Read Quechua Cuzco Bible 1988 1 REYES 8 Bible Online

1 REYES 8 - Quechua Cuzco Bible 1988 bible

1 REYES 8

¹Chaymantataq rey Salomonqa Jerusalén llaqtapi huñurqan Israelpi llapan kurak runakunata, llapan ayllu umallikunata, familia umallikunatawan, Señor Diospa rimanakuynin cajata Davidpa Llaqtan nisqa Sionmanta apananpaq.

²Wataq Etanim nisqa qanchiskaq killanpitaq Ch'uklla Ruwana Fiestapi llapan Israel qharikuna rey Salomonwan huñukurqanku.

³Israelpi kaq llapa kurak runakuna huñukuqtintaq, sacerdotekuna Leví runakunapiwan rimanakuy cajata, Dioswan Tupana Karpapi kaq llapan ch'uya serviciokunatawan aparqanku Dios yupaychana wasiman.

⁴

⁵Hinan rey Salomonqa paywan huñukuq llapan qharikunapiwan rimanakuy cajaq ñawpaqenpi askha ovejakunata torokunata ima sacrificiota haywarqanku, chaykunan mana yupay atiy karqan.

⁶Chaymantataq sacerdotekuna Señor Diospa rimanakuynin cajata yupaychana wasi ukhuman apaykurqanku Ch'uyay-ch'uya Cheqaskama, hinaspa churaykurqanku raphrayoqkunaq raphran uraman.

⁷Chay raphrayoqkunaqa mast'arisqa raphrayoqmi karqan, chay raphrankunan rimanakuy cajata wantuna k'aspitapas pakarqan.

⁸Wantuna k'aspikunan sinchi hatun karqan, chaymi chay k'aspikunaq puntan Ch'uya Cheqasmanta rikukurqan, yupaychana wasi punkumantan ichaqa mana rikukurqanchu. Ahinapin chay k'aspikuna qhepakapurqan.

⁹Rimanakuy cajapiqa iskay p'alta rumillan karqan. Israel runakuna Egipto suyumanta lloqsimuqtinmi, Señor Diosqa paykunawan rimanakusqa, chay p'alta rumikunatan Moisesqa cajaman Horebpi churaykusqa.

¹⁰Ch'uya Cheqasmanta sacerdotekuna lloqsiqtintaq, Señor Dios yupaychana wasita phuyu hunt'aykurqan,

¹¹chaymi wasiqa Señor Diospa lliphlli-kayninwan hunt'a karqan, chay hawataq sacerdotekuna qa wasipi mana serviyta atirqankuchu.

¹²Chaymi Salomonqa nirqan: —Señor Diosníy, qanmi hanaq pachapi intita churarqanki, chaywanpas tutayaqpi tiyaytan akllakurqanki.

¹³Kunanmi sumaq qhapaq wasita ruwapuyki chaypi wiñayta tiyanaykipaq, nispa.

¹⁴Chaymantataq rey Salomonqa huñuykusqa sayashaq llapan Israel runakunaman kutirispa, paykunata samincharqan.

¹⁵Nillarqantaq: —Saminchasqa kachun Israelpa Diosnin Señorqa, pay kikinmi taytay Davidman prometesqanta hunt'arqan, paymi nisqa:

¹⁶Egiptomanta Israel llaqtayta horqomusqay p'unchaymantapacha manan Israel suyupi mayqen llaqtatapas akllarqanichu, chaypi wasita sayarichipuwaspaykichis ñoqata yupaychawanaykichispaq, aswanpas qantan, David, akllarqayki llaqtayta kamachinaykipaq, nispa.

¹⁷Taytay Davidtaq sonqonpi yuyaykukusqa Israelpa Diosnin Señorta yupaychanapaq wasita sayarichiyta.

