Read Quechua Cuzco Bible 1988 2 SAMUEL 18 Bible Online

2 SAMUEL 18 - Quechua Cuzco Bible 1988 bible

2 SAMUEL 18

¹Davidtaq soldadonkunata huñurqan, hinaspan churarqan umallikunata waranqa t'aqa-t'aqaman, pachak t'aqa-t'aqaman.

²Kinsamantaq ejercitonta t'aqarqan, ñawpaqkaq t'aqatan Joab umallirqan, iskaykaqtataq Joabpa wawqen Abisai, kinsakaqtataq Gat llaqtayoq runa Itai, hinan Davidqa ejercitonta nirqan: —Ñoqapas qankunawanmi rillasaqtaq, nispa.

³Paykunataq ichaqa kutichirqanku: —Ama qanqa riychu, ñoqaykuqa ayqesaqkuña chaypas kuskamantaña wañusaqku chaypas, manan imapas paykunaman qokunqachu. Qanqa ñoqaykumanta chunka waranqa hinan valenki, chayrayku llaqtapi qhepakuy yanapaqta kachamuwanaykikupaq, nispa.

⁴Chaymi reyqa nirqan: —Qankunaq nisqaykichistachá ruwasaq, nispa. Hinaspan payqa llaqta haykuna punkupi sayasharqan, soldadokuna pachak t'aqa-t'aqa, waranqa t'aqa-t'aqa lloqsishaqtinku.

⁵Hinallataq payqa Joabta, Abisaita, Itaitawan kamachirqan: —Ñoqarayku Absalón waynataqa sumaqta rikunkichis, nispa. Chaymi llapan ejerciton uyarirqan umallikunata chay hina kamachisqanta.

⁶Chaymantataq Davidpa soldadonkuna campoman lloqsirqan Israel runakunawan maqanakuq. Hinan Efraín ayllu hallp'a sach'a-sach'api maqanakurqanku.

⁷Davidpa soldadonkunataq llapa Israel runakunata sinchita atiparqan, hinan chaypi wañurqanku iskay chunka waranqa qharikuna.

⁸Chay maqanakuymi llapan muyuriqman mast'arikurqan, aswan askhataqmi karqanku sach'a-sach'api wañuqkuna maqanakuypi wañuqkunamantaqa.

⁹Absalontaq mulanpi sillaykusqa rishaspa, Davidpa soldadonkunawan qonqay tuparqan. Encina sach'a chakinta pasarqoshaqtintaq uma chukchan sach'a k'allmaman hap'irqokurqan. Chaymi Absalonqa sach'api warkurayashaq qhepakurqan, mulataq q'alalla phawarqan.

¹⁰Huk runataq chayta rikuspa Joabman willamurqan: —Absalonmi encina sach'api warkurayashan, nispa.

¹¹Joabtaq willaqninman kutichirqan: —Rikushaspari, ¿imanaqtintaq mana wañuchinkichu? Chunka qolqeta huk chumpitawan kusisqa qoykiman karqan, nispa.

¹²Hinan willaq runaqa nirqan: —Waranqa qolqetaña qowankiman chaypas, manan wañuchiymanchu reypa churintaqa. Uyarishaykun rey kamachisqasuykichista: Absalontaqa aman imanankichispaschu, nispa, nisqanta.

¹³Chayta mana kasukuspa ruwayman chayqa, rey yacharqoqtinqa manan qan kikiykipas rimaysiwankimanchu, nispa.

¹⁴Joabtaq nirqan: —Yanqañachá qanwanqa rimayman, nispa. Hinaspan payqa chanqana kinsa lanzata aparikuspa rirqan Absalón encina sach'api kawsashaqtinraq, lanzakunawan sonqonpi chanqarqorqan.

¹⁵Chaymantataq Joabpa arman apaysiq chunka wayna soldadokuna Absalonta qayllaykuspa sipipurqanku.

¹⁶Hinan Joabqa putututa tocarqan, soldadokunataq manaña Israel runakunata qatirqanñachu, llapankutaq kutipurqanku.

¹⁷Absalonpa cuerpontataq sach'a-sach'api t'oqoman wikch'uykurqanku, patanpitaq rumita tawqarqanku. Hinan llapa Israel runakunaqa sapanka wasinkuman ripurqanku.

