Read Quechua Cuzco Bible 1988 GÉNESIS 5 Bible Online

GÉNESIS 5 - Quechua Cuzco Bible 1988 bible

GÉNESIS 5

¹Kaymi Adanpa miraynin qelqa. Diosqa runata kamaspa kikin Diosman rikch'akuqtan ruwarqan.

²Qharita warmitawan kamarqan, hinaspan paykunata samincharqan. Kamasqa kasqanku p'unchaytaq paykunata “Runa” nispa suticharqan.

³Adanqa pachak kinsa chunka watayoq kashaspataq, churiyarqan huk qhari wawata payman rikch'akuq rikch'ayniyoqta, suticharqantaq Set-ta.

⁴Set-ta churiyasqan qhepatataq Adanqa kawsarqan pusaq pachak watatawanraq, churiyallarqantaq qhari wawakunatapas warmi wawakunatapas.

⁵Adanmi kawsarqan isqon pachak kinsa chunkayoq watakama, hinaspan wañukapurqan.

⁶Setmi pachak phisqayoq watayoq kashaspa churiyarqan Enosta.

⁷Enosta churiyasqan qhepatataq Setqa kawsarqan pusaq pachak qanchisniyoq watatawanraq, churiyallarqantaq qhari wawakunatapas warmi wawakunatapas.

⁸Setmi kawsarqan isqon pachak chunka iskayniyoq watakama, hinaspan wañukapurqan.

⁹Enosmi isqon chunka watayoq kashaspa churiyarqan Kenanta.

¹⁰Kenanta churiyasqan qhepatataq Enosqa kawsarqan pusaq pachak chunka phisqayoq watatawanraq, churiyallarqantaq qhari wawakunatapas warmi wawakunatapas.

¹¹Enosmi kawsarqan isqon pachak phisqayoq watakama, hinaspan wañukapurqan.

¹²Kenanmi qanchis chunka watayoq kashaspa churiyarqan Mahalaleelta.

¹³Mahalaleelta churiyasqan qhepatataq Kenanqa kawsarqan pusaq pachak tawa chunkayoq watatawanraq, churiyallarqantaq qhari wawakunatapas warmi wawakunatapas.

¹⁴Kenanmi kawsarqan isqon pachak chunkayoq watakama, hinaspan wañukapurqan.

¹⁵Mahalaleelmi soqta chunka phisqayoq watayoq kashaspa churiyarqan Jaredta.

¹⁶Jaredta churiyasqan qhepatataq Mahalaleelqa kawsarqan pusaq pachak kinsa chunkayoq watatawanraq, churiyallarqantaq qhari wawakunatapas warmi wawakunatapas.

¹⁷Mahalaleelmi kawsarqan pusaq pachak isqon chunka phisqayoq watakama, hinaspan wañukapurqan.

¹⁸Jaredmi pachak soqta chunka iskayniyoq watayoq kashaspa churiyarqan Enokta.

¹⁹Enokta churiyasqan qhepatataq Jaredqa kawsarqan pusaq pachak watatawanraq, churiyallarqantaq qhari wawakunatapas warmi wawakunatapas.

²⁰Jaredmi kawsarqan isqon pachak soqta chunka iskayniyoq watakama, hinaspan wañukapurqan.

²¹Enokmi soqta chunka phisqayoq watayoq kashaspa churiyarqan Matusalenta.

²²Matusalenta churiyasqan qhepatataq Enokqa kinsa pachak watatawanraq kawsarqan Diospa munayninta ruwaspallapuni, churiyallarqantaq qhari wawakunatapas warmi wawakunatapas.

²³Enokmi kawsarqan kinsa pachak soqta chunka phisqayoq watakama.

²⁴Paymi Diospa munayninta ruwaspallapuni purirqan, hinaspan mana kapurqanchu, Dios payta pusakapusqanrayku.

²⁵Matusalenmi pachak pusaq chunka qanchisniyoq watayoq kashaspa churiyarqan Lamekta.

²⁶Lamekta churiyasqan qhepatataq Matusalenqa kawsarqan qanchis pachak pusaq chunka iskayniyoq watatawanraq, churiyallarqantaq qhari wawakunatapas warmi wawakunatapas.

²⁷Matusalenmi kawsarqan isqon pachak soqta chunka isqonniyoq watakama, hinaspan wañukapurqan.

²⁸Lamekmi pachak pusaq chunka iskayniyoq watayoq kashaspa qhari wawata churiyarqan,

²⁹suticharqantaq Noeta: —Kaymi ruwayninchismanta samarichiwasun, kay pachata Señor Diospa ñakasqanraykun sinchita llank'ashanchis, nispa.

³⁰Noeta churiyasqan qhepatataq Lamekqa kawsarqan phisqa pachak isqon chunka phisqayoq watatawanraq, churiyallarqantaq qhari wawakunatapas warmi wawakunatapas.

³¹Lamekmi kawsarqan qanchis pachak qanchis chunka qanchisniyoq watakama, hinaspan wañukapurqan.

³²Noetaq phisqa pachak watayoq kashaspa churiyarqan Semta, Kamta, Jafet-tawan.