Read Quechua Cuzco Bible 1988 2 SAMUEL 3 Bible Online

2 SAMUEL 3 - Quechua Cuzco Bible 1988 bible

2 SAMUEL 3

¹Saulpa ayllunwan Davidpa ayllunwan maqanakuymi unay karqan, hinan Saulpa ayllunqa pisi kallpayapusharqan, Davidñataq kallpachakusharqan.

²Hebrón llaqtapi David kashaqtinmi kay churinkuna nacerqan: Jezreel llaqtayoq Ahinoampa phiwi churin Amnón,

³Carmel llaqtayoq Nabalpa viudan Abigailpa churin Kileab, Gesur llaqta rey Talmaipa ususin Maakaq churin Absalón,

⁴Haguitpa churin Adonías, Abitalpa churin Sefatías,

⁵Eglaq churintaq Itream. Llapan chaykunan Davidpaq Hebrón llaqtapi nacerqan.

⁶Saulpa ayllunwan Davidpa ayllunwan maqanakuy kashaqtinmi Abnerqa Saulpa ayllunpi atiyniyoq kanankama kallpachakusharqan.

⁷Saulpan karqan tiyaqmasin warmi Ajaq ususin Rizpa sutiyoq. Chaymi Isbosetqa Abnerta nirqan: —¿Imanaqtinmi taytaypa tiyaqmasin warmiwan puñukunki? nispa.

⁸Abnertaq chayta nisqanmanta sinchita phiñakuspa nirqan: —¿Ñoqari alqo hinachu Judá aylluta servishani? ¿Manachu Saúl taytaykiq ayllunta, wawqenkunata, amigonkunatapas khuyapayashallani? Manan qantapas Davidman hap'iykachiykichu. ¿Kunantaqchu qanqa chay warmimanta huchachawanki?

⁹Señor Diosmi Davidman prometerqan Saulpa ayllunmanta kamachikuyta qechuspa Israel ayllupi Judá ayllupi kamachikuyta payman qonanta Dan llaqtamanta Beerseba llaqtakama. ¡Diosqa sinchita muchuchiwachun manachus paypa nisqan hunt'akunanpaq yanapasaq chayqa! nispa.

¹¹Isboset-taq payta manchakuspa mana ima nirqanpaschu.

¹²Chaymantataq Abnerqa willaqkunata Davidman kacharqan: —¿Piqpan suyuqa? Ñoqawan rimanakuy, liston kashani llapa Israel runakuna qanta kamachikuqta chaskinasuykipaq yanapanaypaq, nispa, ninankupaq.

¹³Davidtaq kutichirqan: —Allinmi, rimanakusunchis, ichaqa kaytan mañakuyki: Saulpa ususin Mikaltan pusamuwanki. Mana chayqa, manan chaskisqaykichu, nispa.

¹⁴Chaymantataq Davidqa Saulpa churin Isbosetman willaqkunata kacharqan: —Kutichipuway Mikal warmiyta, paytaqa pachak Filistea runakunaq qhari-kaynin qarachakunawanmi horqokurqani, nispa.

¹⁵Hinan Isbosetqa Laispa churin Paltielmanta Mikalta qechurqochimurqan.

¹⁶Qosan Paltieltaq ichaqa waqakuspa qhepanta purimurqan Bahurim llaqtakama, chaypitaq Abnerqa nirqan: —Phaway, wasiykita kutipuy, nispa. Hinan Paltielqa kutipurqan.

¹⁷Abnertaq Israel kurak runakunata rimaykuspa nirqan: —Unayñan qankunaqa Davidta reyniykichis kananta munashankichis,

¹⁸kunanqa reyniykichispaq churakuychis. Señor Diosqa Davidtaqa nirqanpunin: Israel llaqtaytaqa Filistea runakunamanta lliw awqankunamantapas qanwanmi qespichisaq, nispan, nispa.

¹⁹Rimaykullarqantaq Abnerqa Benjamín aylluta, hinaspa Hebrón llaqtata Davidman rirqan, Israel runakunaq Benjamín ayllu runakunaq lliw yuyaykusqankuta willaq.

²⁰Chaymi Abnerqa iskay chunka qharikunapiwan Hebrón llaqtata Davidman chayarqan, Davidtaq hatun mikhuyta paykunaman mikhuchirqan.

²¹Chaymantañan Abnerqa Davidta nirqan: —Kunanqa ripusaq, hinaspa lliw Israelta qan wiraqochayman huñumusaq, qanwan rimanakunankupaq, munasqaykiman hinataq kamachinki, reyníy, nispa. Hinan Davidqa sumaqpi Abnerta kacharirqan.

