Read Quechua Cuzco Bible 1988 GÉNESIS 9 Bible Online

GÉNESIS 9 - Quechua Cuzco Bible 1988 bible

GÉNESIS 9

¹Diostaq Noeta churinkunatapas saminchaspa nirqan: —Askhata miraychis, kay pachata hunt'aykuychis.

²Qankunatataq anchatapuni manchakusunkichis kay pacha lliw animalkuna, phalaq animalkunapas, hayk'an pampanta suchuqkunapas, mama qocha lliw challwakunapas, chaykunaqa makiykichispiñan.

³Chaykunaqa mikhunaykichispaqmi kanqa, hinallataq yuyukunapas q'omer yurakunapas. Lliwtan qoykichis.

⁴Yawarnintin aychatan ichaqa ama mikhunkichischu, yawarpin kawsayqa kashan.

⁵Runa wañuchiqtaqa huchachasaqpunin, animaltapas runatapas, runa masinta wañuchiqtapas.

⁶Runa wañuchiqtaqa runallataqmi wañuchinqa, Diospa rikch'ayninman runaqa ruwasqa kasqanrayku,

⁷qankuna ichaqa askhata miraychis, kay pachata hunt'aykuychis, nispa.

⁸Diosmi Noeta churinkunatawan nillarqantaq:

⁹—Ñoqan kunan qankunawan mirayniykichiswanpas rimanakuni,

¹⁰hinallataq tuyuq wasimanta qankunawan lloqsimuq llapa kawsashaqkunawanpas rimanakuni: phalaq animalkunawan, uywakunawan, salqa animalkunawanpas.

¹¹Qankunawanmi rimanakuni, manañan astawan millp'uq unu kanqachu llapa kawsashaqta p'uchukachinapaq, kay pachatapas p'ampachinapaq.

¹²Kaymi kanqa qankunawan lliw kawsaqwan wiñay-wiñaypaq rimanakusqay señal:

¹³K'uychiyta phuyupi sayachini, kaymi kay pachawan rimanakusqay señal kanqa.

¹⁴Kay pachaman phuyuchimuqtiytaq phuyupi k'uychiyqa rikhurinqa.

¹⁵Chaymi yuyarisaq qankunawan lliw kawsaqwanpas rimanakusqayta, manañataq astawan kanqachu millp'uq unu lliw kawsaqta p'uchukachinapaq.

¹⁶Phuyupi k'uychiy kaqtinmi, ñoqa chayta rikuspay ñoqawan kay pachapi lliw kawsaqwanpas rimanakusqayta yuyarisaq, nispa.

¹⁷Diosmi Noeta nirqan: —Kaymi kay pachapi kaq lliw kawsaqwan rimanakusqay señal churasqa, nispa.

¹⁸Tuyuq wasimanta lloqsimuq Noepa churinkunataq karqan Sem, Kam, Jafetpiwan. Kamtaq Canaanpa taytan karqan.

¹⁹Chay kinsantinmi Noepa churinkuna, paykunaq mirayninmi kay pachantinman mast'arikurqan.

²⁰Noemi chakra llank'ayta qallarirqan, hinaspan uvas chakrata ruwarqan.

²¹Vinota ukyaspataq macharqapurqan, hinaspan karpan ukhupi q'alalla wikch'urayasharqan.

²²Canaanpa taytan Kamtaq taytanpa q'ala-kayninta rikurqan, hinaspan hawapi kashaq iskaynin wawqenkunaman chayta willamurqan.

²³Hinaqtinmi Semqa Jafetpiwan qatanata hoqarirqanku, hinaspanmi iskayninku chayta rikrankuman churaykukuspa, mana qhepankuta qhawaspa qhepanpamanta rispa, taytankuta qataykurqanku, chay hinapin taytankuq q'ala-kayninta mana rikurqankuchu.

²⁴Noetaq ch'aki sonqo kapuspan, yacharqan sullk'akaq churinpa chay hinasqanta.

²⁵Chaymi nirqan: —¡Ñakasqa kachun Canaán! ¡Wawqenkunaq kamachinpa kamachin kachun! nispa.

²⁶Nillarqantaq: —¡Sempa Diosnin Señorqa saminchasqa kachun, Canaantaq Sempa kamachin kachun!

²⁷¡Jafet-ta Dios hatunchachun, Sempa karpankunapitaq tiyachun, Canaantaq Jafetpa kamachin kachun! nispa.

²⁸Noetaq kawsarqan millp'uq unu qhepamanta kinsa pachak phisqa chunkayoq watata,

²⁹hinaspan wañukapurqan isqon pachak phisqa chunkayoq watayoq kashaspa.