Read Quechua Cuzco Bible 1988 1 REYES 15 Bible Online

1 REYES 15 - Quechua Cuzco Bible 1988 bible

1 REYES 15

¹Abiamqa Judapi kamachikuyta qallarirqan Nabatpa churin Jeroboam Israelpi chunka qanchisniyoq wata kurakña kamachikushaqtinmi.

²Jerusalenmantataq kinsa watata kamachikurqan. Mamanmi karqan Abisalompa ususin Maaka sutiyoq.

³Payqa taytanpa ruwasqan kikin huchakunallatataqmi ruwarqan, manataq Apu Señor Diosninpaq hunt'aqchu karqan imaynan machulan David hunt'aq karqan hinaqa.

⁴Chaywanpas, Apu Señor Diosninqa Davidta allinta qhawarisqanraykullan paypa mirayninta Jerusalenpi kamachikushanallanpaq churarqan, ahinapin Abiamman huk churita qorqan Jerusalenta waqaychananpaq.

⁵Davidqa Señor Diospa ñawpaqenpi chanintan kawsasqa, payqa manan hayk'aqpas kawsayninpi Señor Diospa kamachikuyninmanta t'aqakusqachu, aswanpas Het runa Uriasta wañuchisqallanwanmi t'aqakusqa.

⁶Roboam kawsashaqtinqa Jeroboamwan churanakushallarqankupunin.

⁷Hinallataq chay qhepatapas Abiamwan Jeroboamwan churanakushallarqankupuni. Abiammanta wakin willakuykunapas tukuy ruwasqankunapas Judá Reykunaq Willakuynin Qelqapi qelqasqan kashan.

⁸Abiam wañukapuqtintaq Davidpa LLaqtan nisqapi p'ampapurqanku. Chay qhepatataq churin Asa rantinpi kamachikurqan.

⁹Asaqa Judapi kamachikuyta qallarirqan Israelpi Jeroboam chunka isqonniyoq wata kurakña kamachikushaqtinmi,

¹⁰Jerusalenmantataq tawa chunka watata kamachikurqan. Hatun mamanmi karqan Abisalompa ususin Maaka sutiyoq.

¹¹Asaqa Señor Diospa munayninman hinan chaninta ruwarqan machulan Davidpa ruwasqanta hina,

¹²payqa suyumanta wikch'urqan yupaychana wasikunapi yupaychaq hamuqkunawan t'inkikuq qharikunatapas, machulankunaq ruwasqan llapan idolokunatapas.

¹³Hinallataq hatun maman Maakata reina mama kayninmanta wikch'urqan Asera nisqa diosaq millay rikch'ayninta ruwachisqan hawa. Chay rikch'aytan Asaqa ñut'uta chhallurqan, hinaspan Kidrón mayu wayq'opi ruphachirqan.

¹⁴Manaña Israel suyupi orqo patapi yupaychana wasikunata thunirqanchu chaypas, Asaqa Señor Diospaq hunt'aqllapunin karqan tukuy kawsasqan p'unchaykunapi,

¹⁵hinallataq Señor Diospa wasinman churarqan paypas taytanpas Señor Diospaq t'aqasqanku qorita, qolqeta, serviciokunatawan.

¹⁶Asaqa Israel suyu rey Baasawanmi mana p'itiyta churanakurqan.

¹⁷Baasataq Judata maqanakuq rispa Ramá llaqtata allinta perqachirqan Asaq suyunman haykuqtapas lloqsiqtapas hark'ananpaq.

¹⁸Hinan Asaqa Señor Diospa wasinpi puchuq llapan qorita, qolqeta, paypa qhapaq-kayninkunatapas huñuspa, oficialninkunawan apachirqan Siria suyu rey Ben-Hadadman. Payqa Hezionpa churin Tabrimonpa churinmi karqan, tiyarqantaq Damasco llaqtapi. Asaqa kay hina willakuyta apachirqan:

¹⁹Qanwan ñoqawan rimanakusun, imaynan taytanchiskuna rimanakurqan hinata. Kayqa sumaq sonqota apachimushayki qorita, qolqetawan. Israel suyu rey Baasawan rimanakusqaykita saqepuy, ahinapin ñoqaq suyuymanta paykuna ripunqaku, nispa.

²⁰Hinan Ben-Hadadqa rey Asaq nisqanta uyakurqan, chaymi Israel llaqtakunaman phawaykunankupaq soldado umallikunata kacharqan. Hinan munaychakurqanku Ijonta, Danta, Abel-bet-Maakata, llapan Kineret-ta, llapan Neftalí hap'iytawan.

²¹Baasataq chayta yacharqospa manaña Ramá llaqtata perqachirqanñachu, aswanpas Tirsamanmi kutipurqan.

²²Hinan rey Asaqa Judá suyu runakunata llapallanta waqyachirqan, hinaspan Ramá llaqtata perqananpaq Baasaq apasqan rumikunata kurkukunata ima aparqan. Chaykunawantaq rey Asaqa sayarichirqan Benjaminpi Geba llaqtata Mizpa llaqtatawan.

²³Asamanta wakin willakuykunapas, paypa atiyninpas, tukuy ruwasqankunapas, llaqtakunata sayarichisqanpas Judá Reykunaq Willakuynin Qelqapi qelqasqan kashan. Yuyaq kaspanmi Asaqa chakinmanta onqoykurqan.

²⁴Wañukapuqtintaq Davidpa Llaqtan nisqapi machulankunaq p'ampananman p'ampapurqanku. Chay qhepatataq churin Josafat rantinpi kamachikurqan.

²⁵Wata kurakña Judá suyupi Asa kamachikushaqtinmi, Jeroboampa churin Nadabqa Israel suyupi kamachikuyta qallarirqan, iskay watallataq kamachikurqan.

²⁶Payqa manan Señor Diospa munayninman hinachu ruwarqan, taytan hina huchallikuspa, Israel runakunatapas huchallichirqan.

²⁷Isakar ayllumanta kaq Ahiaspa churin Baasataq ichaqa Nadab contra hatarirqan, hinaspan Nadabta wañuchirqan, Filistea runakunaq Gibetón llaqtanta Nadabwan Israel soldadokunapiwan muyuykushaqtin.

²⁸Baasaqa Nadabta wañuchirqan Judapi Asa kinsa wata kamachikushaqtinmi, chaymi Nadabpa rantinpi kamachikurqan.

²⁹Kamachikuyta qallarispa hinataq Jeroboampa llapan ayllunta wañuchirqan, mana ch'ullayoqta, imaynan Señor Diosqa Silomanta profeta Ahiaswan willachisqanman hina.

³⁰Jeroboamqa Israelpa Diosnin Señorta phiñachisqa huchankunawan Israelta huchallichisqanwan, chaymi Señor Diosqa mirayninkunata ch'usaqyachirqan.

³¹Nadabmanta wakin willakuykunapas tukuy ruwasqankunapas Israel Reykunaq Willakuynin Qelqapi qelqasqan kashan.

³²Asaqa Israelpa reynin Baasawan mana p'itiytan churanakurqan.

³³Judá suyupi iskay wata kurakña Asa kamachikushaqtintaq Ahiaspa churin Baasaqa Tirsamanta llapa Israelta kamachiyta qallarirqan, kamachikurqantaq iskay chunka tawayoq watata.

³⁴Reyqa manan Señor Diospa munayninman hinachu ruwarqan, aswanpas Jeroboam hinallataqmi huchallikurqan, kaqllataq Israel runakunatapas huchallichirqan.