Read Quechua Cuzco Bible 1988 2 SAMUEL 17 Bible Online

2 SAMUEL 17 - Quechua Cuzco Bible 1988 bible

2 SAMUEL 17

¹Ahitofelmi Absalonta nirqan: —¿Akllarqoymanchu chunka iskayniyoq waranqa qharikunata Davidta kunan tutapacha qatinaypaq?

²Pay sayk'usqa pisi kallpa kashaqtintaq, phawaykuspa qonqay llaksachisaq. Paywan kashaq runakuna ayqeqtintaq, pay sapallanta wañurqachisaq.

³Hinaspan llapan runata qanman kutichimusaq, imaynan Davidta llapa runa qatikurqanku hinata. Qanqa huk runaq kawsaynillantan maskhashanki, runakunapaqqa manan ima llakipas kanqachu, nispa.

⁴Absalonmanpas Israelpi kurak runakunamanpas kay yuyaychayqa allinmi rikch'akurqan.

⁵Chaywanpas Absalonqa nirqanmi: —Arki runa Husaita waqyallasuntaq, ima ninqachá paypas, nispa.

⁶Hamuqtintaq Absalonqa Ahitofelpa yuyaychasqanta willaspa tapurqan: —¿Ruwasunmanchu nisqanta hina? Qanrí, ¿ima ninkitaq? nispa.

⁷Hinan Husaiqa kutichirqan: —Kunan kutiqa manan allinchu Ahitofelpa yuyaychasqan.

⁸Yachankin taytaykipas llapa runankunapas allin qharikuna kasqanta, sinchi phiñasqataqchá kashanpas wawan qechusqa ukumari hinaraq. Payqa maqanakuypipas allin yachaysapan, manan puñunmanchu runankunawan.

⁹Taytaykiqa kunan ratopas qaqa wasipichus icha may cheqaspichus pakakushan. Maqanakuy qallariypi wakin runakuna wañuqtinku, chayta uyariqkunaqa ninqachá: Absalonta qatikuq runakuna atipasqa, nispa.

¹⁰Hinataq runaykikunamanta aswan qhari kaqkunapas, rawrashaq sonqoyoq kashaspapas, llaksakapunqaku, llapa Israel runakunan yachan taytaykipas paywan kashaq qharikunapas allin qhari kasqankuta.

¹¹Chayrayku ñoqa yuyaychasqayki kay hinata: Llapan Israelta Dan llaqtamanta Beerseba llaqtakama huñukamunanpaq kamachiy. Hinataq qan kikiyki maqanakuyman rispayki mama qocha aqo hina atimusphay runakunata umallinki.

¹²Hinan Davidman maypiña kaqtinpas aypasunchis, mana reparakushasqan usqhaylla phawaykusunchis, paypas runankunapas manataq hukpas kawsanqachu.

¹³David may llaqtamanpas pakakunman chayqa, Israel runakuna rakhu waskhata apamunqaku, chaywan perqata wasikunatapas chutaspa wayq'oman thuniykusunchis, manataq huk rumillapas qhepanqachu, nispa.

¹⁴Ahitofelpa chay allin yuyaychasqantaqa Señor Diosmi mana munarqanchu, aswanpas Absalonpaq mana allinta munarqan. Chayraykun Absalonpas llapan Israel runakunapas nirqanku: —Arki runa Husaipa yuyaychasqanmi aswan allin Ahitofelpamantaqa, nispa.

¹⁵Husaitaq sacerdote Sadokmanwan Abiatarmanwan willarqan Ahitofelpa Absalonman kurak runakunamanwan yuyaychasqanta, hinallataq paypa yuyaychasqantapas.

¹⁶Nirqantaq: —Usqhaylla Davidman willachiy ch'inneqpi mayu pasanapi ama qhepakunanpaq, aswanpas kaq rato Jordán mayuta pasananpaq, mana chayqa reypas llapan paywan kaqkunapas wañuchisqan kankuman, nispa.

¹⁷Jonatanwan Ahimaaswantaq Rogel p'uytu qayllapi kasharqanku, hinan huk warmi kamachi willaq rirqan paykuna llaqtaman mana sut'ita haykuyta atisqankurayku. Chaymi paykunaqa rey Davidman willaq rirqanku.

¹⁸Ichaqa paykunatan huk wayna rikurqospa Absalonman willarqamurqan. Chaykamataq usqhaylla iskayninku pasarqanku, hinaspa Bahurim llaqtachapi huk runaq wasinman chayarqanku. Pationpi p'uytu karqan, hinan chayman winakurqanku.

¹⁹Wasiyoq warmitaq p'uytu pataman llikllata mast'aykurqan, chaymantaq trigo ruruta masarqan, mana reparakunanpaq.

²⁰Absalonpa oficialninkunataq chay warmiq wasinta chayaspa tapurqanku: —¿Maymi Jonatán Ahimaaspiwan? nispa. Warmitaq kutichirqan: —Mayutan pasarqonkuña, nispa. Hinan paykunaqa maskhamurqanku, mana tarispataq Jerusalenman kutipurqanku.

²¹Qhepankutataq waynakuna p'uytumanta lloqsispa Davidman willaq rirqanku. Chayaspataq Ahitofelpa pay contra yuyaychasqanta willaspa nirqan: —Usqhaylla Jordán mayuta pasarqoy, nispa.

²²Hinan Davidqa paywan kashaqkunapiwan puririrqanku manaraq pacha illarimushaqtin, llapankun mana ch'ullayoq Jordanta pasarqanku.

²³Absalón mana yuyaychasqanta kasuqtintaq, Ahitofelqa asnonta caronaspa sillaykukuspa llaqtanta wasinman ripurqan. Imankunatapas wasinpi allinta allichaykuspataq seq'orqokurqan, ahinapin wañupurqan. Ayantataq taytan p'ampanaman p'ampapurqanku.

²⁴Davidqa Mahanaim llaqtamanmi chayarqan, Absalón llapa Israel runakunantin Jordán mayuta pasamushanankama.

²⁵Absalonqa Amasata churarqanña ejerciton umallita Joabpa rantinpi. Amasaq taytanqa Ismael runa Itranmi karqan, mamantaq Joabpa maman Sarviaq ñañan Nahaspa ususin Abigail karqan.

²⁶Absalontaq Israel runakunapiwan Galaad hap'iyman pasarqospa chaypi qaynarqanku.

²⁷Mahanaim llaqtaman Davidqa chayaqtinmi, Rabá llaqtayoq Amón runa Nahaspa churin Sobi, Lodebar llaqtayoq Amielpa churin Makir, Rogelim llaqtayoq Galaad runa Barzilaipiwan payman hamurqanku.

²⁸Apamurqankutaq puñuna p'achata, p'ukukunata, mankakunata, trigota, cebadata, hak'uta, hank'ata, chaqalluta, lentejata,

²⁹miel misk'ita, lluklluta, ovejakunata, quesokunata ima, Davidman llapa runanmanwan mikhuchinankupaq: Ch'inneqpin paykunaqa yarqayta, ch'akiyta, sayk'uyta ima muchumunku, nispanku.