Read Quechua Cuzco Bible 1988 1 REYES 9 Bible Online

1 REYES 9 - Quechua Cuzco Bible 1988 bible

1 REYES 9

¹Rey Salomón Señor Diospa wasintapas paypa wasintapas tukuy munasqankunatapas sayarichiyta tukuqtinña,

²Señor Diosqa iskaykaq kutipi payman rikhurirqan, imaynan Gabaonpi rikhurirqan hinata.

³Hinaspan nirqan: —Uyarinin mañakuwasqaykita, valekuwasqaykitapas, saminchanitaq sayarichipuwasqayki wasita, chaymi ñoqa kashallasaqpuni yupaychawanaykichispaq. Chay wasitaqa qhawashallasaqmi manataq qonqasaqchu.

⁴Chay hinaqa, ñawpaqeypi chaninta kawsanki taytayki David hina allin yuyaywan, tukuy sonqo, qanta kamachirqayki chaykunata lliwta kasukuspa unanchayniykunatapas chaninchayniykunatapas hunt'anki chayqa,

⁵wiñaypaqmi Israelpi kamachikuyniykita takyachisaq, imaynan Davidman prometerqani: Mirayniykiqa Israel suyuta kamachishallanqapunin, nispa chayman hina.

⁶Ichaqa qankunapas churiykichiskunapas ñoqamanta t'aqarikunkichis, manataq hunt'ankichischu kamachikuyniykunatapas unanchayniykunatapas, aswanpas wak dioskunata yupaychaspa servinkichis chayqa,

⁷qosqay suyumantan Israel llaqtata ch'eqechisaq, yupaychawanaykichispaq ch'uyanchasqay wasitapas wikch'usaqmi, chaymi Israel runakunata llapan suyukuna pisichanqa, asipayanqataq.

⁸Hinataq chay wasipas raqay-raqay kanqa, tukuy chayninta puriqkunataq sinchita llaksakuspa, ninqaku: ¡Achachaw! ¿Imanaqtintaq Señor Diosqa kay suyutapas kay wasitapas kay hinata ruwarqan? nispa.

⁹Chaymi kutichinqaku: Egipto suyumanta machulanku horqomuq Apu Señor Diosninkutan wasanchasqaku, wak dioskunatataq yupaychaspa servisqaku, chaymi Señor Diosqa chay hatun llakiwan paykunata muchuchisqa, nispanku, nispa.

¹⁰Salomonqa iskay chunka watapin sayarichirqan Señor Dios yupaychana wasita paypa wasintawan.

¹¹Tukuy chay tiempopin Tiro llaqta rey Hiramqa Salomonman apachishallarqan cedro kurkuta, pino kurkuta, qorita, hayk'an munasqanta. Chay qhepatataq Salomonqa Hiramman qorqan Galilea hap'iypi iskay chunka llaqtakunata.

¹²Hiramtaq chay qosqan llaqtakunata qhawaq rirqan, ichaqa manan payman gustarqanchu.

¹³Hinan Salomonta nirqan: —Wawqelláy, ¿imayna llaqtakunatataq kaykunatari qowanki? nispa. Chayraykun chay hap'iypi llaqtakunaqa Kabul[1] nisqa sutiyoq kapurqan.

¹⁴Hirampa rey Salomonman apachimusqan qoriqa kinsa waranqa isqon pachak soqta chunkayoq kilon kasqa.

¹⁵Rey Salomonqa mit'ani llank'aytan kamachikurqan, hinan chay mit'ani runakunawan sayarichirqan Señor Dios yupaychana wasita, paypa wasinta, Jerusalén muyuriq perqatawan, hinallataq llaqtaq inti lloqsimuy cheqasnin p'ukruta hunt'achirqan. Sayarichillarqantaq Hazor llaqtata, Megido llaqtata, Gezer llaqtatawan.

¹⁶(Egipto rey Faraonmi Gezer llaqtata maqanakuypi atipaspa ninawan kanaykusqa, llapan chay llaqtapi tiyaq Canaán runakunatataq wañuchisqa. Chaymantataq ususinman qopusqa Salomonwan casarakuqtin.

¹⁷Chay Gezertan Salomonqa wakmanta sayarichirqan). Hinallataq sayarichirqan Ura Bet-horonta,

¹⁸Baalat-ta, ch'inneqpi kashaq Tamartawan.

¹⁹Sayarichillarqantaq mikhuy taqena llaqtakunata, maqanakuypaq carreta waqaychana llaqtakunata, caballo waqaychana llaqtakunatawan, hinallataq Jerusalenpi Libanopi, kamachisqan suyuntinpi hayk'an munasqantapas.

²⁰Salomonmi mit'anipi llank'achirqan Israel runakunaq mana wañuchisqan Canaán runakunaq mirayninkunata. Chaykunan karqan Amor runakuna, Het runakuna, Fares runakuna, Hiv runakuna, Jebus runakunapiwan. Paykunaqa manan Israel runakunachu karqan, chaymi Israel runakunaq kamachin kapurqanku.

²²Ichaqa manan ch'ullallapas Israel runaqa kamachi karqanchu, aswanpas paykunaqa karqanku soldadokuna, oficialkuna, umallikuna, qollanakuna, hinallataq maqanakuy carretakunata kamachiqkuna caballopi maqanakuq soldadokuna ima.

²³Llank'aqkunata kamachiq umallikunan karqan phisqa pachak phisqa chunkayoq, paykunan Salomonpa sayarichisqanta kamachirqan.

²⁴Rey Faraonpa ususinqa Davidpa Llaqtanmanta Salomonpa paypaq wasi sayarichipusqanmanmi astakurqan. Hinan Salomonqa llaqtaq inti lloqsimuy cheqasnin p'ukruta hunt'achirqan.

²⁵Salomonqa watapi kinsa kutitan ruphachina sacrificiota sumaq kawsay sacrificiotapas Señor Diospaq sayarichisqan altar patapi haywaq, hinallataq inciensota Señor Diospa qayllanpi q'osñichiq. Ahinatan wasi sayarichiyta tukurqan.

²⁶Rey Salomonqa ruwallarqantaq barcokunata Puka Qocha patapi, Edom suyu Elat qaylla Ezión-geberpi.

²⁷Hinan rey Hiramqa mama qocha allin reqsiq wakin runakunata kacharqan. Salomonpa runankunawan chay barcokunapi llank'anankupaq.

²⁸Paykunataq Ofirman chayaspanku, yaqa chunka phisqayoq waranqa kilo qorita cargamurqanku, hinaspa rey Salomonman aparqanku.