Read Quechua Cuzco Bible 1988 1 REYES 1 Bible Online

1 REYES 1 - Quechua Cuzco Bible 1988 bible

1 REYES 1

¹Rey Davidqa yuyaqñan kapurqan, ch'isiyasqa runaña. Kamachinkunaña p'achakunawan allinta p'isturqanku qatarqanku chaypas, manan q'oñirirqanchu.

²Chaymi paykunaqa reyta nirqanku: —Señor reyniyku, maskhampusqaykiku huk doncella sipasta servinasuykipaq qhawanasuykipaqwan. Paymi qanwan puñunqa q'oñichinasuykipaq, nispa.

³Hinaspan maskharqanku Israel suyuntinpi huk sumaq rikch'ayniyoq sipasta, tarirqankutaq Sunem llaqtayoq Abisag sutiyoq sipasta, paytan reyman pusarqanku.

⁴Abisagqa ancha sumaq rikch'ayniyoq sipasmi karqan. Paymi reyta makilla qhawarqanpas servirqanpas, ichaqa manan hayk'aqpas reyqa sipasta llamiykurqanchu.

⁵Chaykamataq Davidpa warmin Hagitpa churin Adoniasqa hatunchakuspa nirqan: Ñoqan suyupi rey kasaq, nispa. Chaymi payqa wakichikurqan carretakunata, caballopi maqanakuq soldadokunata, carretanpa ñawpaqenta phawaq phisqa chunka soldadokunatawan.

⁶Adoniasqa sumaq rikch'ayniyoqmi karqan, Absalonpa apañantaq karqan. Taytanqa manan hayk'aqpas payta anyasqachu, manallataq hayk'aqpas tapuykusqachu: ¿Imapaqmi kaytapas chaytapas ruwashanki? nispaqa.

⁷Paymi Sarviaq churin Joabta sacerdote Abiatartawan rimapayarqan, chaymi paykunaqa nirqanku: —Yanapasqaykikupunin, nispa.

⁸Ichaqa sacerdote Sadokpas, Joiadaq churin Benaiapas profeta Natanpas, Simeipas, Reipas, Davidta waqaychaq allin qhari soldadokunapas manan paywan huñukurqankuchu.

⁹Chaymantataq Adoniasqa Rogel pukyu qayllapi kashaq Zehelet Qaqa sispapi ovejakunata, torokunata, allin wirayachisqa torillokunatawan nak'aspa sacrificiota haywarqan. Waqyachirqantaq reypa churin llapan wawqenkunata, Judapi kashaq reypa llapan oficialninkunatawan,

¹⁰ichaqa profeta Natantapas, Benaiatapas, Davidta waqaychaq allin qhari soldadokunatapas, wawqen Salomontapas manan waqyachirqanchu.

¹¹Hinan profeta Natanqa Salomonpa maman Betsabeman rispa nirqan: —¿Manachu yachanki Hagitpa churin Adonías rey kapusqanta? ¡Chaytaqa manan yachanchu wiraqochanchis Davidpas!

¹²Chhaynaqa, kayta yuyaychasqayki kawsayniykita churiyki Salomonpa kawsaynintapas qespichinaykipaq.

¹³Rey Davidman haykuy, hinaspa ninki: Señor reyníy, juramentowanmi qanqa niwarqanki: Ñoqaq qhepaytaqa Salomón churiykin rey kanqa, kamachikuy tiyanapin tiyanqa, nispa. Chay hinaqa, ¿imanaqtintaq Adoniasri kamachikapushan? nispa.

¹⁴Ñoqataq rimashaqtiykiraq reyman haykumusaq, hinaspa rimasqayki simikunata: Cheqaqpunin, nispa, nisaq.

¹⁵Hinan Betsabeqa reypa puñunan wasita haykurqan. Reyqa sinchi yuyaqñan karqan, Sunem llaqtayoq Abisagtaq payta servisharqan.

¹⁶Betsabetaq haykuspa reypa ñawpaqenpi pampakama k'umuykukurqan, hinan reyqa tapuykurqan: —¿Iman karqon? nispa.

