Read Quechua Cuzco Bible 1988 1 REYES 16 Bible Online

1 REYES 16 - Quechua Cuzco Bible 1988 bible

1 REYES 16

¹Chaymi Señor Diosqa Hananiq churin Jehuta rimaykurqan Baasata ninanpaq:

²Señor Diosmi nisunki: Mana valeqmantan ñoqaqa akllarqayki, hinaspa Israel llaqtay kamachiqta churarqayki. Qantaq ichaqa Jeroboam hina huchallikurqanki, Israel llaqtaytapas huchallichispayki, chaykunawanmi phiñachiwarqanki.

³Chayraykun qantapas aylluykitapas chinkachipusqayki. Imaynan Nadabpa churin Jeroboamta ruwarqani, ahinallatataqmi qankunatapas ruwasqaykichis.

⁴Llaqtapi aylluykikuna wañuqtaqa alqokunan mikhunqa, campopi wañuqkunatataq phalaq animalkuna mikhunqa, nispan, nispa.

⁵Baasamanta wakin willakuykunapas, ruwasqankunapas, paypa atiyninpas Israel Reykunaq Willakuynin Qelqapi qelqasqan kashan.

⁶Baasa wañukapuqtintaq Tirsapi p'ampapurqanku. Chay qhepatataq churin Ela rantinpi kamachikurqan.

⁷Hananiq churin profeta Jehuwanmi Señor Diosqa willachirqan Baasata aylluntawan huchachananta, mana Señor Diospa munayninman hinachu ruwasqanrayku. Baasaqa Señor Diosta phiñachirqan Jeroboampa ayllun hina mana chaninta ruwaspa, Jeroboampa ayllunta wañuchispa ima.

⁸Judá suyupi iskay chunka phisqayoq wata kurakña Asa kamachikushaqtintaq, Baasaq churin Elaqa Tirsamanta llapa Israelta kamachiyta qallarirqan, kamachikurqantaq iskay watata.

⁹Zimriqa maqanakuy carretakunaq kuskannin kamachiq oficialninmi karqan, paymi Ela contra sayarirqan. Huk p'unchaymi Elaqa Tirsa llaqtapi mayordomon Arsaq wasinpi machasharqan.

¹⁰Hinan chay rato Zimriqa chayaspa Elata wañurqachirqan, hinaspa rantinpi pay kamachikurqan. Chaytan ruwarqan Judá suyupi iskay chunka soqtayoq wata kurakña Asa kamachikushaqtin.

¹¹Kamachikuyta qallarispantaq Zimriqa kamachikuy tiyanapi tiyaykuspa hina Baasaq llapan ayllunta wañuchirqan, manapuni huk qharitapas, amigollantapas kawsachirqanchu.

¹²Ahinatan Zimriqa wañuchirqan Baasaq llapan ayllunkunata, Jehú profetawan Baasa contra Señor Diospa willachisqanman hina.

¹³Baasaqa churin Elapiwanmi Señor Diosta phiñachirqanku huchallikuspanku, Israel runakunata huchallichispanku, idolokunata yupaychaspanku ima, chaymi Señor Diosqa chay hinata muchuchirqan.

¹⁴Elamanta wakin willakuykunapas tukuy ruwasqankunapas Israel Reykunaq Willakuynin Qelqapi qelqasqan kashan.

¹⁵Judá suyupi iskay chunka soqtayoq wata kurakña Asa kamachikushaqtinmi Zimriqa Tirsa llaqtapi kamachikuyta qallarirqan, ichaqa qanchis p'unchayllatan kamachikurqan. Chaykamataq Israel soldadokunaqa Filistea runakunaq Gibetón llaqtanman phawaykunankupaq muyuykurqanku.

¹⁶Hinan paykunaqa uyarirqanku: Chay Zimrin rey contra sayarispa wañuchin, nisqata. Chaymi paykunaqa chay kikin p'unchay soldadokunaq umallin Omrita reyta churarqanku.

