Read Quechua Cuzco Bible 1988 GÉNESIS 8 Bible Online

GÉNESIS 8 - Quechua Cuzco Bible 1988 bible

GÉNESIS 8

¹Diostaq Noeta yuyarikurqan, hinallataq tuyuq wasipi paywan kaq lliw animalkunatapas, lliw uywakunatapas. Diosmi kay pachaman wayrachimurqan, hinan unuqa pisiyayta qallarirqan.

²Chinkay-chinkay unu pukyukunataq wisq'akapurqan, hinallataq hanaq pacha phawchikunapas, manañataq parampurqanchu.

³Hinaqtinmi unuqa kay pachapi ch'akiykapusharqan kayman chayman aytikuspa. Pachak phisqa chunkayoq p'unchay qhepata unuqa pisiyaykapurqan,

⁴hinan tuyuq wasiqa tiyaykurqan Ararat orqo-orqopi, qanchiskaq killaq chunka qanchisniyoq p'unchayninpi.

⁵Unun pisiyasharqan chunkakaq killakama, chunkakaq killa qallariypi orqokunaq uman rikhurirqan.

⁶Tawa chunka p'unchay qhepatataq, Noeqa tuyuq wasipi qhawana t'oqo ruwasqanta kicharirqan,

⁷hinaspan alqamarita kacharqan, chaytaq lloqsispa muyurqan unu kay pachapi ch'akipunankama.

⁸Hinallataq urpitapas kacharqan kay pachapi unu ch'akipusqañachus chayta yachananpaq,

⁹urpitaq mana tarirqanchu maypi tiyaykunanta kay pachantinpi unu kashasqanrayku. Chaymi Noeman kutimpurqan tuyuq wasiman, hinaqtinmi payqa hap'ispa kasqan wasiman apaykurqan.

¹⁰Hinaspataq qanchis p'unchaytawanraq suyarqan, yapamantataq wasimanta urpita kacharqan.

¹¹Hinan urpiqa payman kutipurqan llanllashaq olivo raphita chhurunanpi achuykusqa. Chaymi Noeqa yacharqan kay pachapi unu ch'akipusqanta.

¹²Hinaqtinmi huk qanchis p'unchaytawanraq suyarqan, hinaspan urpita kachallarqantaq, manañataq astawan urpiqa payman kutipurqanchu.

¹³Soqta pachak hukniyoq watayoq Noé kashaqtintaq, ñawpaqkaq killa qallariy p'unchayta, unuqa kay pachapi ch'akipurqan. Hinan Noeqa tuyuq wasi qatata kicharispa qhawarirqan, hinaspan rikurqan kay pachaqa ch'akipusqanta.

¹⁴Iskaykaq killaq iskay chunka qanchisniyoq p'unchayninpitaq kay pachaqa ch'akillaña kapurqan.

¹⁵Diostaq Noeta nirqan:

¹⁶—Tuyuq wasimanta warmiykipiwan lloqsiy, hinallataq churiykikunapas warmintinkama.

¹⁷Horqonki llapa t'aqa animalkunata, phalaq animalkunata, uywakunata, pampanta llapa suchuqkunata. Purichunku kay pachantinman, mirachunku askhayachunkutaq, nispa.

¹⁸Chaymi Noeqa warmintin lloqsirqan, hinallataq churinkunapas warmintinkama.

¹⁹Kaqllataq tuyuq wasimanta lloqsirqan llapa animalkuna, llapa phalaq animalkunapas, pampanta llapa suchuqkunapas t'aqankuman hina.

²⁰Noetaq Señor Diospaq huk altarta perqaspaña, hap'irqan llapa sacrificana animalmanta, llapa sacrificana phalaq animalmanta, hinaspanmi altarpi ruphachispa sacrificiokunata haywarqan.

²¹Señor Diostaq sumaq q'apayta chaskispan sonqonpi nirqan: —Manañan runa hawa kay pachata ñakasaqchu, wayna-kayninmantapachan runaq sonqonqa mana allin yuyaykuq, manañan astawan lliw kawsaqta ch'usaqyachisaqchu kunan ruwasqayta hinaqa.

²²Chaywanpas kay pacha kanankamaqa kanqaraqmi tarpuypas, cosechapas, chiripas, q'oñipas, poqoypas, chirawpas, p'unchaypas, tutapas, nispa.