¹⁷Betsabetaq nirqan: —Reyníy, Apu Señor Diosniykiq sutinpin qanqa jurawarqanki: Ñoqaq qhepaytaqa Salomón churiykin rey kanqa, kamachikuy tiyanapin tiyanqa, nispa.

¹⁸Kunantaq: Adoniasmi kamachikapushan, niwanku, chaytaqa manan yachankiraqchu, reyníy.

¹⁹Torokunata, wirayachisqa torillokunata, askha ovejakunatawan nak'aspan sacrificiota haywan, waqyachirqantaq churiykikunata, sacerdote Abiatarta, ejercitoyki umalli Joabtapas, ichaqa Salomón kamachiykitan mana waqyachirqanchu.

²⁰Chhaynaqa, señor reyníy, llapa Israelmi suyakushanku pichus qhepaykita kamachikunanta willanaykita.

²¹Mana willanki chayqa, wañupuqtiykin Salomón churiykipiwan ñoqapiwan wañuchinapaq huchachasqa kasaqku, nispa.

²²Reywan pay rimashallaqtinraqmi profeta Natanqa chayman chayarqan,

²³hinan reyman chayasqanta willamurqanku. Profeta Natantaq haykuspa reypa ñawpaqenpi pampakama k'umuykukuspa nirqan:

²⁴—Señor reyníy, ¿qanchu kamachirqanki Adoniasta rey kananpaq, kamachikuy tiyanapi tiyananpaq?

²⁵Kunan p'unchaymi payqa rin, hinaspan torokunata, wirayachisqa torillokunata, askha ovejakunatawan nak'aspa sacrificiota haywan. Waqyachirqantaq churiykikunata, ejército umallikunata, sacerdote Abiatartawan. Kunan raton Adoniaswan mikhushanku ukyashanku, qaparishankutaq: ¡Kawsachun rey Adonías! nispa.

²⁶Ichaqa manan waqyachiwarqankuchu ñoqata, sacerdote Sadokta, Joiadaq churin Benaiata, Salomón kamachiykitapas.

²⁷Señor reyníy, ¿qanchu chayta kamachikurqanki ñoqayku kamachiykikunaman pichus qhepaykita kamachikunanta mana willawaspaykiku? nispa.

²⁸Chaymi rey Davidqa Betsabeta waqyamunankupaq kamachikurqan. Betsabetaq reypa qayllanman haykuspa paypa ñawpaqenpi sayasharqan.

²⁹Hinan reyqa kay hinata jurarqan: —Tukuy llakikuyniymanta qespichiwaqniy Señor Diospa sutinpin jurani.

³⁰Israelpa Diosnin Señorpa sutinpin jurarqayki, chaytaqa kunanpachan hunt'asaq: Churiyki Salomonmi rantiypi kamachikuy tiyanapi tiyanqa, qhepaytan rey kanqa, nispa.

³¹Hinan Betsabeqa reypa ñawpaqenpi pampakama k'umuykukuspa nirqan: —¡Wiñaypaq kawsachun señorniy rey Davidqa! nispa.

³²Hinallataq rey Davidqa kamachikurqan sacerdote Sadokta, profeta Natanta, Joiadaq churin Benaiatawan waqyamunankupaq. Reypa qayllanman paykuna haykuqtinkutaq,

³³reyqa nirqan: —Salomón churiyta mulaypi sillaykuchiychis, oficialniykunawantaq puriysiychis, hinaspa Gihón pukyuman pusaychis.

³⁴Chaypin payta sacerdote Sadok profeta Natanpiwan aceitewan hawimunqaku Israelpi rey kananpaq. Putututa tocaspataq qaparinkichis: ¡Rey Salomón kawsachun! nispa.

³⁵Chaymantataq qankunaq ñawpaqeykichista kutimuspa kamachikuy tiyanapi tiyanqa, paymi rantiypi rey kanqa, ñoqan payta churani Israelpipas Judapipas kamachikuq kananpaq, nispa.

³⁶Joiadaq churin Benaiataq reyman kutichirqan: —Ahina kachun. Señor reyniypa Diosnin ahina kananta unanchachun.