¹⁷Omritaq llapa Israel soldadokunapiwan manaña Gibetonman phawaykurqankuñachu, aswanpas Tirsa llaqtata rispa muyuykurqanku.

¹⁸Zimritaq llaqta atipasqa kasqanta reparaspa, rey wasipi pukaraman haykurqan, wasi ukhupi kashaspataq payqa ninawan hap'iykuchirqan, ahinapi wañupurqan.

¹⁹Zimriqa manan Señor Diospa munayninman hinachu ruwarqan, aswanpas Jeroboam hinan huchallikurqan, Israel runakunatapas huchallichirqan, chaymi payqa chay hinapi wañurqan.

²⁰Zimrimanta wakin willakuykunapas rey Ela contra sayarisqanpas Israel Reykunaq Willakuynin Qelqapi qelqasqan kashan.

²¹Chaymantataq Israel runakuna iskayman t'aqakurqan. Huk t'aqan Ginatpa churin Tibnaita rey kananta munarqanku, hukkaq t'aqataq Omrita.

²²Tukukuypitaq Omrita rey kananta munaq t'aqa atiparqan Ginatpa churin Tibniq qatikuqninkunata, chaymi Tibni wañupurqan, Omritaq rey kapurqan.

²³Judá suyupi kinsa chunka wata kurakña Asa kamachikushaqtinmi Omriqa Israelpi kamachikuyta qallarirqan. Ñawpaqta Tirsamanta soqta watata kamachikurqan, llapanpitaq chunka iskayniyoq watata kamachikurqan.

²⁴Omriqa Semermanta Samaria orqota rantirqan soqta chunka kilo qolqewan, hinaspan chay orqopi perqata sayarichirqan, chaypi sayarichisqan llaqtatataq Samariata suticharqan, chay orqo vendeqnin runa Semer sutiyoq kasqanrayku.

²⁵Omriqa manan Señor Diospa munayniman hinachu ruwarqan, aswanpas paymanta ñawpaqkaq reykunamantapas aswantaraqmi huchallikurqan.

²⁶Nabatpa churin Jeroboampa ruwasqan kikin huchakunatan ruwarqan, chayllawantaq Israel runakunatapas huchallichirqan, ídolo yupaychaywan Israelpa Diosnin Señorta phiñachispan.

²⁷Omrimanta wakin willakuykunapas, tukuy ruwasqankunapas, atiyninpas Israel Reykunaq Willakuynin Qelqapi qelqasqan kashan.

²⁸Omritaqa wañukapuqtin Samariapin p'ampapurqanku. Chay qhepatataq churin Ahab rantinpi kamachikurqan.

²⁹Judá suyupi kinsa chunka qanchisniyoq wata kurakña Asa kamachikushaqtinmi, Omriq churin Ahabqa Israel suyupi kamachikuyta qallarirqan. Iskay chunka iskayniyoq watatan Israel suyuta Samariamanta kamachirqan.

³⁰Ichaqa manapunin Señor Diospa munayninman hinachu ruwarqan, aswan mana chaninraqmi karqan paymanta ñawpaqkaq reykunamantapas.

³¹Ahabpaqqa Jeroboam hina huchallikuyqa manan imapaschu karqan, hinan Sidón rey Et-baalpa ususin Jezabelwan casarakurqan, hinaspan Baal nisqa diosta yupaycharqan, qonqor-chakitaq servirqan.

³²Hinaspan payqa Samariapi sayarichisqan Baal nisqa dios yupaychana wasipi altarta perqarqan.

³³Ruwallarqantaq Asera nisqa diosaq rikch'aynintapas. Ahabqa paymanta ñawpaqkaq reykunamantapas astawanraqmi Señor Diosta phiñachirqan.

³⁴Ahabpa tiemponpin Betelmanta Hielqa Jericó llaqtata wakmanta sayarichirqan. Teqsinkunata churaqtinmi phiwi churin Abiram wañurqan, punkunkunata churaqtintaq sullk'a churin Segub wañurqan, chaymi hunt'akurqan Nunpa churin Josuewan Señor Diospa willachisqan simi.