Read Quechua Cuzco Bible 1988 2 SAMUEL 15 Bible Online

2 SAMUEL 15 - Quechua Cuzco Bible 1988 bible

2 SAMUEL 15

¹Chaymantataq Absalonqa wakichikurqan huk carretata caballokunatawan, phisqa chunka qharikunatataq ñawpaqenta phawananpaq.

²Tutallamanta hatarispataq Absalonqa llaqta punkuman sapa p'unchay suyaq rirqan. Pleitoyoqkuna chaninchasqa kananpaq reyman hamuqtintaq, payqa waqyarispa tapuykurqan: —¿Mayqen llaqtamantan kanki? nispa. —Israelpa huknin ayllunmantan kani, niqtintaq,

³Absalonqa nirqan: —Mañakusqaykiqa allinmi chaninmi, ichaqa manan pipas kanchu reypa churasqan uyarinasuykipaq.

⁴¡Ñoqalla kay suyupi juez kayman, llapan pleitoyoq runakunapaq chaninchapuyman! nispa.

⁵Hinallataq payman qayllaykuspa napaykuqninkunata Absalonqa makinta haywarispa oqllaykurqan, hinaspa much'aykurqan.

⁶Ahinata chaninchasqa kananpaq reyman hamuq sapanka Israel runata ruwarqan, chhaynapin runakunaq sonqonta suwarqan.

⁷Tawa watamantañataq Absalonqa reyta nirqan: —Valekuykin Hebrón llaqta rinaypaq Señor Diosman prometekusqayta hunt'aq.

⁸Aram suyu Gesur llaqtapi kashaspan prometekurqani: Jerusalenman Señor Dios kutichiwanqa chayqa, payta yupaychasaq, nispa.

⁹Hinan reyqa: —Allinmi, sumaqllaña rirqoy, nirqan. Chaymi Absalonqa Hebrón llaqtaman rirqan.

¹⁰Ichaqa llapan Israel ayllukunamanpas willaqkunata kacharqan: Pututu tocaqta uyarispaykichisqa: ¡Absalonmi Hebronpi rey! nispa, qaparinkichis, ninankupaq.

¹¹Absalonmi Jerusalenmanta lloqsirqan iskay pachak invitasqan qharikunapiwan, paykunan riysirqan yuyaykusqanta mana yachaspa.

¹²Sacrificiota haywashaspantaq Absalonqa taytanpa yuyaychaqnin Gilo llaqtayoq Ahitofelta waqyachimurqan. David contra rimanakusqankuqa aswan-aswanmi yapakurqan, astawantaq Absalón qatikuq runakunapas askhayarqan.

¹³Hinan Davidman huk willakuq hamurqan: —Llapa Israel runan Absalonman k'askakun, nispa.

¹⁴Chaymi Davidqa Jerusalenpi llapa oficialninkunata nirqan: —¡Haku, ayqekusun, manan Absalontaqa atipasunmanchu! ¡Usqhaylla lloqsisun! Qonqaymi ayparqowasunman, hinaspan atipasqa rikukusunman, llapa runataq wañuchisqa kanman, nispa.

¹⁵Paykunataq nirqanku: —Ñoqaykuqa liston kashayku, señor reyniyku, imata kamachikuqtiykipas ruwanaykupaq, nispa.

¹⁶Hinan reyqa llapan familianpiwan lloqsirqan, tiyaqmasin chunka warmikunallatan saqerqan rey tiyana wasita qhawashanankupaq.

¹⁷Reytaq pay qatikuq llapa runakunapiwan lloqsispaña, llaqta tukukuy wasipi suyarqan.

¹⁸Hinan reypa ñawpaqenman pasarqan oficialninkuna, reypa guardian Keret runa Pelet runa ima, Davidwan Gatmanta hamuq llapan soqta pachak Gat llaqtayoq runakunapas.

