Read Quechua Cuzco Bible 1988 ISKAYKAQ REYES 10 Bible Online

ISKAYKAQ REYES 10 - Quechua Cuzco Bible 1988 bible

ISKAYKAQ REYES 10

¹Samaria llaqtapi Ahabpa mirayninkunaqa qanchis chunkan karqan. Chaymi Jehuqa Samaria llaqtapi Jezreel kurak umallikunaman Ahabpa mirayninkuna waqaychaqkunaman cartata qelqarqan:

²Qankunawanmi Ahab wiraqochaykichispa mirayninkunaqa kashan, qankunaqqa kanmi caballokunapas, carretakunapas, armakunapas, allin waqaychasqa llaqtapas. Chay hinaqa kay qelqata chaskispaykichis hina,

³akllaychis wiraqochaykichispa churinkunamanta aswan allinnin qharin kaqta. Taytanpa kamachikuy tiyananmantaq tiyachiychis rey kananpaq, hinaspa maqanakuychis wiraqochaykichispa ayllunmanta, nispa.

⁴Paykunataq sinchita mancharikuspa ninakurqanku: —Iskay reypas manamá paytaqa atiparqanchu, ¿chaychu ñoqanchisri atipasunman? nispa.

⁵Hinan reypa wasinpi kamachikuq, llaqta kamachiq, kurak runakuna, waqaychaqkunapiwan Jehuman willaqta kacharqan: Ñoqaykuqa kamachiykikunan kayku, tukuy kamachiwasqaykikutan ruwasaqku. Manan ñoqaykuqa reyta akllasaqkuchu, qanlla ruway mayqenchus allin rikch'akusqasuykita, nispa.

⁶Chaymi Jehuqa huktawan qelqaspa nirqan: Ñoqaq t'aqaypi qankuna kashankichis, kamachisqaytapas kasukuyta munankichis chayqa, Ahab wiraqochaykichispa mirayninkunaq umanta qhoruychis, hinaspa paqarin kay horas Jezreelman apamuwaychis, nispa. Rey Ahabpa qanchis chunka mirayninkunaqa llaqtapi uma runakunaq uywasqanmi karqan, paykunawanmi kasharqanku.

⁷Llaqta uma runakunataq chay qelqata chaskispanku hina, chay qanchis chunka qharikunata hap'ispanku wañuchirqanku. Chaymantataq umankunata canastakunaman churarqanku, hinaspa Jezreelman apachirqanku.

⁸Willaq runataq Jehuman rispa nirqan: —Reypa mirayninkunaq umantan apamusqaku, nispa. Jehutaq kamachirqan: —Llaqta haykuna punkuman chay umakunata iskay qotuta churaychis, hinaspa paqarinkama chaypi saqeychis, nispa.

⁹Qhepantin p'unchaytaq Jehuqa llaqtamanta lloqsirqan, hinan sayaykuspa llapan runakunata nirqan: —Qankunaqa manan huchayoqchu kankichis. Ñoqan wiraqochay contra hatarispay payta wañuchirqani, ichaqa, ¿pitaq kaykunata wañuchirqan?

¹⁰Allinta yachaychis, Ahabpa ayllun contra Señor Diospa rimasqanqa llapallanpunin hunt'akunqa. Kikin Señor Diosmi ruwanña kamachin Eliaswan willachisqanman hina, nispa.

¹¹Chaymi Jehuqa Jezreelpi kaq Ahabpa wakin ayllunkunata wañuchirqan, llapan umallikunata munasqa amigonkunata, sacerdotenkunata ima. Mana ch'ullayoqtan paykunata wañuchirqan.

¹²Jezreel llaqtamanta lloqsispa Samariaman rirqan, ñanta purishaspataq Oveja Rutuna Wasi nisqa cheqasman chayarqan,

¹³chaypitaq Judá rey Okoziaspa wawqenkunawan tinkurqan. Hinan Jehuqa tapuykurqan: —¿Pikunan kankichis? nispa. Paykunataq kutichirqanku: —Okoziaspa wawqenkunan kayku, hamushaykun reypa wawankunata reinaq wawankunatawan napaykuq, nispa.

¹⁴Hinan Jehuqa soldadonkunata kamachirqan: —¡Paykunata hap'iychis! nispa. Hinaqtinmi paykunata hap'irqanku, hinaspa Oveja Rutuna Wasi p'uytu qayllapi mana ch'ullayoqta tawa chunka iskayniyoq qharikunata wañuchirqanku.

¹⁵Chaymanta ripuspataq Jehuqa Rekabpa churin Jonadabwan tuparqan, Jonadabqa Jehú watukuqmi risharqan. Hinan Jehuqa napaykuspa nirqan: —Qanqa rikunkipas yuyaykunkipas ñoqa hinan riki, nispa. Jonadabtaq kutichirqan: —Arí, nispa. Jehutaq nirqan: —Chay hina kaqtinqa makiykita haywarimuway, rimanakusun, nispa. Paytaq makinta haywarirqan, hinan Jehuqa carretanman seqachispa

¹⁶nirqan: —Riysiway, hinan rikunki Señor Diosmanta sienteq kasqayta, nispa. Ahinatan carretanpi aparqan.