¹⁸Señor Diostaq ichaqa taytay Davidta nisqa: Allinmi huk wasita sayarichipuwanaykipaq yuyaykusqaykiqa,

¹⁹ichaqa manan qanqa sayarichiwaqchu, aswanpas churiykin ñoqapaq huk wasita sayarichipuwanqa, nispa.

²⁰Chay hinaqa, hunt'arqanmi Señor Diosqa prometesqanta, chaymi kunan nisqanman hina ñoqaqa David taytaypa rantinpi Israel suyu kamachikuna tiyanapi tiyaykuni, hinaspa Israelpa Diosnin Señorpaq huk wasita sayarichipurqani.

²¹Chay wasipin huk cheqasta t'aqarqani rimanakuy cajata churanapaq. Chay cajapin kashan Egiptomanta horqomushaspa machulanchiskunawan Señor Diospa rimanakuynin, nispa.

²²Chaymantataq llapa Israel runakuna qayllapi Salomonqa Señor Diospa altarninpa ñawpaqenpi sayaykurqan, hinaspa makinta altoman haywarispa

²³nirqan: —Israelpa Diosnin, Señor, manan kanchu hanaq pachapipas kay pachapipas qan hina Diosqa. Qanqa rimanakusqaykita hunt'aqmi kanki, mana p'itiytataq munakunki tukuy sonqo serviqniykikunata.

²⁴Kamachiyki taytay Davidman prometesqaykitapas hunt'arqankin, simiykiwan rimasqaykitapas kunanmi hunt'anki.

²⁵Chay hinaqa, Israelpa Diosnin Señor, hunt'allaytaq taytayman prometesqaykita, qanmi nisqanki: Churiykikunachus allinta kawsanqaku, imaynan qan ñawpaqeypi kawsarqanki hinata chayqa, mirayniykiqa Israel suyupi kamachishallanqapunin, nispa.

²⁶Chay hinaqa, Israelpa Diosnin Señorníy, kamachiyki taytay Davidman prometesqaykita hunt'allaypuni.

²⁷Ichaqa, ¿cheqaqtachu qan Diosqa kay pachapi tiyawaq? Hanaq pachapas manan chaskiyta atisunkichu ancha hatun kashaspa, ¿hayk'antaq kanman kay wasi sayarichisqayri?

²⁸Chaywanpas, Apu Señor Diosníy, uyariykuway mañakusqayta, khuyapayawanaykipaq valekusqaytapas. Uyariykuway, ñoqa kamachiykin kunan waqyakamuyki mañakamuyki.

²⁹Tuta p'unchay kay wasita qhawashallaypuni, qanqa nirqankin: Chaypin kashasaq, nispa. Maypiña kashaspaypas kay wasi qhawarisqa mañakuqtiyqa uyariykullawankipunin.

³⁰Hinallataq Israel llaqtaykitapas ñoqatapas kay wasi qhawarisqa mañakuqtiykuqa uyariykullawankikupunin, hanaq pacha tiyanaykimanta uyariykamullawankiku, pampachaykuwankikutaq.

³¹Pipas runamasinpa ch'atasqan kaqtin, kay wasipi altarniykipi jurachinkuman mana huchayoq kasqanta chayqa,

³²hanaq pachaykimanta uyariykamuy, hinaspa t'aqtay kamachiykikunata, huchayoqta wanachiy mana chanin ruwasqanmanta muchuchispayki, mana huchayoqtataq chaninchayman hina sut'inchay chanin kasqanta.

³³Qan contra huchallikusqan hawa Israel llaqtaykita awqanku atipanman, hinataq paykuna qanman kutirikamusunkiman, yupaychasunkimantaq, kay wasipi mañakuspataq valekusunkiman chayqa,

³⁴uyariykamuy hanaq pachaykimanta, huchankutapas pampachaykuy, hinaspa machulankuman qosqayki hallp'aman kutichimpuy.

