Read Quechua Cuzco Bible 1988 GÉNESIS 7 Bible Online

GÉNESIS 7 - Quechua Cuzco Bible 1988 bible

GÉNESIS 7

¹Señor Diostaq Noeta nirqan: —Tuyuq wasiman haykuy llapa familiaykipiwan, qantan kay wiñay-masiykikuna ukhupi chaninta rikuyki.

²Lliw sacrificana animalmanta qanchis orqota qanchis chinatawan haykuchinki, mana sacrificana animalkunamantataq iskaytakama, orqotawan chinatawan.

³Hinallataq phalaq animalkunamantapas qanchis orqota qanchis chinatawan. Chaytaqa ruwanki kay pachantinpi sapanka t'aqa ama tukukunanpaq.

⁴Qanchis p'unchaymantataq ñoqa kay pachaman parachimusaq tawa chunka p'unchayta tawa chunka tutatawan, hinan hayk'an kawsaq ruwasqayta kay pachamanta ch'usaqyachisaq, nispa.

⁵Hinaqtinmi Noeqa Señor Diospa tukuy kamachisqanman hina ruwarqan.

⁶Noé soqta pachak watayoq kashaqtintaq unuqa kay pachata millp'urqan.

⁷Noetaq tuyuq wasiman warmintin haykurqan, hinallataq paywan kuska churinkunapas warmintinkama, millp'uq unumanta ayqenankupaq haykurqanku.

⁸Sacrificana animalkunamanta mana sacrificana animalkunamantapas, phalaq animalkunamantapas lliw pampanta suchuqkunamantapas,

⁹orqontin chinantin, iskay-iskaymanta Noewan tuyuq wasiman haykurqanku, Noeta Diospa kamachisqanman hina.

¹⁰Qanchis p'unchaymantataq millp'uq unu kay pachata millp'urqan.

¹¹Soqta pachak watayoq Noé kashaqtintaq, iskaykaq killapi, chunka qanchisniyoq p'unchaypi manchay chinkay-chinkay ukhumanta llapa pukyukuna t'oqyarqan, hanaq pacha phawchikunapas kicharikamurqan,

¹²hinaqtinmi kay pachapi sinchita pararqan tawa chunka p'unchayta tawa chunka tutatawan.

¹³Chay kikin p'unchaypin Noeqa tuyuq wasiman haykurqan, hinallataq churinkunapas Sem, Kam, Jafet, Noepa warminpas, churinkunaq kinsantin warminkunapas.

¹⁴Paykunawan llapa salqa animalkuna, uywakuna, pampanta llapa suchuqkuna, llapa phalaq animalkuna, llapa phalaq kurukunapas, t'aqankuman hina haykurqanku.

¹⁵Noepa kasqan tuyuq wasimantaq llapa animalkuna chinantin orqontinkama haykurqanku Diospa payta kamachisqanman hina. Señor Diostaq payta wisq'aykapurqan.

¹⁷Millp'uq unutaq kay pachapi tawa chunkantin p'unchayta p'ampasharqan, unun askhayaspa chay wasita hoqarirqan, hinan kay pachapi tuyurqan.

¹⁸Unutaq kay pachapi sinchitapuni hunt'aykusharqan, hinan unu patapi chay wasiqa tuyusharqan.

¹⁹Unutaq sinchitapuni wichasharqan, kay pachantinpi llapa hatuchachaq orqokunapas millp'usqan karqan.

²⁰Orqokunata millp'usqanmantapas qanchis metrotawanraq unu wicharqan.

²¹Lliw kawsaqmi kay pachapi wañurqan, phalaq animalkuna, uywakuna, animalkuna, pampanta llapa suchuqkuna, llapa runapas.

²²Llapa samayniyoq hayk'an hallp'a pachapi kawsaqmi wañurqan.

²³Ahinatan Diosqa kay pachamanta lliw kawsaqta ch'usaqyachirqan, runatapas animalkunatapas, pampanta suchuqkunatapas, phalaq animalkunatapas. Noé sapallanmi qheparqan, paywan tuyuq wasipi kaqkunapiwan.

²⁴Unutaq kay pachapi qocharayarqan pachak phisqa chunkayoq p'unchayta.