¹⁷Samaria llaqtaman haykuspataq Jehuqa chaypi kashaq Ahabpa llapa ayllunta wañuchirqan. Hukpaqkama ch'usaqyachirqan, Señor Diospa Eliaswan willachisqanman hina.

¹⁸Chaymantataq Jehuqa llapan runakunata huñuykurqan, hinaspa nirqan: —Ahabqa asllatan Baal nisqa diosta yupaycharqan, ñoqan ichaqa allinta yupaychasaq.

¹⁹Chayrayku mana ch'ullayoqta waqyamuychis Baalpa llapan profetankunata, yupaychaqninkunata sacerdotenkunata ima. Huk hatun sacrificiotan Baalman haywasaq, pipas mana hamuqqa wañuchisqan kanqa, nispa. Jehuqa q'otullawanmi chayta yuyaykurqan Baal yupaychaqkunata wañuchinanpaq.

²⁰Hinaspataq kamachirqan: —Baalpa sutinpi hatun fiesta kananta willaychis, nispa. Paykunataq chayta willarqanku.

²¹Chay qhepatataq Jehuqa Israel suyuntinman willaqkunata kacharqan, hinan Baal yupaychaqkunaqa llapallanku yupaychana wasiman chayarqanku, manataq pipas qhepakurqanchu. Chaymi Baal yupaychana wasi sinchi hunt'a karqan.

²²Hinan Jehuqa p'acha waqaychaqta nirqan: —Yupaychana p'achakunata horqomuy llapan Baal yupaychaqkuna p'achakunanpaq, nispa. P'acha waqaychaqtaq chaykunata horqomurqan.

²³Chaymantataq Jehuqa Jonadabpiwan Baal yupaychana wasiman haykurqanku, Jehutaq yupaychaqkunata nirqan: —Allinta qhawariychis, amapuni qankunawan kanqachu Señor Dios yupaychaqkunaqa, aswanpas Baal yupaychaqkunakamalla, nispa.

²⁴Paykunataq ukhuman haykurqanku ruphachina sacrificiokunata wak sacrificiokunatawan haywanankupaq. Jehuqa hawapi churasqañan pusaq chunka qharikunata, kamachisqataq: —Aman chay qharikunata ch'ullatapas kawsachinkichischu, pichus ayqechinkichis chayqa wañuchisqan kankichis, nispa.

²⁵Jehutaq ruphachina sacrificiota haywayta tukuspa oficialninkunata waqaychaq qharikunatawan kamachirqan: —¡Haykuychis, hinaspa wañuchiychis! ¡Amapunin ch'ullatapas ayqechinkichischu! nispa. Hinan paykunaqa espadawan wañurqarichispa chaymanta wikch'umurqanku. Hinaspankutaq Baal yupaychana wasiq ukhukaq wasinman haykurqorqanku,

²⁶ch'uya kurkuta horqomuspankutaq ruphachirqanku.

²⁷Hinallataq Baal yupaychana saywa rumitapas yupaychana wasitapas thunirqanku, hinaspa hisp'ana cheqasman tukuchirqanku, chay hinan qhepapurqan.

²⁸Ahinatan Jehuqa Israelmanta Baal nisqa diosta ch'usaqyachirqan.

²⁹Chaywanpas Israel runakunata huchallichiq Nabatpa churin Jeroboampa huchankunamantaqa manapunin t'aqakurqanchu. Chay Jeroboammi Dan llaqtapipas Betel llaqtapipas qori torokunata yupaychayta qallarisqa.

³⁰Señor Diosmi Jehuta nirqan: —Qanqa yuyaykusqayman hinapunin Ahabpa ayllunta ruwarqanki, chay ruwasqaykiqa allinmi, chaymi mirayniyki Israel suyuta kamachinqa nietoykiq nietonkama, nispa.

³¹Chaywanpas Jehuqa manan makillachu yuyarqan Israelpa Diosnin Señorpa kamachikuynin simita, manataq hunt'aqllapunichu karqan. Manapunin t'aqakurqanchu Israel runakunata huchallichiq Jeroboampa huchankunamantaqa.

³²Señor Diosmi haqay tiempopi Israel suyuta huch'uyyachiyta qallarirqan. Jordán mayu inti lloqsimuy lado Israelpa llapan hallp'antan Hazaelqa munaychakurqan. Galaadpipas Basanpipas kashaq Manasés aylluta Gad aylluta Rubén ayllutawan atiparqan, hinaspa uray ladopi Arnón mayu qayllapi Aroer llaqtakama chayarqan.

³⁴Jehumanta wakin willakuykunaqa, tukuy ruwasqanmanta willakuykunapas atiyninmanta willakuykunapas Israel Reykunaq Willakuynin Qelqapi qelqasqan kashan.

³⁵Jehú wañupuqtinqa Samariapin p'ampapurqanku, rantinpitaq churin Joakaz kamachikurqan.

³⁶Jehuqa iskay chunka pusaqniyoq watatan Samaria llaqtamanta Israel suyuta kamachirqan.