Read Quechua Cuzco Bible 1988 ISKAYKAQ REYES 11 Bible Online

ISKAYKAQ REYES 11 - Quechua Cuzco Bible 1988 bible

ISKAYKAQ REYES 11

¹Okoziaspa maman Atalian churin Okoziaspa wañusqanta yachaspa, rey t'aqa aylluta llapanta wañuchirqan.

²Rey Jorampa ususin, Okoziaspa panan Josabán ichaqa Okoziaspa churin Joasta t'aqarqan Okoziaspa wakin wawankunata wañuchishasqanmanta, hinaspan Ataliamanta pakarqan puñunan wasipi wawa amanitawan kuskata. Chay hinapin Joastaqa mana wañuchirqanchu.

³Payqa pananwan tiyaspanmi Señor Dios yupaychana wasipi soqta wata pakasqa karqan, chaykamataq Ataliaqa suyuta kamachisharqan.

⁴Qanchiskaq watapitaq Joiadaqa waqyachimurqan Karimanta pachak soldadoq umallinkunata pachak guardiaq umallinkunatawan, hinaspa Señor Dios yupaychana wasiman haykuchirqan. Chaypin paykunata jurachirqan hinaspa rimanakurqanku, chaymantataq reypa churinta rikuchirqan.

⁵Hinaspan paykunata kamachirqan: Kay hinatan ruwankichis: Mayqenkunamanchus samana p'unchaypi llank'anaykichis tupasunkichis, qankuna kinsaman t'aqakuychis, hinaspa huk t'aqa reypa wasinta waqaychaychis,

⁶huk t'aqataq Shur punkupi kashaychis, hukkaq t'aqataq yupaychana wasiq guardiakunaq tiyanan wasiq qhepan punkupi kashaychis.

⁷Samana p'unchaypi llank'ay mana tupasunkichischu, qankunan iskay t'aqa kankichis, qankuna yupaychana wasita makilla qhawankichis reyta waqaychanaykichispaq.

⁸Hinaspa reyta muyuykunkichis, sapanka makiykichispi armayoqkama, pipas qankunaman asuykuqtaqa wañuchinkichismi. Qankunan reyta maytaña puriqtinpas riysinkichis, nispa.

⁹Hinan pachak soldado kamachiqkunaqa sacerdote Joiadaq kamachisqanman hina lliwta ruwarqanku. Chaymi pachak soldadoq umallinkunaqa samana p'unchaypi llank'ananpaq riq soldadonkunatapas llank'ananmanta samapunanpaq ripuq soldadonkunatapas huñurqanku, hinaspataq sacerdote Joiadaman asuykurqanku.

¹⁰Hinan sacerdote Joiadaqa pachak soldadoq umallinkunaman qorqan lanzakunata, escudokunatawan. Chay armakunaqa rey Davidpan kasqa, Señor Diosta yupaychana wasipitaq kasharqan.

¹¹Soldadokunataq makinkupi armantinkama reypa muyuriqninpi sayarqanku, paykunaqa altar qayllapin kasharqanku yupaychana wasiq wichay ladonmanta uray ladonkama.

¹²Hinan Joiadaqa reypa churinta horqomurqan, hinaspa payman coronata churarqan, reypa imachus ruwanan qelqatawan qorqan. Chaymantataq rey kasqanta rimarirqanku, hinaspa aceitewan hawirqanku. Chaymi llapanku t'aqllakuspa qaparirqanku: ¡Kawsachun rey! nispanku.

¹³Ataliataq guardiakunaqpas runakunaqpas qaparisqanta uyarispa, Señor Dios yupaychana wasipi kashaq runakunaman rirqan.

¹⁴Hinaspan payqa chaypi reyta rikurqan tusa qayllapi sayashaqta, imaynachus ruwana karqan chayman hina. Paywan kuskataq umallikuna corneta tocaqkuna kasharqanku, runakunapas ancha kusisqa putututa tocasharqanku. Chaymi Ataliaqa p'achanta llik'ikuspa, qaparirqan: —¡Q'otukuymi kayqa! ¡Q'otukuymi kayqa! nispa.

¹⁵Joiadaqa manan yupaychana wasipi Ataliata wañuchinata munarqanchu, chaymi ejército umallikunata kamachirqan: —¡Guardiakunaq chawpinta hawaman horqoychis, pipas hark'akuqtataq wañuchiychis! nispa.

¹⁶Hinan Ataliata hap'ispa, reypa wasinman caballokunaq haykunan punkunta apaykuspa chaypi wañuchirqanku.

¹⁷Chay qhepatataq Joiadaqa reyta runakunatawan nirqan: —Señor Dioswan rimanakuychis paypa llaqtan kanaykichispaq, nispa. Hinan paykunaqa ahinata ruwarqanku. Chaymantataq reytawan runakunatawan rimanachirqan.

¹⁸Chaymi llapanku Baal nisqa dios yupaychana wasita rirqanku, hinaspa thunirqanku, idolonkunatapas altarninkunatapas hukpaqkama ñut'urqanku. Baalpa sacerdoten Matantataq altarpa qayllanpi wañuchirqanku. Hinamantataq sacerdote Joiadaqa Señor Dios yupaychana wasiman guardiakunata churarqan,

¹⁹hinaspataq payqa pachak soldadoq umallinkunapiwan, Karimanta soldadokunapiwan, guardiakunapiwan, llapan runakunapiwan reyta riysirqanku Señor Dios yupaychana wasimanta reypa wasinkama. Guardiakunaq Haykunan Punkutataq haykurqanku. Rey Joastaq kamachikuy tiyanapi tiyaykurqan,

²⁰hinan llapa runakuna kusikurqanku. Ataliaqa reypa wasinpin wañupurqanña, chaymi llaqtaqa thak nisqa kapurqan.

²¹Joasqa qanchis watayoqmi karqan kamachikuyta qallarishaspa.