³⁵Qan contra llaqtaykiq huchallikusqan hawa ch'akirinman, manataq paranmanchu, ichaqa kay wasi kutirisqataq mañakunkuman, yupaychasunkikuman, muchuchiqtiykitaq huchankuta wikch'unkuman chayqa,

³⁶uyariykamuy hanaq pachaykimanta, pampachaykuy Israel llaqta kamachiykikunaq huchanta, hinaspa yachachiy allin chanin ñanta purinankupaq, hinallataq llaqtaykiman herenciapaq qosqayki hallp'amanpas parachiy.

³⁷Yarqaypas, millay onqoypas, ruphashaq wayrapas, polvillopas, langostapas, yura mikhuq kurupas, llaqtaykuta muyuykuspa phawaykuq awqaykupas, ima onqoypas sasachakuypas kay suyupi kanman chayqa,

³⁸uyariykamuy mañakusqankuta. Llaqtaykiman mayqen runapas sonqonpi llakikuspa makinta kay wasi ladoman haywarispa mañakusunkiman chayqa,

³⁹hanaq pachaykimanta uyariykamuy, hinaspa huchankuta pampachaykuy, t'aqtaspaykitaq sapankaman ruwasqanman hina qopuy. Qan sapallaykin runaq yuyaykuynintapas sonqontapas reqsinki.

⁴⁰Chaymi manchakuywan yupaychasunkiku machulaykuman qosqayki hallp'api tiyasqanku tukuy tiempo.

⁴¹Mayqen wak llaqtayoqpas mentasqa kasqaykita uyarispa musphana ruwasqaykita yachaspa karu llaqtamanta hamunman, hinaspa kay wasiykipi mañakusunkiman chayqa,

⁴²

⁴³uyariykamuy hanaq pacha tiyasqaykimanta, hinallataq tukuy mañakusqasuykita qoykuy, llapan kay pacha suyukuna reqsinasuykipaq, hinaspa Israel llaqtayki hina paykunapas manchakuywan yupaychanasuykipaq. Ahinapin yachanqaku kay ruwapusqay wasipi sutiyki yupaychasqa kasqanta.

⁴⁴Llaqtaykita awqa-tinkuyman kachaqtiyki, maypi kasqankupi akllakusqayki llaqta lado kutirisqa kay ruwapusqay wasiyki lado kutirisqa ima mañakunkuman chayqa,

⁴⁵hanaq pachamanta uyariykamuy mañakusqankutapas valekusqankutapas, hinaspa paykunawan atipachiy.

⁴⁶Manan pipas mana huchallikuqqa kanchu, chayrayku llaqtayki qan contra huchallikuqtin, k'arakta phiñakuspayki awqankuman hap'iykachiwaq suyunkuman presota apanankupaq, karumanpas qayllamanpas,

⁴⁷chaypitaq preso apasqa kasqanku suyupi qanman kutirikuspa valeykukusunkiman: Huchallikurqaykun, mana chanintan ruwarqayku, huchachasqan kayku, nispanku,

⁴⁸chaypitaq tukuy sonqo tukuy alma qanman kutirikunkuman, hinaspataq machulaykuman qosqayki suyu ladoman, akllakusqayki llaqta ladoman, ruwapusqay wasi ladoman kutirispa mañakusunkiman chayqa,

⁴⁹hanaq pachaykimanta uyariykamuy mañakusqankutapas valekusqankutapas, hinaspa qespichiy.

⁵⁰Llaqtaykiq qan contra huchallikusqanta tukuy mana chanin ruwasqantapas pampachaykuy. Preso apaqninkuwanpas khuyapayachiytaq.

⁵¹Paykunaqa llaqtaykin kaqniykin. Qanmi Egiptomanta horqomurqanki, chay suyun fierro unuyachina horno hina paykunapaq karqan.

⁵²Chay hinaqa, uyariykuway mañakuyniyta, kamachiykin kani, hinallataq Israel llaqtaykiq mañakusqantapas uyariykuy. ¡Diosnillayku! Uyariykullawaykupuni qanman mañakamuqtiyku.

