Read Quechua Cuzco Bible 1988 2 SAMUEL 20 Bible Online

2 SAMUEL 20 - Quechua Cuzco Bible 1988 bible

2 SAMUEL 20

¹Chaypitaq kasharqan huk millay runa Benjamín ayllumanta Bikriq churin Seba sutiyoq, paymi putututa tocaspa nirqan: —¡Manan imapas Davidwan ruwananchischu! ¡Manan Isaipa churinwan ima herenciapas phasminakunanchis kanchu! ¡Israel runakuna wasinchista ripusunchis! nispa.

²Hinan llapa Israelqa Davidta wikch'upuspa Sebata qatikurqanku, Judá runakunataq ichaqa reyninkuta qatikurqanku Jordán mayumanta Jerusalenkama.

³Davidtaq Jerusalenmam chayaspa wasinta haykurqan, hinaspan wasi qhawaqpaq saqesqan tiyaq masin chunka warmikunata huk wasiman wisq'aspan qhawaqkunata churarqan. Mikhunatapas tukuy necesitasqantapas qorqanmi, ichaqa manañan paykunaqa reywan puñurqankuñachu, wañunankukamataq viuda hina wisq'asqalla tiyarqanku.

⁴Chaymantataq reyqa Amasata nirqan: —Minchha p'unchaypaq Judá qharikunata huñuy, hinaspataq kayman paykunapiwan hamunki, nispa.

⁵Hinan Amasaqa rispa huñumurqan, ichaqa manan nisqan p'unchaypichu kutimurqan.

⁶Chaymi Davidqa Abisaita nirqan: —Bikriq churin Seban Absalonmanta aswan mana allinta ruwawasun. Chhaynaqa phaway, soldadoykunapiwan qhepanta qatipay, paqtan mayqen pukarayoq llaqtamanpas haykuspa pakakunman, manataq hap'ichikuwasunmanchu, nispa.

⁷Chaymi Joabpa soldadonkuna, reypa guardian Keret runakuna, llapan qharinkaq soldadokunapiwan Abisaipa umallisqan Jerusalenmanta lloqsirqanku Sebaq qhepanta qatipanankupaq.

⁸Gabaonpi hatun qaqa sispapi kashaqtinkutaq, Amasaqa paykunawan tupaq hamurqan. Joabqa soldado p'achawan p'achasqan kasharqan, cinturanpitaq huk correa espada waqaychanayoq. Amasaman qayllaykushaqtintaq, espadan pampaman urmarqan.

⁹Hinan Joabqa Amasata sunkhanmanta much'aykuq hina paña makinwan hap'iykuspa nirqan: —¿Allillanchu kashanki, wawqéy? nispa.

¹⁰Amasataq mana cuidakurqanchu Joabpa espadanmanta, Joabtaq wiksanmanta espadawan sat'irqorqan, ch'unchulnintaq pampaman urmarqan, manañataq astawan sat'irqanchu wañurqapusqanrayku. Chaymantataq Joabqa Abisai wawqenpiwan Bikriq churin Sebata qatiparqanku.

¹¹Hinan Joabpa hukkaqnin soldadoqa aya qayllapi sayaykuspa nirqan: —Pipas Davidta Joabtawan munakuqqa, Joabpa qhepanta richun, nispa.

¹²Amasataq ichaqa yawarninpi qhospasharqan, ñanta lliw puriqkunataq Amasata rikuspa sayarqanku. Hinan chay soldadoqa llapa puriq sayaykuspa qhawaqtin, Amasata wak pampaman aysarparispa p'achawan qataykurqan.

¹³Ñanmanta ayata hoqariqtintaq, llapan Joabpa qhepan riqkunapas phawaylla pasarqanku Bikriq churin Sebata maskhaspanku.

¹⁴Sebaqa Israelpa llapan ayllunta pasarqan Abel-Bet-Maaka llaqtakama, hinan llapan Bikri ayllupas paywan huñukuspanku llaqtaman haykurqanku.

¹⁵Joabpa soldadonkunataq Abel-Bet-Maakaman chayaspa llaqtata muyuykurqanku, llaqta muyuriq perqaman seqanata ruwakurqanku, llapankutaq teqsita hasp'irqanku perqa kumpakunanpaq.

¹⁶Chaymi huk yachaysapa warmi chay llaqtamanta waqyakamurqan: —Uyariwaychis yaw runakuna, Joabta niykapuwaychis paywanmi parlaykuyta munashani, nispa.

¹⁷Joab qayllaykuqtintaq warmiqa tapuykurqan: —¿Qanchu Joab kanki? nispa. Paytaq: —Arí, ñoqan kani, nirqan.

¹⁸Hinan warmiqa nirqan: —Uyariykuway kamachiykiq rimasqanta, nispa. Paytaq: —Niway, nirqan. Chaymi warmiqa nirqan: —Ñawpa tiempokunapiqa sasachakuyniyoqkunatan: Abel llaqtata riy tapukuq, nispa, niqku. Ahinapin tukuy sasachayninku allinkama kapurqan.

¹⁹Ñoqaykuqa kay llaqtapi llamp'u sonqoyoq hunt'aq runakunan kayku. ¿Chaychu qan Israelpi kay hatun llaqtata thuniyta munanki? ¿Imapaqtaq Señor Diospa kaqtari thuniwaq? nispa.

²⁰Joabtaq kutichirqan: —¡Manan hayk'aqpas chhaynataqa ruwasaqchu, manataqmi thunisaqpaschu!

²¹Manan chaymanchu hamuni, aswanpas Efraín orqo-orqomanta Bikriq churin Seba sutiyoqmi rey David contra sayarin, chay maskhaqmi hamuyku. Hap'ichiwayku, hinataq ripusaqku, nispa. Warmitaq nirqan: —Allinmi, perqa patantan chay runaq umanta wikch'umusqaykiku, nispa.

²²Hinan payqa llaqtaman haykurqan, runakunata huñuspataq allinta yuyaycharqan. Chaymi Bikriq churin Sebaq umanta qhoruspa Joabman wikch'umurqanku, Joabtaq putututa tocarqan. Hinan chay llaqtamanta soldadokuna sapanka wasinkumankama ripurqanku, hinallataq Joabpas reypa kasqan Jerusalén llaqtaman ripurqan.

²³Joabqa Israelpi llapan ejercitoq umallinmi karqan, Joiadaq churin Benaiataq reypa guardian Keret runakunaq Pelet runakunaq umallin karqan,

²⁴Adoramtaq mit'anikunaq umallin, Ahiludpa churin Josafat-taq qelqa waqaychaq karqan.

²⁵Sevataq reypa qelqaqnin karqan, Sadoktaq Abiatarpiwan sacerdotekuna karqanku,

²⁶Jair llaqtayoq Irapas Davidpa sacerdotenmi karqan.