Read Quechua Cuzco Bible 1988 1 REYES 5 Bible Online

1 REYES 5 - Quechua Cuzco Bible 1988 bible

1 REYES 5

¹Tiro llaqta rey Hiramqa Davidpa churin Salomón reypaq hawisqa kasqanta yachaspanmi, oficialninkunata payman kacharqan taytan Davidta munakullaqpuni kasqanrayku.

²Hinan Salomonqa Hiramman willaqta kacharqan:

³Yachankiñan taytay Davidpa awqankunawan maqanakuypi sinchita usqhasqanta, chaymi Señor Diosniypaq yupaychana wasita mana sayarichiyta atirqanchu awqankunata Señor Diospa atipachinankama.

⁴Kunanmi ichaqa Señor Diosniy tukuy muyuriqniy llaqtakunawan thak-kaypi kawsachiwanku, manañan awqaykupas ñak'ariykunapas kanñachu.

⁵Chaymi kunan yuyaykuni Señor Diosniypaq huk yupaychana wasita ruwapuyta, taytay Davidmanmi Señor Diosqa khaynata nisqa: Churiykitan rantiykipi kamachikuqta churasaq, paymi ñoqapaq huk yupaychana wasita sayarichipuwanqa, nispa.

⁶Chay hinaqa, kamachiy Libanomanta cedro sach'ata kumpanpuwanankupaq. Llank'aqniykikunata ñoqaq llank'aqniykuna yanapanqaku, hayk'an niwasqaykitataq llank'aqniykikunaman pagapusaq. Qanqa yachankin Sidonmanta runaykikuna hinaqa mana mayqenniykupas mallki kumpayta yachasqaykuta, nispa.

⁷Hiramtaq Salomonpa willachisqanta uyarispa anchata kusikurqan, hinaspan nirqan: —¡Saminchasqa Señor Diosqa kachun! Paymi Davidman ancha yachaysapa churita qorqan chay hatun suyuta kamachinanpaq, nispa.

⁸Chaymantataq Hiramqa Salomonman willaqta kacharqan: Chaskinin willamuwasqaykita, ima munasqaykitan ruwasaq, apachimusqaykin cedro kurkutapas pino kurkutapas.

⁹Llank'aqniykunan kurkuta Libanomanta mama qochakama uraykachimunqa, chaymantataq mama qochanta chaqllasqa tuytushaqta apachimusqayki maymanchá munanki chaykama. Chaypitaq chaqllasqa kurkuta paskanqaku, hinan kurkukunata qan chaskinki. Chay hinaqa, ñoqapaqpas aylluypaqpas mikhuyta qomuwanki chayllawan kurkukunataqa chhalasunchis, nispa.

¹⁰Chaymi Hiramqa Salomonman tukuy munasqanta qorqan, cedro kurkutapas pino kurkutapas.

¹¹Salomontaq Hirampaqpas ayllunpaqpas qorqan iskay chunka waranqa fanega trigota, tawa waranqa tawa pachak litro olivo aceitetawan. Chaytan Salomonqa Hiramman sapa wata qorqan.

¹²Señor Diosmi Salomonman yachayta qorqan prometesqanman hina. Hiramwan Salomonwanqa sumaqtan rimanakurqanku, chaymi paykunaqa sumaqta kawsarqanku.

¹³Chaymantataq rey Salomonqa Israel suyupi mit'ani llank'ayta rikhurichirqan, hinan kinsa chunka waranqa qharikunata huñurqanku mit'anipi llank'anankupaq.

¹⁴Paykunatan Libanoman kacharqanku tupaqninman hina sapa killa chunka waranqa qharikunata. Hinan chaypi huk killa llank'arqanku, chaymantataq iskay killa wasinkupi karqanku. Mit'ani runakunaq umallinmi karqan Adoniram.

¹⁵Orqo-orqopi kallarqantaq Salomonpa pusaq chunka waranqa rumi ch'eqtapuqnin qharikuna, kallarqantaq qanchis chunka waranqa rumi q'epiq qharikunapas.

¹⁶Kallarqantaq chay llank'ayta kamachiq kinsa waranqa umallikunapas.

¹⁷Reypa kamachikusqanman hinan yupaychana wasiq teqsinta churanankupaq sumaq hatun ch'eqosqa rumikunata wakichirqanku.

¹⁸Chhaynaqa Salomonpa llank'aqninkuna, Hirampa llank'aqninkuna, Gebal llaqta qharikunapiwanmi yupaychana wasi sayarichinapaq kurkukunatapas ch'eqosqa rumikunatapas wakichirqanku.