Read Quechua Cuzco Bible 1988 2 SAMUEL 7 Bible Online

2 SAMUEL 7 - Quechua Cuzco Bible 1988 bible

2 SAMUEL 7

¹Llapa muyuriqnin awqankunamanta Señor Diospa qespichisqanmantañan rey Davidqa wasinpi tiyaykapurqan.

²Hinaspan profeta Natanta nirqan: —Qhawariy, ñoqaqa cedro kurku llaqllasqa wasipin tiyani Diospa cajantaq ichaqa karpallapi kashan, nispa.

³Natantaq kutichirqan: —Qanwanmi Señor Diosqa kashan, ima munasqaykita ruway, nispa.

⁴Chay tutapachan Señor Diosqa Natanta nirqan:

⁵—Phaway David kamachiyman, hinaspa nimuy: ¿Qanchu wasita ruwapuwankiman ñoqa chaypi tiyanaypaq?

⁶Egipto suyumanta Israel runakunata horqomusqaymanta kunankama manan hayk'aqpas wasipichu tiyarqani, aswanmi karpallapi kayneqman haqayneqman purirqani.

⁷Kay unayña llapa Israel runakunawan purimushaspay, mana mayqen Israel kamachikuqkunatapas nirqanichu: ¿Imanaqtinmi cedro kurku llaqllasqa wasita mana ruwapuwankichischu? nispa.

⁸Hinallataq David kamachiyta ninki: Tukuy-atiyniyoq Señor Diosmi nin: Campopi ovejakunata michispa purishaqtiykin, ñoqa pusamurqayki Israel llaqtayta umallinaykipaq.

⁹Maypiña puriqtiykipas qanwanmi karqani, lliw awqaykikunatapas ñawpaqeykipi muchuchirqanin. Kay pachapi mentasqa runakunata hinan ruwasqayki.

¹⁰Israel llaqtaypaqtaq huk cheqasta wakichisaq, chaypin takyachisaq, hinan tiyanqaku mana piqpa muchuchisqan. Manataq awqankupas llakichinqañachu,

¹¹imaynan Israel llaqtayman uma qollanakuna churasqay p'unchaymanta llakichirqan hinataqa. Tukuy awqaykimantan qespichisqayki, ñoqa kikiymi kamachikunanpaq mirayniykita qosqayki.

¹²Wañukapuqtiykipas machulaykikunawan p'ampasqan kapunki, qanmanta paqarimuq churiykitan kamachikuqta churasaq hinaspan kamachikuyninta takyachisaq.

¹³Paymi wasita ruwapuwanqa, ñoqataq wiñaypaq atiyninta sayachisaq.

¹⁴Ñoqataq taytan kasaq, paytaq churiy kanqa. Mana allinta puriqtintaq, imaynan huk tayta wawankunata anyaspa wanachin, chay hinatan ñoqapas wanachisaq.

¹⁵Ñoqaqa mana p'itiytan munakusaq, manataq Saulmanta hinachu t'aqakusaq, paytaqa ñawpaqeykimanta wikch'upuniñan.

¹⁶Aylluykipas suyuykipas ñawpaqeypiqa kashallanqapunin, kamachikusqaykiqa wiñaypaqmi takyanqa, nispa, nispayki.

¹⁷Natantaq llapa rikusqanta uyarisqanta Davidman willarqan.

¹⁸Hinan rey Davidqa Señor Diospa qayllanman asuykuspa nirqan: —Qollana Señor Diosníy, kaykamañan yanapamuwanki, ichaqa ñoqapas aylluypas manan imapaschu kayku.

¹⁹Chaywanpas Qollana Señor Diosníy, chaykunamanta astawanñan ruwashanki, hamuq mitakunapaqpas prometellankitaq aylluyta saminchanaykipaq. Qollana Señor Diosníy, ¡ñoqapaqqa ancha musphaymi kaykuna rikuchiwasqaykiqa!

²⁰¿Imatawantaq ñoqa niykiman? ¡Ay, Qollana Señor Diosníy, qanmi kay kamachiykita reqsiwanki!

²¹Munayniykiman prometesqaykiman hinan chay tukuy musphanakunata ruwarqanki ñoqaman yachachiwanaykipaq.

²²¡Qollana Señor Diosníy, ancha hatunmi kanki! Ninriykuwan uyarisqaykuman hinaqa manan kanchu huk Dios qan hina, sapallaykin kanki.

²³¿Mayqen llaqtataq kay pachapi Israel llaqtayki hinaqa kanman? Qanmi Egipto suyumanta kacharichirqanki llaqtayki kananpaq. Manchay musphaytan paykunapaq qan ruwarqanki, chaykunawantaq hatun mentasqa sutiyoq kapurqanki. Ñawpaqeykumantan llaqtakunatapas diosninkutapas wikch'urqanki.

²⁴Señor Diosníy, wiñay llaqtayki kananpaqmi Israelta takyachirqanki, Diosninkutaq kapurqanki.

²⁵Chay hinaqa, Apu Señor Diosníy, ñoqamanpas aylluymanpas prometesqaykita wiñaypaq hunt'ay. Nisqaykita ruway,

²⁶sutiykitaq wiñaypaq yupaychasqa kanqa. Hinan runakunaqa ninqaku: Tukuy-atiyniyoq Señor Diosmi Israelpa Waqaychaqnin Diosqa, nispa. Ñoqaq aylluypas mana urmaqtaq ñawpaqeykipi sayanqa.

²⁷Tukuy-atiyniyoq Señor, Israelpa Diosnin, qanmi ñoqata niwarqanki aylluyqa mana urmaq sayananta, chaymi kay confianzawan mañakamuyki.

²⁸Qanqa Señor Diosmi kanki, rimasqaykita hunt'aq, ñoqamanmi kay ancha allinta prometewarqanki.

²⁹Kunanqa aylluyta saminchaykuy allillantapuni wiñaypaq paykunata qhawarinaykipaq. Qanmi samincharqanki, Qollana Señor Diosníy, chay saminchayniykiwanmi aylluyqa wiñaypaq saminchasqa kanqa, nispa.