Read Quechua Cuzco Bible 1988 1 REYES 19 Bible Online

1 REYES 19 - Quechua Cuzco Bible 1988 bible

1 REYES 19

¹Jezabelmanmi Ahabqa Eliaspa tukuy ruwasqantapas imaynatachus Baal nisqa diospa llapan profetankunata wañuchisqantapas willarqan.

²Hinan Jezabelqa Eliasman willaqta kacharqan: —Manachus paqarin kay horas qanta wañuchisqayki imaynan chay profetakunata wañuchirqanki hinata chayqa, dioskuna ñoqata wañuchiwachun, nispa, nimunanpaq.

³Eliastaq mancharikurqan, chaymi kawsayninta qespichinanpaq ayqekurqan. Judapi kashaq Beersebakama chayaspataq, kamachinta chaypi saqerqan.

⁴Chaymantataq ch'inneqman ripuspa huk p'unchay ch'isiyaqta purirqan, hinaspa huk retama chakipi tiyaykurqan. Eliasqa wañukapuyta munaspan mañakurqan: —¡Señor Diosníy, kaykamallaña! Kawsayniyta qechupuway, manan machulaykunamanta aswan allinchu kani, nispa.

⁵Hinaspan chay retama chakipi siriykuspa puñurqapurqan. Hinan qonqaylla huk ángel llamiykuspa nirqan: —Hatariy, mikhuy, nispa.

⁶Eliastaq muyuriqninta qhawarikuspa rikurqan sawnanan qayllapi sansapi kusasqa huk t'antata, huk p'uyñupi unutawan. Hinaspan hatarispa mikhurqan, ukyarqan, chaymantataq wakmanta puñuykurqan.

⁷Señor Diospa angelnintaq ichaqa yapamanta hamurqan, hinaspan llamiykuspa nirqan: —Hatariy, mikhuy, mana chayqa manan purinaykita usachiwaqchu, nispa.

⁸Eliastaq hatarispan mikhurqan ukyarqantaq. Chay mikhunan kallpacharqan tawa chunka p'unchay tawa chunka tuta purinanpaq, Diospa Horeb orqonman chayanankama.

⁹Chayaspataq huk qaqa t'oqoman haykurqan, chaypin illarirqan. Señor Diostaq payta rimaykurqan: —Elías, ¿imatan kaypi ruwashanki? nispa.

¹⁰Eliastaq kutichirqan: —Tukuy-atiyniyoq Señor Dios, anchatan qanmanta sienterqani, Israel runakunan rimanakusqaykita saruncharqanku, altarniykikunatapas thunirqanku, profetaykikunatapas lliwta wañuchirqanku. Ñoqa sapallayñan qhepani, chaypas wañuchinawankupaqmi maskhashawanku, nispa.

¹¹Hinan Señor Diosqa nirqan: —Hawaman lloqsimuy, hinaspa orqo patapi ñawpaqeypi sayaykuy, nispa. Chay kikin ratotaq Señor Diosqa pasarqan, hinan paypa ñawpaqenpi tutuka wayra orqokunata q'asarqan, qaqakunatapas ch'eqtarqan, ichaqa Señor Diosqa manan wayrapichu kasharqan. Chay qhepatataq pacha chhaphchiy karqan, ichaqa Señor Diosqa manan pacha chhaphchiypichu kasharqan.

¹²Chayman qatiqtaq nina rawray karqan, ichaqa Señor Diosqa manan nina rawraypichu kasharqan. Nina rawray qhepatataq huk sumaq samp'a thak-kay karqan.

¹³Eliastaq chayta reparaspa capanwan uyanta pakaykukurqan, qaqa t'oqomanta lloqsimuspataq punkupi sayaykurqan. Hinan payta huk kunka rimaykurqan: —Elías, ¿imatan kaypi ruwashanki? nispa.

¹⁴Eliastaq kutichirqan: —Tukuy-atiyniyoq Señor Dios, anchatan qanmanta sienterqani, Israel runakunan rimanakusqaykita saruncharqanku, altarniykikunatapas thunirqanku, profetaykikunatapas lliwta wañuchirqanku. Ñoqa sapallayñan qhepani, chaypas wañuchiwanankupaqmi maskhashawanku, nispa.

¹⁵Hinan Señor Diosqa nirqan: —Maynintachus hamusqaykita kutipuspa Damasco ch'inneqman riy. Chayman chayaspaykitaq Hazaelta aceitewan hawinki Siria suyu rey kananpaq,

¹⁶Nimsiq churin Jehutataq Israel rey kananpaq aceitewan hawinki, Abel-meholamanta Safatpa churin Eliseotataq rantiykipi profeta kananpaq aceitewan hawinki.

¹⁷Ahinapi Hazaelpa wañuchinanmanta pipas ayqenqa chayqa, Jehú wañuchinqa. Jehupa wañuchinanmanta pipas ayqenqa chaytataq Eliseo wañuchinqa.

¹⁸Chaywanpas, ñoqaqa qanchis waranqa runakunatan kawsayniyoqta Israel suyupi waqaychasaq, paykunaqa manan Baal nisqa diosman qonqorikurqankuchu, manataq much'arqankupaschu, nispa.

¹⁹Eliastaq chaymanta ripurqan, hinaspa Eliseota tarirqan chunka iskayniyoq masa torowan llank'ashaqta, payqa qhepakaq masatan llank'achisharqan. Hinan Eliasqa qayllaykuspa capanta Eliseo pataman wikch'uykurqan.

²⁰Eliseotaq kaq rato toronkunata saqerparispa Eliaspa qhepanta phawarirqan, hinaspa nirqan: —Suyariway tayta-mamayta huk much'aywan saqeykamunaykama, chaymantaqa ripusunchismi, nispa. Eliastaq nirqan: —Phaway riy, manan ñoqaqa ima niykipaschu, nispa.

²¹Hinan Eliseoqa Eliaspa qayllanmanta kutirirqan, hinaspataq iskay torokunata nak'aspa kuchurqan. Toroq llank'anan yugowantaq aychata q'asparqan, hinaspa runakunaman rakirqan mikhunankupaq. Chaymantataq Eliaspa qhepanta ripurqan, paypa kamachintaq kapurqan.