqay kasqanrayku, chaymi yarqayta muchurqan Egipto suyupas Canaán suyupas.

¹⁴Josemi huñurqan Egipto suyu Canaán suyu llapa qolqeta, trigota paymanta rantisqankumanta, hinaspan chay qolqeta Faraonpa wasinman apaykurqan.

¹⁵Egipto suyu qolqe Canaán suyu qolqe tukukuqtintaq, Egiptontin runa Joseman rirqan: —¡Mikhuyta qowayku! ¿Imanaqtintaq kashaqtiyki wañusaqku qolqe tukukuqtin? nispa.

¹⁶Josetaq nirqan: —Qolqetaq tukukapun chayqa, uywaykichista apamuychis, ñoqataq uywaykichispaq qosqaykichis, nispa.

¹⁷Chaymi paykunaqa uywankuta Joseman apamurqanku, Josetaq paykunaman mikhuyta qorqan caballokunapaq, ovejakunapaq, wakakunapaq, asnokunapaqwan. Chay watan paykunaman mikhuchirqan llapa uywankumanta.

¹⁸Chay wata tukukuqtintaq, iskaykaq watapi payman hamurqanku, hinaspan payta nirqanku: —Manan patronniykumanta pakaykuchu cheqaqpuni qolqe tukukapusqanta, uywapas ñan uywaykiña, manan imapas qonaykupaq kanñachu, aswanpas cuerpollaykuñan hallp'aykupiwan.

¹⁹¿Imanaqtintaq kashaqtiyki chinkarisaqku, ñoqaykupas hallp'aykupas? Mikhuywan rantiwayku ñoqaykutapas hallp'aykutapas, ñoqaykutaq hallp'aykupiwan Faraonpa kaqninkuna kapusaqku. Muhutataq qowayku kawsanaykupaq, amataq wañusaqkuchu, amallataq hallp'apas purunyachunchu, nispa.

²⁰Chaymi Joseqa Faraonpaq rantirqan Egiptontin llapa hallp'ata, Egipto runakunaqa sapankan hallp'ankuta venderqanku, sinchitapuni yarqayta muchusqankurayku. Hinan hallp'aqa Faraonpa kapurqan,

²¹runakunatataq kamachiman tukuchipurqan Egipto suyuntinpi.

²²Sacerdotekunaq hallp'allantan mana rantirqanchu, sacerdotekuna Faraonmanta mikhunankupaq chaskisqankurayku, chaytan paykunaqa mikhurqanku, chaymi hallp'ankuta mana venderqankuchu.

²³Josemi runakunata nirqan: —Kunanqa rantiykichisñan Faraonpaq, qankunatapas hallp'aykichistapas. Kayqa muhu tarpunaykichispaq,

²⁴cosechamanta phisqakaq t'aqasqata Faraonman qopunkichis, tawantin t'aqasqataq qankunapaq kanqa, chakrakunata tarpunaykichispaq, qankunapas, wawaykichispas, wasiykichispi kaqkunapas mikhunaykichispaqwan, nispa.

²⁵Paykunataq kutichirqanku: —Kawsachiwarqankikun, munanki chayqa, Faraonpa kamachinmi kapusaqku, nispa.

²⁶Hinaqtinmi Joseqa Egipto suyupi kamachikuyta churarqan, phisqakaq t'aqasqata Faraonpaq t'aqanapaq, chaymi kunankama kashanraq. Sacerdotekunallan mana imatapas qonankuchu, hallp'ankuqa manan hayk'aqpas Faraonpachu kapurqan.

²⁷Israel runakunan Egipto suyupi tiyarqan, Gosén hallp'api. Chaypin tiyaykurqanku, anchatapunitaq askhayarqankupas.

²⁸Jacobmi Egipto suyupi tiyarqan chunka qanchisniyoq watata, pachak tawa chunka qanchisniyoq watata kawsanankama.

²⁹Israelmi wañukapunanta reparakuspa, churin Joseta waqyachimuspa nirqan: —Sumaqta qhawariwanki chayqa, valekuyki makiykita phakay ukhuman churaykuy, prometewankin hunt'anaykipaq. Valekuyki ama Egiptopi p'ampawanaykipaq.

³⁰Machulaykunawan ch'illmiykapuqtiytaq Egiptomanta apawanki, hinaspa p'ampawanki paykunaq aya p'ampananpi, nispa. Josetaq kutichirqan: —Nisqaykita hinan ruwasaq, nispa.

³¹Chaymi Israelqa nirqan: —Jurapuway, nispa. Josetaq paypaq jurarqan. Hinan Israelqa k'umuykurqan puñuna sawna patapi.