¹⁸Absalonmi kawsashasparaq Reypa Wayq'onpi paymanta yuyarina saywata perqarqan: Manan churiykuna kanchu sutiyta apananpaq, nispa. Chay saywatataq paypa sutinwan suticharqan, chaymi “Absalonmanta Yuyarina Saywa” nisqa sutiyoq kashallanpuni.

¹⁹Hinan Sadokpa churin Ahimaasqa Joabta nirqan: —¿Phawaymanchu reyman kay allin willayta willaq: Señor Diosmi awqaykimanta qespichisunki, nispay? nispa.

²⁰Joabtaq nirqan: —Manan kunanqa willamuwaqchu paypa churin wañusqanrayku. Kunanqa manan willaq riwaqchu, huk p'unchayña willamunki, nispa.

²¹Chaywanpas Joabqa huk Etiopía runata nirqan: —Phaway qan, reyman willamunki imachus rikusqaykita, nispa. Chay Etiopía runataq Joabpa ñawpaqenpi k'umuykukurqan, hinaspa phawarirqan.

²²Sadokpa churin Ahimaasmi wakmanta Joabta nirqan: —¿Manapunichu imaña hayk'aña kaqtinpas Etiopía runaq qhepanta phawayman? nispa. Joabtaq kutichirqan: —Churilláy, ¿imanaqtintaq phawayta munanki? Manan imatapas qosunkichu kay willasqaykimantaqa, nispa.

²³Paytaq kutichirqan: —Manan imananpaschu, rillasaqpuni, nispa. Chaymi Joabqa: —Riypasyá, nirqan. Hinan Ahimaasqa Jordán pampa ñanta phawaspa Etiopía runata llallirqorqan.

²⁴Davidtaq llaqta punkupi tiyasharqan. Llaqta qhawaqtaq llaqta muyuriq perqa punku cheqas pataman seqarqan, qhawarispataq rikurqorqan huk runa phawamushaqta.

²⁵Hinaspan payqa reyman willarqan rikusqanta. Reytaq nirqan: —Huklla hamushan chayqa, allin willaytan apamushan, nispa. Chay runa qayllamushaqtintaq,

²⁶llaqta qhawaqqa rikurqollarqantaq huk runa phawamushaqta, hinaspan punku qhawaqman waqyarqan: —¡Qhawariy, huk runan phawamushallantaq! nispa. Davidtaq nirqan: —Chaypas allin willaytan apamushan, nispa.

²⁷Chay raton llaqta qhawaqqa nillarqantaq: —Ñawpaqkaq phawamuqqa Sadokpa churin Ahimaas kasqallanmi phawaynin, nispa. Hinan reyqa nirqan: —Payqa allin runan, allin willaytachá apamushan, nispa.

²⁸Ahimaasqa alto kunkawanmi reyta napaykurqan, hinaspan payman qayllaykuspa k'umuykukurqan, nirqantaq: —Apu Señor Diosniyki saminchasqa kachun, qan reyniy contra sayariq runakunata ch'usaqyachisqanmanta, nispa.

²⁹Reytaq tapuykurqan: —¿Allinchu kashan Absalón wayna? nispa. Ahimaastaq kutichirqan: —Etiopía runata ñoqatapas Joab kachamushawaqtinkun, hatun ch'aqway kasharqan, ichaqa manan yachanichu imamanta kasqanta, nispa.

³⁰Hinan reyqa: —Chaypi qhepakuy, nirqan. Paytaq chayneqpi sayaykuspa qhepakurqan.

³¹Chayllaman hukkaq willaq Etiopía runaqa chayarqamuspa nirqan: —Señor reyníy, allin willaytan apamushayki, kunanmi Señor Diosqa contraykipi sayarimuq llapan awqaykimanta qespichisunki, nispa.

³²Hinan reyqa tapuykullarqantaq: —¿Allinchu kashan Absalón wayna? nispa. Etiopía runataq kutichirqan: —Chay wayna hina kachun rey contra llapa sayariqkunaqa, nispa.

³³Chaymi reyqa ukhu sonqonmanta llakikurqan, punku patapi kashaq wasiman rispataq anchata waqarqan, anchirqan: ¡Churilláy, churi Absalón! ¡Absalón churíy! Ñoqa aswan wañuyman qan wañunaykimantaqa. ¡Churilláy, churi Absalón! nispa.