Read Quechua Cuzco Bible 1988 2 SAMUEL 4 Bible Online

2 SAMUEL 4 - Quechua Cuzco Bible 1988 bible

2 SAMUEL 4

¹Saulpa churin Isbosetmi Hebrón llaqtapi Abnerpa Wañusqanta yacharqospa sinchita pisiparqan, hinallataq llapa Israelpas anchata manchakurqan.

²Isbosetpaqa llat'anaq t'aqankunaq iskay umallin karqan, hukpa sutinmi Baana, hukkaqpataq Rekab karqan, Benjamín ayllumanta Beerot llaqtayoq Rimonpa churinkuna.

³Beerot llaqtayoq runakunaqa Gitaim llaqtaman ayqepuspa, chaypi karu llaqtayoq hina tiyapusqaku. Chaymi Beerot llaqtaqa Benjamín aylluman yupasqa kapurqan.

⁴Saulpa churin Jonatanpa huk churinmi wist'u chakiyoq karqan, Mefiboset sutiyoq. Phisqa watayoq kashaqtinmi, Saulwan Jonatanwan wañusqan Jezreel llaqtamanta uyarikurqan, hinan wawa amani warmiqa wawata aparikuspa ayqesharqan, usqhaylla phawashaspataq wawata pampaman atipachikurqan. Chaymi wist'u kapurqan.

⁵Beerot llaqtayoq Rimonpa churinkuna Rekabwan Baanawan rispanku, chawpi p'unchayta Isbosetpa wasinta haykurqanku, Isboset-taq puñunan wasipi puñusharqan p'unchaypa aswan q'oñi horasninpi.

⁶Wasin punku qhawaqpas trigo ch'uyanchasqanpi puñurqapullasqataq, hinan Baanaqa wawqen Rekabpiwan mana piqpa rikusqallan Isbosetpa wasinta haykurqanku.

⁷Pay puñunapi puñushaqtintaq wañurqachispa umanta qhorurqanku. Chayta aparikuspan tutantin Hebrón llaqtaman purirqanku Jordán qheshwa wayq'o ñanninta.

⁸Chayaspataq rey Davidman rikuchirqanku: —Señor reyniyku, kayqa Saúl awqaykiq churin Isbosetpa uman, paymi wañuchiyta munarqasunki. Kunantaq ichaqa Saulta miraynintapas muchuchispa Señor Diosqa vengachisunki, nispa.

⁹Hinan rey Davidqa Beerot llaqtayoq Rimonpa churinkuna Baanaman Rekabmanwan kutichirqan: —¡Juranin tukuy ñak'ariyniykunamanta qespichiwaqniy Señor Diospa sutinpi!

¹⁰Allin kasqanpaq yuyaspa Saulpa wañusqanta willawaqniy runatapas, “allinmi” ninaymantaqa Siklag llaqtapin hap'ispa wañuchirqani.

¹¹¡Chaychu kay mana allin runakunata chanin qharita wasinpi puñukushaqta wañuchimusqankumantaqa mana wañuchiyman! ¿Chaychu manaqa wañuchisqaykichismanta vengakuyman, kay pachamantapas qankunata ch'usaqyachispay? nispa.

¹²Chaymi Davidqa soldadonkunata nirqan: —Wañuchimuychis, nispa. Paykunataq wañuchirqanku, hinaspan chakinta makintawan qhorurqospanku, Hebronpi estanque qayllaman warkurqanku. Isbosetpa umantataq Hebronpi Abner p'ampasqaman p'ampapurqanku.