Read Quechua Cuzco Bible 1988 GÉNESIS 6 Bible Online

GÉNESIS 6 - Quechua Cuzco Bible 1988 bible

GÉNESIS 6

¹Kay pachapi mirayta runa qallariqtintaq, paykunapaq warmi wawakuna nacerqan.

²Hinan Diospa wawankunaqa runakunaq ususinkunata sumaq rikch'ayniyoq kasqanta qhawarispa, lliwmanta akllarikuspa, pi munasqankuwan casarakurqanku.

³Señor Diostaq nirqan: —Espirituyqa manan wiñaypaqchu runapi kashanqa, payqa wañuq runallan, cheqaqpunin runaqa aychalla. P'unchayninkunaqa pachak iskay chunkayoq watalla kachun, nispa.

⁴Diospa wawankuna runakunaq ususinkunawan tiyaspanku, qhari wawakunata churiyarqanku. Hinan chay tiempopipas qhepamanpas kay pachapi hatuchachaq runakuna karqan. Chaykunan ñawpaqmantapacha karqanku kallpasapa mentasqa qharikuna.

⁵Señor Diostaq rikurqan kay pachapi runakunaq sinchi mana allin kasqanta, sonqonkuq lliw yuyaykuyninpas mana allillanpuni kasqantawan.

⁶Hinan Señorqa pesapakurqan kay pachapi runata ruwasqanmanta, sonqonpipas mayta llakikurqan.

⁷Chaymi Señor Diosqa nirqan: —Kay pachapi runa kamasqayta ch'usaqyachisaq, runatapas uywatapas suchuq animaltapas phalaq animalkunatapas, chaykunata ruwasqaymantan pesapakuni, nispa.

⁸Noetaq ichaqa Señor Diospa khuyapayasqan karqan.

⁹Kaymi Noemanta willakuykuna: Noeqa karqan chanin qharin, wiñay-masinkuna ukhupi allin kawsaq, payqa Diospa munayninta ruwaspallapunin kawsarqan.

¹⁰Noepa churinkunan kinsa karqan: Sem, Kam, Jafetpiwan.

¹¹Runakunaqa Diospa qayllanpin waqllipurqanku, kay pachantinpitaq lliw mana chanin-kaypas q'oñirirqan.

¹²Diosmi kay pachata qhawarimurqan, hinan waqllisqa kasharqan, lliw runan kay pachapi puriyninpi waqllipusqa.

¹³Chaymi Noeta nirqan: —Llapan kawsaqtan p'uchukachipusaq, paykuna hawa kay pacha mana chanin-kaywan hunt'a kashasqanrayku, kunantaq kay pachatawan kuskata paykunata p'uchukachipusaq.

¹⁴Ciprés sach'a kurkumanta tuyuq wasita ruway, chaypi wasikunata ruway, ukhuntawan hawantawantaq breawan llut'anki.

¹⁵Kay hinatan chayta ruwanki: wask'anta pachak kinsa chunka phisqayoq metrota, anchonta iskay chunka iskayniyoq metro kuskanta, sayaynintataq chunka kinsayoq metro kuskanta.

¹⁶Tuyuq wasitan ruwanki kinsa pata altosniyoqta, chaytan qatanki, qempunpi huk kuskan metro sayay kicharayaqta chayta tukunki, punkuntataq ladonpi churanki.

¹⁷Ñoqataq kay pachata unuwan millp'uchisaq, kay pachapi hayk'an kawsaqta p'uchukachinaypaq, hayk'an kay pachapi kaqmi wañuranqa.

¹⁸Ñoqataq qanwan rimanakusaq, qanmi tuyuq wasiman haykunki warmiykiwan, hinallataq churiykikunapas warmintinkama qanwan kuska haykunqa.

¹⁹Hayk'an kawsaqmantataq sapanka t'aqamanta chinantin orqontintakama chayman haykuchinki, qanwan kawsanankupaq.

²⁰Phalaq animalkunamanta t'aqanman hina, uywakunamanta t'aqanman hina, pampanta lliw suchuqkunamanta t'aqanman hina, sapanka t'aqamanta iskaykama qanwan haykunqaku kawsanankupaq.

²¹Hinallataq imaymana niraq mikhunatapas huñuy, hinaspa apaykuy qanpas animalkunapas chayta mikhunaykichispaq, nispa.

²²Noetaq Diospa tukuy kamachisqanman hina ruwarqan.