Read Quechua Cuzco Bible 1988 GÉNESIS 49 Bible Online

GÉNESIS 49 - Quechua Cuzco Bible 1988 bible

GÉNESIS 49

¹Jacobmi churinkunata waqyaspa nirqan: —Huñukuychis, qhepa p'unchaykunapi imaynachus kanaykichistan sut'inchasqaykichis:

²—Huñukuychis, hinaspa uyariychis, Jacobpa churinkuna, uyariychis taytaykichis Israelta.

³Rubén, qanmi phiwiy kanki, kallpay, churiyay qallarisqay, allinnin manchana, allinnin atiyniyoq.

⁴Unu hina mana hark'achikuq, manan qollanachu kapunki, taytaykiq tiyaqmasin warmiwan puñukusqaykirayku, chaypachan pisichawarqanki.

⁵Simeonwan Leviwanqa wawqentinmi kanku, mana chanin arman armankuqa.

⁶Ama paykunawanqa rimanakusaqchu, amataq paykunawanqa huñunakusaqchu. Phiñakuspankun runata wañurqarichirqanku, yanqa qasitaq torokunaq hank'unta kuchurarqanku.

⁷Ñakasqa kachun millayllaña k'arak phiñakuyninku. ñakasqa kachun sinchillaña phiñakuyninku. Ñoqan Jacobpa miraynin ukhupi paykunata rakirasaq, Israel llaqtapitaq paykunata ch'eqeykachisaq.

⁸Judá, wawqeykikunan yupaychasunki, makiykiqa awqaykikunaq much'unpin, wawqeykikunan k'umuykamusunki.

⁹Uña león hinan Judaqa, mikhusqaykimanta kutimuspaykin, churíy, k'umuykurqanki, león hina thallaykurqanki, china león hina. ¿Pitaq qanta rikch'arichisunkiman?

¹⁰Manan kamachikuy varaqa Judamanta chinkanqachu, manallataq hap'isqan varaqa chinkanqachu, varayoq hamunankama, paytataqmi runakuna kasunqaku.

¹¹Uvas yuraman malta asnota wataspa, sumaq uvas tulluman china asnonpa uñanta wataspa, p'achanta vinopi t'aqsarqan, uvas unupi p'achanta t'aqsarqan.

¹²Ñawinqa vinowan pukayachisqan, kiruntaq lechewan yuraqyachisqa.

¹³Zabulonqa mama qocha patapin tiyanqa, barcokunaq chayananmi kanqa, qorpantaq Sidonkama kanqa.

¹⁴Isakarqa kallpasapa asnon, uywa kancha ukhupi samakuq.

¹⁵Rikurqanmi samanaqa allin kasqanta, hallp'apas sumaq kasqanta, chaymi q'epiykachikullarqan, hukpaqmi llank'arqan.

¹⁶Danqa llaqtantan kamachinqa Israel huknin ayllu hina.

¹⁷Danmi kanqa ñan pata mach'aqway, ñan pata katari, caballoq chakinta k'utuq, hinaspa sillaykusqata qhepaman urmachiq.

¹⁸¡Qespichiwanaykitan suyakuni, Señor Diosnilláy!

¹⁹Gadtaqa qechuqkunan llat'ananqa, chaypas paymi paykunataqa qhepata llat'ananqa.

²⁰Aserpa t'antanqa sumaqllañan kanqa, paymi rey mikhunata hina haywanqa.

²¹Neftaliqa china taruka hina purikuqllan, munay tarukachakunata wachaq.

²²Joseqa llanllashaq sach'a hinan, pukyu patapi rururashaq sach'a hinan, k'allmankunan perqa pataman mast'arikun.

²³Paytaqa wach'iqkunan cheqnikurqanku, wach'irqanku, qatiykachashallarqanku,

²⁴chaypas wach'inanqa qaqatan sayarqan, makintapas Jacobpa kallpayoq Diosninmi kallpacharqan, payqa Israelpa Michiqninmi, Waqaychaqninmi.

²⁵Taytaykiq Diosninmi yanapasunki, Tukuy-atiyniyoq Diosmi saminchasunki hanaq pacha saminchakunawan, mama qocha ukhu saminchakunawan, askha wawakunawanpas.

²⁶Taytaykiq saminchankunaqa wiñay-wiñay orqokunamantapas aswanraqmi, wiñay-wiñay orqokunaq qhapaq kaqninkunamantapas aswanraqmi, chaykuna Josepaq kachun, wawqenkunamanta t'aqasqapaq kachun.

²⁷Benjaminqa qechukuq atoqmi, tutamanta mikhunqa qechusqanta, ch'isiyaykuytataq rakinqa qechusqankunata, nispa.

²⁸Chaykunan chunka iskayniyoq Israel ayllu, chaytan taytankuqa sapankata saminchashaspa nirqan.

²⁹Chaymantataq paykunata kamachirqan: —Wañukapullasaqñan, machulaykunaqpin p'ampapuwankichis, Het runa Efronpa chakranpi kashaq qaqa wasipi,

³⁰Makpela chakrapi kashaq qaqa wasipi. Chaymi Canaán hallp'a Mamreq inti lloqsimuyninpi kashan. Chaytan chay chakratawan kuska Abrahamqa aya p'ampananpaq Het runa Efronmanta rantisqa.

³¹Chaypin p'amparqanku Abrahamtapas warmin Saratapas, chaypin p'amparqayku Isaactapas warmin Rebecatapas, chaypin Leatapas ñoqa p'amparqani.

³²Chakrapas chaypi kaq qaqa wasipas Hetpa churinkunamanta rantisqan, nispa.

³³Churinkunata Jacob kamachiyta tukuqtintaq puñunanpi chakinqa k'unkuykurqan, hinaspan wañukapurqan, machulankunamantaq huñukapurqan.