³⁷Imaynan qan reyniywan Señor Diosqa kasharqan, ahinallataq Salomonwanpas kachun, kamachisqan suyupas aswanraq hatunyachun qan reyniypa kamachikusqaykimantaqa, nispa.

³⁸Hinan sacerdote Sadok, profeta Natán, Joiadaq churin Benaía, reypa guardian Keret runakuna Pelet runakunapiwan rirqanku, rey Davidpa mulanpi Salomonta sillaykuchispataq Gihón pukyuman pusarqanku.

³⁹Chaypin sacerdote Sadokqa Dios yupaychana wasimanta aceiteyoq waqrata hap'ispa, Salomonta hawirqan rey kananpaq. Chaymantataq putututa tocarqan, hinan llapan runakunaqa qaparirqanku: ¡Rey Salomón kawsachun! nispa.

⁴⁰Llapankutaq qenata tocaspa Salomonpa qhepanta ancha kusisqa kutimurqanku, chaymi pampapas khatatataq hinaraq karqan kusikuymanta kunkayoqta qapariqtinku.

⁴¹Adoniastaq llapan waqyachikusqankunapiwan mikhuyta tukuspaña waraqeqta uyarirqanku, Joabtaq pututu tocaqta uyarispa nirqan: —¿Imanaqtintaq llaqtapiri sinchita waraqeshanku? nispa.

⁴²Hinan pay rimashallaqtinraq sacerdote Abiatarpa churin Jonatanqa chayarqamurqan. Adoniastaq nirqan: —Pasaykamuy, qanqa allin qharin kanki, allin willakuytachá apamushanki, nispa.

⁴³Jonatantaq kutichirqan: —Manan. Señor reyninchis Davidmi Salomonta rey kananpaq churan,

⁴⁴kamachintaq sacerdote Sadokta, profeta Natanta, Joiadaq churin Benaiata, Keret runakunata, Pelet runakunatawan puriysinankupaq, paykunataq reypa mulanpi Salomonta sillaykuchinku.

⁴⁵Chaymantapas sacerdote Sadok, profeta Natanpiwan Gihón pukyupi Salomonta aceitewan hawimunku rey kananpaq, chaymantan ancha kusisqa kutimunku. Chayraykun runakunaqa llaqtapi waraqeshanku, chay waraqeytan qankunaqa uyarishankichis.

⁴⁶Chay hinaqa, kamachikuy tiyanapiñan Salomonqa tiyashan,

⁴⁷señor reyninchis Davidpa oficialninkunapas rinkuñan Davidta saminchaq: Qanmanta aswan mentasqa kananpaq Salomonta Dios ruwachun, kamachisqan suyupas aswanraq hatunyachun qanpamantaqa, nispa. Hinallataq kikin rey Davidpas puñunanpi k'umuykukuspa Diosta yupaychan:

⁴⁸Israelpa Diosnin Señor saminchasqa kachun, paymi munan ñoqaq mirayniy kunan kamachikuy tiyanapi tiyaykunanta, chaytan ñoqa rikuniraq, nispan, nispa.

⁴⁹Hinan Adoniaspa waqyachikusqan runakunaqa manchakuymanta khatatatarqanku, chaymi llapanku sayarispa sapankanku ñanninkutakama ripurqanku.

⁵⁰Adoniastaq Salomonta manchakusqanrayku sayarispa Dios yupaychana karpata rirqan, chaypitaq altar waqrakunaman hap'ipaykukurqan.

⁵¹Hinan Salomonman willarqanku: —Adoniasmi qanta manchakuspa, altar waqrakunaman hap'ipasqa kashan: Kunanpacha rey Salomón ama wañuchiwananpaq jurawachun, nispan, nispa.

⁵²Salomontaq kutichirqan: —Allin qhari hinataq purinqa chayqa, manan pipas imananqapaschu, ichaqa ima mana allintapas ruwanqa chayqa, wañunqapunin, nispa.

⁵³Hinaspan Salomonqa altarmanta hatarichipunankupaq kamachikurqan. Chaymantataq Adoniasqa rey Salomonman rirqan, hinaspa ñawpaqenpi k'umuykukurqan. Rey Salomontaq nirqan: —Ripuy wasiykita, nispa.