Read Quechua Cuzco Bible 1988 2 SAMUEL 1 Bible Online

2 SAMUEL 1 - Quechua Cuzco Bible 1988 bible

2 SAMUEL 1

¹Saulpa wañupusqan qhepatan, Davidqa Amalek runakunata maqanakuypi atipasqanmantaña Siklag llaqtaman kutimpurqan, hinaspan chaypi iskay p'unchay kasharqan.

²Kinsakaq p'unchaytaq Saulpa karpa-karpanmanta huk wayna hamurqan, p'achanpas llik'i-llik'i umanpas hallp'akama. Davidpa ñawpaqenman qayllaykuspataq, manchakuywan pampakama k'umuykukurqan.

³Chaymi Davidqa tapuykurqan: —¿Maytan hamushanki? nispa. Paytaq kutichirqan: —Israelpa karpa-karpanmantan ayqerqamuni, nispa.

⁴Davidtaq nirqan: —¿Imataq karqonri? ¡Willaykuwayyari! nispa. Paytaq kutichirqan: —Soldadokunan awqa-tinkuypi atipasqa ayqepunku, askhataqmi wañusqakunapas, hinallataq Saulpas churin Jonatanpiwan wañupun, nispa.

⁵Hinan Davidqa willaqnin waynata nirqan: —¿Imaynapitaq yachanki Saulqa churin Jonatanpiwan wañusqantari? nispa.

⁶Waynataq kutichirqan: —Gilboa orqopi qonqaylla kashaspaymi rikurqani Saulta lanzanman k'iraykusqata, runakunapas caballopi carretakunapiwan payta muyuykushaqta.

⁷Hinan Saulqa qhepanta qhawarikuspa rikurqowarqan, waqyariwarqantaq. Chaymi nirqani: ¿Ima ninkin? nispa.

⁸Paytaq tapuykuwarqan: ¿Mayqenmi kashanki? nispa. Ñoqataq nirqani: Amelek runan kani, nispa. Hinan niwarqan:

⁹Kawsaspaymi llakikuyta nanayta muchushani, ama hinachu kay, wañurqachiway, nispa.

¹⁰Chaymi qayllaykuspay, urmasqanpi manaña kawsaq hina kasqanta yachaspay, wañurqachirqani. Umanpi kaq coronata makinpi kaq argollatawan horqorqani, chaymi kaykunata apamuyki, wiraqocháy, nispa.

¹¹Hinan Davidqa llakikuymanta p'achanta llik'ikurqan, paywan kashaq qharikunapas kaqllatataq ruwarqanku.

¹²Qhasqonkuta takakuspanku waqarqanku, tutakamataq ayunarqanku Saulmanta, churin Jonatanmanta, Israel llaqtamanta, Señor Diospa soldadonkunamantawan, paykuna maqanakuypi wañuchisqa kasqanrayku.

¹³Davidqa willaqnin waynata tapuykullarqantaqmi: —¿Maymantan kanki? nispa. Waynataq kutichirqan: —Karu llaqtayoq Amalek runan kani, nispa.

¹⁴Davidtaq nirqan: —¿Imaynan qanqa wañurqachirqanki Señor Diospa akllakusqan reyta? ¿Manachu makiyki haywariyta manchakurqanki?

¹⁵Qan kikiykin simiykiwan rimarinki Señor Diospa akllakusqan reyta wañuchisqaykita, qan kikiykin wañunaykipaq huchachakunki, nispa. Soldadonkunamanta huknin waynata waqyarispataq kamachirqan: —Phaway wañuchimuy, nispa. Hinan payqa hukpaqkama chay Amalek runata wañurqachirqan.

¹⁷Davidmi kay harawita kamarirqan, Saulmanta churin Jonatanmantawan llakikunanpaq, hinallataq Judá runakuna kay P'eqta Harawi nisqata yachanankupaq kamachikurqan. Kay harawiqa Jaser nisqa qelqapin qelqasqa kashan:

¹⁹¡Israelpa uma qollananmi orqokunapi tukukun! ¡Ikiraqmi! ¡Imaraqmi! ¡Kallpasapakunaqa urmanku!

²⁰Aman Gat llaqtapiqa chayta willakunkichischu, aman Askalón llaqta callekunapiqa rimarinkichischu, Filistea runakunaq warminkunachari kusikunman, mana iñiqkunaq ususinkunachari kusisqa saltanman.

²¹Gilboa orqo-orqoqa ama ruruchiq hallp'añachu kachun, amaña parapas sullapas chaymanqa chayachunñachu, chaypin allin qharikunaq escudon pisichasqa karqan, manañan Saulpa escudon aceitewan lliphllikinñachu.

²²Jonatanqa wach'inanwan wach'ispa hap'ichillaqpunin, Saulqa espadanwan maqanakuspa wañuchillaqpunin, qharikunatan wañuchiqku, kallpasapakunatan sipiqku.

²³¡Ancha munasqan Saulwan Jonatanpiwan karqanku! Wañuspankupas kawsaspankupas manapunin t'aqanakurqankuchu. Ankamantapas aswan phawaqmi karqanku, leonmantapas aswan kallpayoqmi karqanku.

²⁴Israel warmikuna, Saulmanta waqaychis, payqa sumaq sani-puka p'achawanmi p'achachirqasunkichis, qori umiñawan sumaqchasqa p'achawanmi p'achachirqasunkichis.

²⁵¡Ikiraqmi! ¡Imaraqmi! ¡Kallpasapakunaqa maqanakuypi urmanku! ¡Jonatanqa orqoykichispin wañusqa chutarayashan!

²⁶Wawqéy Jonatán, anchatan qanmanta llakikushani, ñoqapaqqa ancha sumaqpunin karqanki, munakuyniykipas warmikunaq munakuyninmantaqa aswan sumaqpunin karqan.

²⁷¡Ikiraqmi! ¡Imaraqmi! ¡Kallpasapakunaqa maqanakuypi urmanku! ¡Maqanakuna armakunaqa tukukapunmi! nispa.