⁵³Qanmi, Señor Diosníy kaqniykipaq kay llaqtata akllakusqanki kay pachapi llapan suyukunamanta, machulaykuta Egipto suyumanta horqomushaspayki Moisés kamachiykiwan willachisqaykiman hina, nispa.

⁵⁴Altarpa ñawpaqenpi qonqoriykukuspan makintapas hanaq pachaman haywarispa, Salomonqa Señor Diosmanta mañakusharqan. Chayta tukuspataq sayarirqan,

⁵⁵hinaspa llapan huñuykusqa kashaq Israel runakunapaq Señor Diospa saminchayninta kunkayoqta mañarqan:

⁵⁶—Señor Diosniyku, saminchaykiku. Qanqa prometesqaykiman hinan sumaq kawsayta Israel llaqtaykiman qowarqankiku. Qanqa mana qonqaspan chanin prometekusqaykita hunt'anki, Moisés kamachiykiwan willachisqaykiman hina.

⁵⁷Chay hinaqa, Apu Señor Diosniyku, yanapaykuwayku imaynan machulaykuta yanaparqanki hinata, amataq qonqawaykuchu, amallataq saqerpariwaykupaschu.

⁵⁸Qan, Apu Señor Diosniyku, kasukuq sonqota qoykuwayku, munayniykita ruwanaykupaq, ahinapitaq lliwta hunt'asaqku machulaykuman kamachisqayki chaninchayniykita, unanchayniykita, kamachikuyniykita ima.

⁵⁹Apu Señor Diosniyku, tuta p'unchay yuyarikullaypuni kay mañakusqaykuta, ñoqa kamachiykitapas Israel llaqtaykitapas allinta qhawariwayku, yanapaykuwayku sapa p'unchay necesitasqaykuman hina.

⁶⁰Chay hinapin, llapan kay pacha suyu runakuna yachanqaku qan sapallayki Diosqa kasqaykita, nispa.

⁶¹Nillarqantaq llaqtata: —Apu Señor Diosninchispaq hunt'aqllapuni kawsaychis, hinallataq hunt'aychis kamachikuy siminkunatapas unanchayninkunatapas kunan p'unchay hina, nispa.

⁶²Chay qhepatataq reypas llapan Israel runakunapas sacrificiota Señor Diosman haywarqanku.

⁶³Salomonmi haywarqan sumaq kawsay sacrificiota iskay chunka iskayniyoq waranqa torokunata, pachak iskay chunka waranqa ovejakunatawan. Ahinatan rey Salomonpas llapan Israel runakunapas Señor Dios yupaychana wasita sapaqcharqanku.

⁶⁴Señor Dios yupaychana wasiq ñawpaqenpi kaq bronce altarqa huch'uymi karqan, manataq chaskirqanchu llapan ruphachina sacrificiokunata, ruru ofrendakunata, sumaq kawsay sacrificioq wirankunatapas. Chaymi Salomonqa wasiq ñawpaqen patio chawpita ch'uyancharqan, hinaspa chaypi llapan chaykunata Señor Diosman haywarqan.

⁶⁵Chay kutin Salomonqa llapan Israel runakunapiwan Apu Señor Diosninkuq sutinpi Ch'uklla Ruwana Fiestata qanchis p'unchay ruwarqanku. Hamat Q'asamanta Egipto qorpakama tiyaq llapan Israel runakunan chay fiestaman askhallaña huñuykukurqanku.

⁶⁶Qhepantin p'unchaytataq Salomonqa runakunata kacharparipurqan, hinan paykuna reyta saminchaspa wasinkuta ripurqanku, ancha kusisqa sonqopas-sonqo tukuy allinkunata kamachin Davidpaq Israel llaqtanpaqpas Señor Diospa ruwasqanmanta.