Read Quechua Cuzco Bible 1988 GÉNESIS 50 Bible Online

GÉNESIS 50 - Quechua Cuzco Bible 1988 bible

GÉNESIS 50

¹Hinaqtinmi Joseqa taytanta oqllaykuspa waqarqan, much'aykurqan.

²Chaymantataq Joseqa kamachirqan hampiq kamachinkunata taytanta hampikunawan ch'arkinankupaq, chaymi hampiqkunaqa Israelta ch'arkirqanku.

³Tawa chunkantin p'unchaymi payta ch'arkirqanku, ahinan hunt'akuq ch'arkisqakunapaq. Egipto runakunataq qanchis chunka p'unchayta Jacobmanta lutokurqanku.

⁴Llakikusqan p'unchay qhepatataq Joseqa rimapayarqan Faraonpa wasinpi kaqkunata: —Sumaqta qhawariwankichis chayqa, valekuykichis Faraonta rimapayapuwaychis:

⁵Taytaymi jurachiwarqan: Wañukapusaqmi, Canaán suyupi aya p'ampanata ñoqapaq hap'ikurqani, chaypin p'ampawanki, nispan. Valekuyki kunan rispay taytayta p'ampamunaypaq, hinaspataq kutimpusaq, nispa.

⁶Hinan Faraonqa nirqan: —Riy, taytaykita p'ampamuy, pay jurachisqasuykiman hina, nispa.

⁷Josemi rirqan taytanta p'ampamuq, paywan rillarqankutaq Faraonpa llapa oficialninkuna, wasinpi kaq kurak runakuna, Egipto suyupi llapa kurak runakunapiwan,

⁸Josepa ayllunpiwan, wawqenkunapiwan, taytanpa ayllunpiwan. Gosén hallp'apiqa saqeykurqanku wawakunallatan, ovejankutawan wakankutawan.

⁹Rillarqantaqmi paywanqa carretakunapas caballopi sillaykusqakunapas, chay hinapin askhallaña runa karqan.

¹⁰Hinaspanmi chayarqanku Atad erakama, chaymi kashan Jordán chimpapi, chaypin waqarqanku khuyay sonqo nanayta yupakuspa, Josetaq taytanmanta lutokurqan qanchis p'unchayta.

¹¹Chayneqpi tiyaq Canaán runakunataq Atad erapi waqaqta rikuspa, nirqanku: —Kayqa Egipto runakunaq sonqo nanayta waqayninmi, nispa. Chaymi chayta suticharqanku Abel-mizraimta[50], chaymi kashan Jordán chimpapi.

¹²Jacobpa wawankunan paypaq ruwarqanku taytankuq kamachisqanman hina.

¹³Canaán suyumanmi aparqanku hinaspan Makpela chakra qaqa wasipi p'ampamurqanku, chaytan chay chakratawan kuska Abraham rantisqa Het runa Efronmanta, aya p'ampanapaq, Mamreq inti lloqsimuyninpin kashan.

¹⁴Hinaspataqmi p'ampasqanku qhepata Joseqa Egiptoman kutipurqan, paypas, wawqenkunapas, taytanta p'ampamuq paywan llapa riqkunapas.

¹⁵Taytanku wañukapusqan qhepatataq Josepa wawqenkunaqa ninakurqanku: —Joseqa cheqniwasunpaschá, lliw mana chaninta payta ruwasqanchismanta aynitapaschá kutichiwasun, nispa.

¹⁶Hinaspanmi Joseman kacharqanku: Taytanchismi manaraq wañukapushaspa kamachikurqan:

¹⁷Kay hinata Joseta ninkichis: Valekuyki, wawqeykikunaq mana chanin ruwasqan huchanta pampachanaykipaq, mana allintan rikurqasunkiku riki, nispa. Chayrayku kunan valekuykiku taytanchispa Diosninpa kamachinkunaq mana chanin ruwasqaykuta pampachawanaykikupaq, nispa, nichimunankupaq. Josetaq waqarqan willaqkuna rimashaqtinku.

¹⁸Hamullarqankutaq wawqenkunapas, hinaspa ñawpaqenpi pampakama k'umuykukurqanku, nirqankutaq: —Kaypin kashayku kamachiyki kanaykupaq, nispa.

¹⁹Josetaq ichaqa paykunata nirqan: —Ama manchapakuychischu, ñoqaqa manan Dioschu kani.

²⁰Qankunaqa mana allinniypaqmi yuyaykurqankichis, Diostaq allinman tukuchirqan kunan rikusqanchista ruwanapaq, askha runata kawsachinapaq.

²¹Ahinaqa, ama manchapakuychischu, ñoqan uywasqaykichis qankunatapas wawaykichistapas, nispa. Chay hinatan paykunata sonqocharqan, sumaqtataq rimapayarqanpas.

²²Josemi Egiptopi tiyarqan, paypas, taytanpa ayllunpas. Joseqa kawsarqan pachak chunkayoq watatan,

²³rikurqantaq Efrainpa wawankunata kinsakaq miraykama, Manasespa churin Makirpa wawankunapas Josepa moqon patapin uywasqa karqanku.

²⁴Chay qhepatataq Joseqa wawqenkunata nirqan: —Wañukapusaqmi, cheqaqtapunin Diosqa watukamusunkichis, hinaspan kaymanta pusapusunkichis Abrahamman, Isaacman, Jacobmanwan prometesqan hallp'aman, nispa.

²⁵Hinaspan Joseqa Israelpa wawankunata jurachirqan: Cheqaqtapunin Diosqa watukamusunkichis, chaypachan tulluykunataqa kaymanta apapunkichis, nispa.

²⁶Josemi wañukapurqan pachak chunkayoq watayoq, hinan hampikunawan ch'arkirqanku, Egiptopitaq huk cajonpi churaykusqa karqan.