¹⁹Chaymi Davidqa Gat llaqtayoq Itaita nirqan: —¿Qanpas rillawaqtaqchu? Ama riychu, kutipuy, hinaspa qhepakuy mosoq reywan, qanqa karu llaqtayoqmi kanki, llaqtaykimanta wikch'usqa.

²⁰Manan unayraqchu kaypi kasqayki, ¿imaynataq ñoqa pusarikullaykimantaq? Ñoqaqa manan yachanichu mayman rinaytapas. Kutipuy wawqeykikunapiwan, Señor Diosmi khuyapayaspa waqaychasunki, nispa.

²¹Hinan Itaiqa kutichirqan: —Señor reyníy, Señor Diospa sutinpin jurani, qanwanmi risaq maymanña riqtiykipas, kuskan wañusunpas kawsasunpas, nispa.

²²Davidtaq Itaita nirqan: —Chhaynaqa allinmi, haku, risunchis, nispa. Hinan Itaiqa llapa qharikunantin familiantinkama rirqan.

²³Llaqtapi qhepaq runakunataq reyta runakunatawan ripuqta rikuspa kunkayoqta waqarqanku. Davidtaq Kidrón mayuta pasaspa, llapan runakunapiwan ch'inneqman rirqan.

²⁴Hinallataq sacerdote Sadokpas Diospa rimanakuynin caja apaq Leví runakunapiwan rirqanku, hinaspan Abiatarpa qayllanman churaykurqanku llaqtamanta llapanku lloqsimunankama.

²⁵Reytaq ichaqa Sadokta nirqan: —Diospa cajanta llaqtaman kutichipuy. Señor Dios khuyakuwaspa munaqtinqa, kutimuspaymi rikusaqraq cajata maypichus kasqan cheqastawan.

²⁶Manataqchus khuyakuwan chayqa, munayninta ñoqawan ruwachun, nispa.

²⁷Nillarqantaq Davidqa sacerdote Sadokta: —¿Manachu reparanki? Kutipullay Jerusalenman ama llakikuspa, churiyki Ahimaaspiwan, Abiatarpa churin Jonatanpiwan.

²⁸Ñoqaqa ch'inneqpi mayu pasana cheqaspin qaynasaqraq imachus kasqanta willamuwanaykichiskama, nispa.

²⁹Hinan Sadokqa Abiatarpiwan Diospa cajanta Jerusalenman kutichipurqan, chaypitaq qhepakapurqanku.

³⁰Davidtaq Olivos nisqa orqota q'ala chakilla waqaspa wicharqan, umanta pakaykukuspa. Kaqllatataq paywan riqkunapas ruwarqanku.

³¹Ahitofelpa pay contra Absalonwan yuyaykushasqanta yachaspan Davidqa nirqan: —Ahitofelpa tukuy yuyaychasqanta Señor Dios tutayachichun, nispa.

³²Orqo patapi Dios yupaychana cheqasman David chayaqtintaq, Arki runa Husaiqa paywan tupaq rirqan, p'achanpas llik'i-llik'i, umanpas hallp'akama.

³³Hinan Davidqa nirqan: —Ñoqawan rispaqa hark'awankimanchá usqhaylla purinayta,

³⁴aswanpas llaqtaman kutipuspayki Absalonta ninki: Reyníy, ñoqa kamachiyki kasaq, imaynan taytaykitapas servirqani, ahinallataq servisqayki, nispa. Ahinapi Ahitofelpa yuyaychasqanta waqllichinki ñoqaq allinniypaq.

³⁵Sacerdote Sadokpas Abiatarpas chaypi qanwan kanqaku, chayrayku rey tiyana wasipi llapa uyarisqaykita paykunaman willanki.

³⁶Chaypin kashanku Sadokpa churin Ahimaaspas, hinallataq Abiatarpa churin Jonatanpas, paykunawan willachimuwanki tukuy uyarisqaykita, nispa.

³⁷Absalón Jerusalén llaqtaman haykuqtinmi, Davidpa amigon Husaiqa chayallarqantaq.