²²Chay qhepatataq Davidpa soldadonkunaqa Joabpiwan chayamurqanku, maqanakuypi llat'anasqankuta apamuspa, Abnertaq Davidwan mana Hebronpiñachu karqan, pay sumaqpi kacharparipusqanrayku.

²³Soldadokunapiwan Joab chayamuqtintaq payman willarqanku: —Nerpa churin Abnermi reyman hamusqa, Davidtaq chaskispa sumaqpi kacharparipun, nispa.

²⁴Hinan Joabqa reyman qayllaykuspa nirqan: —¿Imanarqankin? Abnermi hamusqasunki, qantaq chaskiykusqanki. ¿Imanaqtinmi sumaqpi kacharparirqanki?

²⁵¿Manachu yachanki q'otullawan tukuy ima niwasqaykita purisqaykita qhamiyaq hamusqasuykita? nispa.

²⁶Joabtaq Davidpa ñawpaqenmanta lloqsirqospa, Abnerpa qhepanta willaqkunata kacharqan, paykunataq Sirapi p'uytumantaña Abnerta kutichimurqanku, Davidmi ichaqa mana chayta yacharqanchu.

²⁷Hebrón llaqtaman Abner kutirqamuqtintaq, Joabqa sumaqllapi llaqta haykuna punkuman pusarqorqan sapaqllapi parlaykamuq hina. Chaypitaq Asael wawqenta wañuchisqanmanta vengakuspa wiksanpi sat'irqospa wañurqochirqan.

²⁸Chaymantataq Davidqa chayta yachaspa nirqan: —Ñoqapas suyuypas Abnerpa wañusqanmantaqa manan Señor Diospa ñawpaqenpi huchayoqchu kayku.

²⁹Señor Dios Joabtaqa llapa miraynintawan kay huchamanta muchuchichun, chhaynaqa paykunamanta kallanqapuni yawar apaywan, aycha qarapi millay onqoywan onqoqkuna, marimachukuna, yarqayta muchuqkuna, maqanakuypi wañuqkunapas, nispa.

³⁰Chhaynatan Joabpiwan Abisaipiwan Abnerta wañuchipurqanku wawqenku Asaelta Gabaón maqanakuypi wañuchisqankumanta.

³¹Hinan Davidqa Joabta llapan paywan kashaqkunatawan nirqan: —Waqaychis Abnermanta, p'achaykichista llik'ikuychis, luto p'achawantaq p'achakuychis, nispa. Abnerta p'ampanankupaq wantushaqtinkutaq, Davidqa qhepanta rirqan,

³²hinan Hebrón llaqtapi p'ampapurqanku. P'ampaykushaqtinkutaq reyqa khuyayta waqaykurqan, hinallataq lliw runapas waqaykurqan.

³³Hinan reyqa Abnerpa wañusqanmanta kay llakiy harawita takirqan: —¿Mana yuyayniyoq hinachu Abnerqa wañunan karqan?

³⁴Manan makiykikunapas watasqachu karqan, manan chakiykikunapas t'eqesqachu karqan, runa wañuchiqpa wañuchisqan hina wañurqanki, nispa. Chaymi llapa runa Abnermanta waqallarqantaq.

³⁵Chay qhepatataq llapa runa Davidta rogarqanku: —Mikhuykuy manaraq tutayashaqtin, nispa. Paytaq ichaqa nirqan: —Manan mikhuymanchu t'antatapas ima mikhuytapas manaraq inti chinkaykushaqtinqa, chhaynata mana ruwaqtiyqa, Dios ñakawachun, nispa.

³⁶Llapa runakunan reparaspa: —Allinmi, nirqanku. Reypa tukuy ruwasqankunapas allinkaman paykunapaq karqan.

³⁷Chay p'unchaymi llapa runa llapa Israelpas repararqanku Abner wañuchiyqa mana Davidpa kamachisqanchu kasqanta.

³⁸Reyqa oficialninkunatan nillarqantaq: —¿Manachu reparankichis kunan Israelpi huk uma qollana allin qhari wañusqanta?

³⁹Ñoqaqa pisi kallpan kani, reypaq aceitewan hawisqaña kashani chaypas. Chay Sarviaq churinkunaqa sinchi kallpasapan ñoqapaq kanku. ¡Señor Dios kutichipuchun mana allin ruwaqmanqa ruwasqanman hina! nispa.